ភ្នំពេញ៖ ម៉ូតូម៉ាកហុងដាឌ្រីម ធុនសេ១១០ ពណ៌ខ្មៅ ត្រូវបានកម្លាំងនគរបាលប៉ុស្ដិ៍ទំនប់ទឹកយកមករក្សាទុកបន្ទាប់ពីទទួលបណ្ដឹងពីបុរសម្នាក់ដែលជាម្ចាស់រថយន្តកាមរី ដែលត្រូវម្ចាស់ម៉ូតូខាងលើនេះធ្វើសកម្មភាពកាច់កញ្ចក់រថយន្តរបស់គាត់ពីដែលគាត់តាមទាន់ក៏ជនសង្ស័យនោះ
រត់ចោលម៉ូតូនេះតែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង៤និង១០នាទីទៀបភ្លឺថ្ងៃទី២០ខែមេសាឆ្នាំ២០១៤ ទល់មុខក្រុមហ៊ុន បេតាហ្គ្រោ តាមបណ្ដោយផ្លូវលេខ២០៥ ក្នុងសង្កាត់ទំនប់ទឹក ខណ្ឌចំការមន។
តាមប្រភពព័ត៌មានពីម្ចាស់រថយន្តខាងលើឈ្មោះ ឆាយ កៅ អាយុ៣៥ឆ្នាំមុខរបររកស៊ីលក់ដូរ ស្នាក់នៅក្នុងសង្កាត់បឹងសាឡាង ខណ្ឌទួលគោក បានអោយដឹងថា គាត់បានបើករថយន្តរបស់គាត់មកឈប់នៅមុខក្រុមហ៊ុននោះដើម្បីដេកសំរាកក្នុងរថយន្តរបស់គាត់ មួយសន្ទុះក្រោយមកក៏បានដេកលក់មួយភាំង ក៏ឮសំលេង ហើយគាត់ក៏ស្ទុះឡើងមើលក៏ឃើញបុរសម្នាក់កំពុងតែកាច់រថយន្តរបស់គាត់ ភ្លាមៗនោះគាត់ក៏បានទ្វារចេញពីរថយន្តរបស់គាត់ដេញតាមចាប់បុរសជនសង្ស័យនោះហើយក៏មានការប្រទាញប្រទងគ្នារហូតធ្វើអោយជនរងសង្ស័យនោះភ័យខ្លាំងពេកក៏បានរត់ចោលម៉ូតរបស់ខ្លួនម៉ាកហុងដាឌ្រីម ធុនសេ១១០ ពណ៌ខ្មៅ ពាក់ស្លាកលេខភ្នំពេញ 1BE-9719 មួយគ្រឿងដែលចតទុកក្បែរកន្លែងនោះ រត់គេចខ្លួនបាត់ស្រមោលតែម្ដង។
ក្រោយកើតហេតុសមត្ថកិច្ចនគរបាលប៉ុស្ដិ៍ទំនប់ទឹកបានចុះមកដល់កន្លែងកើតហេតុសួរនាំនិងយកម៉ូតូរបស់ជនសង្ស័យទៅរក្សា និងទទួលពាក្យបណ្ដឹងរបស់ម្ចាស់រថយន្តខាងលើដើម្បីស្វែងរកជនសង្ស័យនេះ ព្រោះសមត្ថកិច្ចសន្និដ្ឋានថាម៉ូតូខាងលើនេះមិនមែនរបស់ជនសង្ស័យនេះទេ៕
