ខេត្តសៀមរាប៖សកម្មភាពដឹកជញ្ជូនឈើផ្ទុកលើសទម្ងន់របស់ក្រុមហ៊ុនរតន សម្បត្តិ បានកំពុងតែ ធ្វើចរាចរណ៍ ឆ្លងកាត់ ខេត្តសៀមរាប យ៉ាង គគ្រឹកគគ្រេង គ្មានឃើញសមត្ថកិច្ច ជំនាញ ពាក់ព័ន្ទ ណាម្នាក់ចេញមុខ សង្ស័យត្រូវថ្នាំសណ្តំអស់ហើយ។
តាមប្រភពពីអ្នកតាមដានបានប្រាប់ថា ជាក់ស្ដែង នៅយប់ថ្ងៃ ទី១៨ ខែមិថុនា ឆ្នាំ២០១៥ មានរថយន្តដឹកជញ្ជូនឈើចំនួន២គ្រឿង របស់ ក្រុមហ៊ុន រតនសម្បត្តិ យ៉ាងអាណាធិបតេយ្យបានដឹកឈើ ចេញពីរភូមិសាស្ត្រ ខេត្តព្រះវិហារ ឆ្លងកាត់តាម ស្រុកស្វាយលើ ចូលមកចែកចាយក្នុងក្រុងសៀមរាប រួចបន្តយកទៅចែកចាយនៅខេត្តបន្ទាយមានជ័យ ដោយ សុវត្ថិភាព ពុំមាន ឃើញសមត្ថកិច្ច ចុះរុះណាចេញ មុខធ្វើការ ត្រួត ពិនិត្យ ទៅលើ រថយន្តដឹកឈើ នោះឡើយ ជាពិសេសជំនាញ រដ្ឋបាល ព្រៃឈើ ស្រុកស្វាយលើតែម្តង។
ប្រភពពីរ សមត្ថកិច្ច មួយរូបសូមមិនបញ្ចេញឈ្មោះបានឲ្យដឹងថា រថយន្តដឹកឈើ ខាងលើ ជាក្រុមហ៊ុន រតន សម្បត្តិ ហើយការ ដឹកជញ្ជូននោះ ក្រុមហ៊ុន បានប្រាប់ មេខាងលើរួចអស់ហើយ ដូច្នេះពួកខ្ញុំបានត្រឹមតែមើលហើយដឹងប៉ុណ្ណោះ ចំពោះឲ្យពួកខ្ញុំទៅឆែកឆេររកច្បាប់ដឹកឈើនោះ មិនហ៊ានទេ ខ្លាចឈរជើងនៅទីនោះមិនជាប់។
ប្រភពដដែលបានបន្តថា ចំពោះឈ្មោះរបស់ឈ្មួញរកស៊ីឈើនោះ ខ្ញុំមិនហ៊ានប្រាប់ទេព្រោះ មេមិនឲ្យប្រាប់ គ្រាន់តែថា គេបានប្រាប់មេរួចហើយ។
ចំណែកមន្ត្រីរដ្ឋបាល ព្រៃឈើ ម្នាក់បានបង្ហើបឲ្យដឹងថា រថយន្ដ យីឌុប ដឹកឈើ ខាងលើ យ៉ាងអាណាធិបតេយ្យជារបស់ក្រុមហ៊ុន រតន សម្បត្តិ បានដឹកឈើ ចេញមកពីរភូមិសាស្ត្រ ខេត្ត ព្រះវិហារ មានចំនួន២គ្រឿង ឆ្លងកាត់តាមស្រុកស្វាយលើ ចូលខេត្ត សៀមរាប ឆ្ពោះ ទៅចែកចាយ នៅ ខេត្តបន្ទាយ មានជ័យ និង ខេត្តបាត់ដំបង។មន្ត្រីដដែលបានបន្តថា ការដឹកជញ្ជូនឈើខាងលើនេះ ពុំមានសមត្ថកិច្ចណាម្នាក់ហ៊ានទៅធ្វើការឃាត់នោះទេ ព្រោះគេមានខ្នងនៅពីក្រោយធំណាស់។
ជុំវិញករណីខាងលើនេះដែរ លោក យ៉ាន់ ស៊ីវ៉ាត់ នាយសង្កាត់រដ្ឋបាលព្រៃឈើស្វាយលើ មិនអាចសុំការពន្យល់បំភ្លឺពីលោកបានទេនៅរសៀលថ្ងៃទី១៨ខែមិថុនាឆ្នាំ២០១៥នេះ ដោយសារទូរស័ព្ទរបស់លោកនៅក្រៅសេវា។ចំណែក លោក ទា គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប ក៏មិនអាចសុំការបំភ្លឺពីករណីក្រុមឈ្មួញដឹកឈើទាំងនោះបានដែរមជ្ឈដ្ឋាននានាបានរិះគន់ថា ក្រុមឈ្មួញរកស៊ីដឹកឈើល្មើសច្បាប់ជាច្រើនគ្រឿងនៅតែបន្តដឹកជារៀងរាល់ថ្ងៃយ៉ាងអាណាធិបតេយ្យចេញពីភូមិសាស្ត្រខេត្តព្រះវិហារ និងខេត្តឧត្តរមានជ័យឆ្លងកាត់តាមស្រុកស្វាយលើចូលមកចែកចាយក្នុងក្រុងសៀមរាប រួចបន្តទៅចែកចាយនៅខេត្តបន្ទាយមានជ័យនិងខេត្តបាត់ដំបងយ៉ាងរំភើយ មិនដែលឃើញមានសមត្ថកិច្ចចំរុះណាម្នាក់ចេញមុខបង្ក្រាបសោះឡើយ ឃើញតែបង្ក្រាបតែអ្នកតូចតាចប៉ុណ្ណោះ ហើយគេចាំមើលថា លោក អភិបាលខេត្តមានចំណាត់ការទៅលើជនខិលខូចមួយចំនួន តូចដែរឬយ៉ាងណា៕ ដោយ ស៊ាន សុផាត
