សៀមរាប៖ ដើម្បីធ្វើឲ្យក្រុងប្រវត្តិសាស្ត្រសៀមរាបកាន់តែមានសោភណ្ឌស្រស់ត្រកាលថែមទៀត ក្នុងការទាក់ទាញនូវ អារម្មណ៍នៃភ្ញៀវទេសចរណ៍ជាតិ អន្តរជាតិ ចូលមកទស្សនាកម្សាន្ត។ នៅព្រឹកថ្ងៃទី ២៥ ខែ មិថុនា ឆ្នាំ២០១៥នេះ លោកឃឹម ប៊ុនសុង អភិបាលនៃគណៈអភិបាលខេត្ត បានដឹកនាំប្រតិភូខេត្ត និង នាយកអាកាសយានដ្ឋានអន្តរ ជាតិសៀមរាប ចុះត្រួតពិនិត្យ និង កំណត់ទីកន្លែង ក្នុងការដាំដើមផ្កានៅអមតាមដងផ្លូវភ្លោះ ពីផ្លូវនៃរង្វង់មូលជ័យ វរ្ម័ន្តទី៧ មុខវិទ្យាល័យសម្តេចឳ ទៅអាកាសយានដ្ឋានអន្តរជាតិសៀមរាប ។
តាមការបញ្ជាក់របស់លោក ឃឹម ប៊ុនសុង បានឲ្យដឹងថា ការរៀបចំដាំផ្កាលំអ នៅតាមចិញ្ចើមផ្លូវភ្លោះ ពីផ្លូវរង្វង់មូលជ័យវរ្ម័ន្តទី៧មុខវិទ្យាល័យសម្តេចឳទៅអាកាសយានដ្ឋានអន្តរជាតិសៀមរាប ជាគម្រោងក្នុងការចូលរួម របស់នាយកអាកាសយានដ្ឋានអន្តរជាតិសៀមរាប ដើម្បីចូលរួមក្នុងការអភិវឌ្ឍន៍ក្រុងសៀមរាប ឲ្យកាន់តែមានភាព ស្រស់ត្រកាលឡើង ក្នុងការទទួលស្វាគមន៍ភ្ញៀវជាតិ អន្តរជាតិ និង គណៈប្រតិភូជាន់ខ្ពស់ជាតិ អន្តរជាតិផងដែរ ។ ឯកឧត្តមក៏បានឲ្យដឹងទៀតថា ប្រភេទដើមផ្កាដែលត្រូវយកមកធ្វើការដាំ នៅតាមចិញ្ចើមផ្លូវភ្លោះទាំងសង្ខាងនេះ គឺ ផ្កាចំបីពណ៌ស ដោយបានកំណត់ចន្លោះពីដើមផ្កាមួយ ទៅដើមផ្កាមួយទៀត
ប្រវែង ៨ម៉ែត្រ ព្រមទាំងទុកចញ្ចើមឲ្យ សម្រាប់ដើរផងដែរ ។ ក្នុងនោះឯកឧត្តមក៏បានធ្វើការណែនាំដល់អាជ្ញាធរក្រុង និង មន្ទីរសាធារណៈការ ត្រូវធ្វើកិច្ច សហការជាមួយ អាកាសយានដ្ឋានអន្តរជាតិសៀមរាប ក្នុងការកំណត់ចំណុចត្រូវដាំ ដោយធ្វើយ៉ាងណាកុំធ្វើឲ្យប៉ះ ពាល់ដល់ប្រជាពលរដ្ឋ ដែលមានលំនៅដ្ឋានអមតាមដងផ្លូវភ្លោះនេះផងដែរ ។ ម្យ៉ាងទៀតក្រោយពេលដែលធ្វើការ ដាំផ្កាបានរួចរាល់ហើយនោះ អាជ្ញាធរក្រុង និង មន្ទីរសាធារណការត្រូវធ្វើការថែទាំឲ្យបានជាប្រចាំ ទាំងការធ្វើ អនាម័យ ទាំងការថែបំប៉នផងដែរ ។ ក្នុងនោះដែរលោក ឃឹមប៊ុនសុងក៏បានថ្លែងអំណរគុណដល់ នាយកអាកាស យានដ្ឋានអន្តរជាតិសៀមរាប ដែលបានចូលរួមក្នុងដាំផ្កាលម្អនៅតាមដងផ្លូវសាធារណៈក្នុងក្រុង នេះក៏សបញ្ជាក់ ឲ្យកាន់តែច្បាស់ អំពីស្មារតីក្នុងការយកចិត្តទុកដាក់ពីវិស័យឯកជន ក្រោយពេលដែលក្រុងសៀមរាបបានជាប់ ចំណាត់ថ្នាក់លេខ១នៅតំបន់អាស៊ីចំណាត់ថ្នាក់លេខ២លើពិភពលោក ក្នុងការវាយតម្លៃទីក្រុងទាក់ទាញភ្ញៀវទេសចរណ៍នៅឆ្នាំ២០១៥នេះហើយកាយវិការទាំងនេះក៏ជាគំរូដ៏ល្អ សម្រាប់បណ្តាក្រុមហ៊ុន និង វិស័យឯកជនដទៃផ្សេងៗទៀត ដែលមានបំណងក្នុងការចូលរួមអភិវឌ្ឍន៍ក្រុងសៀមរាប ទៅតាមលទ្ធភាពដែលអាចធ្វើបានក្នុងការរួបរួមគ្នាអភិវឌ្ឍន៍ក្រុងប្រវត្តិសាស្ត្រ ក្នុងការទាក់ទាញនូវអារម្មណ៍ភ្ញៀវទេសចរឲ្យចូលមកទស្សនាកម្សាន្តក៏ជា ការជួយនូវប្រាក់ចំណូលប្រចាំថ្ងៃរបស់ប្រជាជនខេត្តសៀមរាប ក៏ដូចប្រជាជនកម្ពុជាទាំងមូលផងដែរ ៕
