ខេត្តប៉ៃលិន៖ កាលពីថ្ងៃទី២៤ ខែមិថុនា ឆ្នាំ២០១៥ លោក កើត សុធា អភិបាលនៃគណៈអភិបាលខេត្តប៉ៃលិន អមដំណើរដោយប្រធាន អនុប្រធានមន្ទីរ អង្គភាពស្ថាប័នជំនាញ ក្នុងខេត្ត បានរអញ្ជើញចុះពិនិត្យការផលិតទឹកស្អាត របស់ក្រុមហ៊ុនថូម៉ាស់ ដោយសុំឲ្យក្រុមហ៊ុន
ផ្គត់ផ្គង់ទឹកស្អាតយកចិត្តទុកដាក់ក្នុងការផលិតទឹកស្អាត ព្រោះវាជាតំរូវការរបស់ប្រជាពលរដ្ឋ ។ ការចុះពិនិត្យនេះមានទីតាំងស្ថិតក្នុងខ្លុង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
លោក ថូ ចំរើន តំណាងក្រុមហ៊ុនថូម៉ាស់ផ្គត់ផ្គង់ទឹកស្អាតបានឲ្យដឹងថាៈបច្ចុប្បន្ននេះក្រុមហ៊ុនផ្គត់ផ្គង់ទឹកស្អាត បានផ្គត់ផ្គង់ទឹកស្អាតជូនដល់ប្រជាពលរដ្ឋក្នុងក្រុងប៉ៃលិន មានចំនួន២០០០គ្រួសារ ហើយនិងកំពុងតបណ្តាញទឹក តាមតម្រូវការរបស់ប្រជាពលរដ្ឋ ។ លោកបន្តថាៈក្រុមហ៊ុន មានប្រព័ន្ធចម្រោះទឹកស្អាតត្រឹមត្រូវតាមលក្ខណៈបច្ចេកទេស ដោយមានអាងចម្រោះចំនួន២អាងមានទំហំ១០x៩ម៉ែត្រ និង១ទៀតទំហំ៧x៧ម៉ែត្រ និងអាងស្តុបទឹកស្អាតចំនួន៨អាង និងមានម៉ាស៊ីនបូមទឹកចំនួន៤គ្រឿង។លោកថាៈក្រុមហ៊ុនកំពុងបន្តកសាងអាងស្តុបទឹកចំនួន២ទៀតដែលមានទំហំ៣២x១២ម៉ែត្រអាងនិមួយអាចស្តុបទឹកបានចំនួន១២៥ម៉ែត្រគូប។
ក្នុងការចុះពិនិត្យនេះដែរ លោក កើត សុធា អភិបាលនៃគណៈអភិបាលខេត្តប៉ៃលិនបានមានប្រសាសន៍ថាៈ ទឹកវាមានសារៈសំខាន់ណាស់ ព្រោះថាមនុស្សយើងត្រូវការប្រើប្រាស់ទឹកជាប្រចាំមិនអាចខ្វះបានឡើយ។ដូច្នេះសុំឲ្យក្រុមហ៊ុនត្រូវយកចិត្តទុកដាក់ផលិតទឹកស្អាតឲ្យបានប្រើប្រាស់គ្រប់គ្រាន់និងមានអនាម័យល្អ គុណភាពស្តង់ដាកំណត់ដោយក្រសួងឧស្សាហកម្ម និងសប្បកម្ម ដើម្បីធានាការពារ សុខមាលភាពជូនដល់ប្រជាពលរដ្ឋប្រើប្រាស់។ លោកមានប្រសាសន៍បន្តថាៈ ទន្ទឹមនេះក្រុមហ៊ុនត្រូវត្រៀមលក្ខណៈផលិតទឹកស្អាតឲ្យបានច្រើន ព្រោះថានៅពេលខាងមុខវាអាចខ្វះទឹកប្រើប្រាស់ ខណៈដែលប្រជាពលរដ្ឋខេត្តប៉ៃលិន មានការប្រើប្រាស់ទឹកកាន់តែកើនឡើង ៕
