ខេត្តតាកែវ ៖ នៅរសៀលថ្ងៃទី២៥ ខែមិថុនា ឆ្នាំ២០១៥ វេលាម៉ោង១៤ និង ៣០នាទី កម្លាំងអន្តរាគមន៍ នៃស្នងការដ្ឋាននគរបាលខេត្តតាកែវ សហការជាមួយកម្លាំងអធិការដ្ឋាននគរបាលក្រុងដូនកែវ បានធ្វើការឃាត់ខ្លួនជនសង្ស័យម្នាក់និងនាំមកកាន់ស្នងការដ្ឋាននគរបាលខេត្ត
តាកែវដើម្បីសាកសួរ ក្រោយពេលជនសង្ស័យខាងលើបានធ្វើសកម្មភាពចាប់ក្មេងស្រីអាយុ១ឆ្នាំម្នាក់គំរាមសម្លាប់ដោយយកបំណែកកញ្ចក់មកផ្ជង់ពីលើក្បាល ។ តាមរបាយការណ៍របស់កម្លាំងជំនាញ បានឲ្យដឹងថា នៅវេលាម៉ោង១២ និង១៥នាទីនាថ្ងៃ២៥ខែមិថុនានេះ ក្រោយពីទទួលបានព័ត៌មានថា មានជនមិនស្គាល់អត្តសញ្ញាណម្នាក់បានចាប់ក្មេងស្រីគំរាមសម្លាប់នៅចំណុចប្រឡាយទឹក ស្ថិតក្នុងភូមិ២ សង្កាត់រកាក្នុង ក្រុងដូនកែវ ភ្លាមៗនោះ កម្លាំង អន្តរាគមន៍ នៃស្នងការដ្ឋាននគរបាលខេត្ត បានសហការជាមួយកម្លាំង អធិការដ្ឋានក្រុងដូនកែវ ចុះទៅដល់កន្លែងកើតហេតុ ហើយបានធ្វើអន្តរាគមន៍ជួយសង្គ្រោះក្មេងស្រីរងគ្រោះបានដោយសុវត្ថិភាពនៅវេលាម៉ោង១៤ និង៣០នាទី និងបានឃាត់ខ្លួនជនសង្ស័យឈ្មោះ ថន រតនា ភេទប្រុស អាយុ១៥ឆ្នាំ មានស្រុកកំណើត ភូមិវិហារចិន ឃុំស្វាយដង្គុំ ស្រុកសៀមរាប ខេត្តសៀមរាប ។
តាមចម្លើយសារភាពរបស់ជនសង្ស័យ កម្លាំងសមត្ថកិច្ចបានធ្វើការសន្និដ្ឋានថា ជនសង្ស័យខាងលើជាមនុស្សញៀនថ្នាំ ទើបបណ្តាល ឲ្យមានអារម្មណ៍រវើរវាយភ័យខ្លាចរហូតឈានដល់ការប្រព្រឹត្តអំពើចាប់ក្មេងស្រីជនរងគ្រោះខាងលើតែម្តង ។
បច្ចុប្បន្ន ជនសង្ស័យឈ្មោះ ថន រតនា ត្រូវបានកម្លាំងជំនាញកំពុងធ្វើការ សាកសួរ និងកសាងសំណុំរឿង ដើម្បីចាត់ការតាមនិតិវិធី ៕
