សៀមរាប ៖ នេះគឺជាលើកទី៤ហើយ ដែលការអបអរសាទរចំពោះទិវាអន្តជាតិប្រយុទ្ធប្រឆាំងគ្រឿងញៀន បានធ្វើឡើងនៅខេត្តសៀមរាប ។ សារលិខិត សម្តេចអគ្គមហាសេនាបតីតេជោ ហ៊ុន សែន ដែលបានផ្ញើជូនពលរដ្ឋកម្ពុជា ជនរួមជាតិ ក្មួយៗយុវជន សិស្សានុសិស្ស ដោយ
បញ្ជាក់ថា ស្មារតីនៃមហាសន្និបាតអង្គការសហប្រជាជាតិឆ្នាំ១៩៨៧ បានកំណត់យកថ្ងៃទី២៦ ខែមុថុនា ជាថ្ងៃប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនជារៀងរាល់ឆ្នាំ ហើយកម្ពុជាតែងតែបានប្រារព្ធទិវានេះជាប់ជាប្រចាំឆ្នាំផងដែរ ! សម្រាប់ឆ្នាំ២០១៥នេះ ទិវានេះ ត្រូវបានប្រារព្ធឡើង ក្រោមប្រធានបទ ( ចូរធ្វើឲ្យជីវិត – សហគមន៍ និង អត្តសញ្ញាណយើង គ្មានគ្រឿងញៀន )ហើយពិធីទិវានេះបានប្រារព្ធធ្វើទ្បើងនៅបរិវេណជាប់និងសួនច្បារព្រះរាជដំណាក់ ដែលមានកងកំលាំងនិងប្រជាពលរដ្ឋចូលរួមជាង៣០០០នាក់។
លោកឃឹម ប៊ុនសុង អភិបាលខេត្ត និងជាប្រធានគណកម្មាធិការត្រួតពិនិត្យគ្រឿងញៀនខេត្តសៀមរាប បានរាយការណ៍អំពីលទ្ធផលនៃការទប់ស្កាត់ និងការបង្ក្រាបគ្រឿងញៀន ក្នុងឆមាសទី១ ឆ្នាំ២០១៥នេះ របស់គណកម្មាធិការត្រួតពិនិត្យគ្រឿងញៀន និងមន្ត្រីអនុវត្តច្បាប់
គ្រប់ប្រភេទ ក្នុងនោះមានចំនួនសារុប ១១២ករណី ឃាត់ខ្លួនជនសង្ស័យបានចំនួន ២៨២នាក់ ប្រមូលវត្ថុតាងបានរួមមាន ប្រភេទថ្នាំមេតំហ្វេតាមីន កេតាមីន កូកាអ៊ីន ថ្នាំគ្រាប់ WY និងមានកញ្ឆាក្រៀមផងដែរ ។នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន មានប្រសាសន៍ថា ៖ ការប្រារព្ធឡើងនូវទិវានេះ គឺស្ថិតក្នុងបំណងបំផុសស្មារតី និងអំពាវនាវឲ្យជនគ្រប់រូប យកចិត្តទុកដាក់ និង ចូលរួមឲ្យបានកាន់តែសកម្មថែមទៀត ក្នុងគ្រប់សកម្មភាព ដែលគាំទ្រដល់ការងារប្រយុទ្ធប្រឆាំងគ្រឿងញៀន ពីព្រោះថា បើគ្មានការចូលរួមពីសំណាក់មហាជនគ្រប់រូបនោះទេ ការដោះស្រាយបញ្ហាគ្រឿងញៀននេះ ពិតជាមានភាពស្មុគស្មាញ និងពិបាកឈានទៅរក ការលុបបំបាត់ ជាក់ជាមិនខាន ។
ជាមួយគ្នានេះដែរ លោកបានប្រើប្រាស់វេទិកានៃទិវាអន្តរជាតិប្រយុទ្ធប្រឆាំងគ្រឿងញៀន ផ្ញើសារទៅកាន់បងប្អូនពលរដ្ឋ និងក្មួយៗដែលបាននឹងកំពុងប៉ះពាល់គ្រឿងញៀន ត្រូវព្យាយាមខិតខំបញ្ឈប់ការប្រើប្រាស់ជាបន្ទាន់ បើទោះជាបញ្ឈប់នោះមានការលំបាកយ៉ាងណាដោយ ហើយត្រូវហ៊ាននិយាយប្រាប់មិត្តភក្តិ បងប្អូន ឱពុកម្តាយ ដើម្បីទទួលបានការលើកទឹកចិត្ត និងគាំទ្រក្នុងការផ្តាច់គ្រឿងញៀន ។ ជាមួយនឹងការផ្ញើសារនេះ ឯកឧត្តម ក៏បានផ្ញើអនុសាសន៍បន្ថែមថា ៖ គ្មាននរណា អាចដោះស្រាយបញ្ហាគ្រឿងញៀន ដែលក្មួយៗបានប៉ះពាល់នោះ ប្រសើជាងការបោះបង់ចោលដោយខ្លួនក្មួយៗ ផ្ទាល់នោះទេ ។គួរបញ្ជាក់ដែរថា នៅក្នុងទិវាអបអរសាទរចំពោះទិវានេះ សាលាដំបូងខេត្តសៀមរាប បានបញ្ជូនគ្រឿងញៀន ដែលទាក់ទងទៅនឹងសំណុំរឿងគ្រឿងញៀនចំនួន ៣០៦រឿង ដែលសាលាដំបូងខេត្តសៀមរាប បានចាត់ការជាសមត្ថកិច្ច និងបានចេញសាលក្រមនិងដីកាសម្រេចរឹបអូស ដើម្បីដុតបំផ្លាញចោល ។ គ្រឿងញៀនទាំងនោះរួមមាន ៖ ថ្នាំញៀនប្រភេទយ៉ាម៉ា ៦ ៣១៥គ្រាប់ , ម៉ាទឹក កក ៥៩១កញ្ចប់ និង ជាង ៣ គក្រ កូកាអ៊ីន ជាង ១១គក្រ , ហេរ៉ូអ៊ីន ចំនួន ១១ កញ្ចប់ , កញ្ឆាក្រៀម ១១ កញ្ចប់ , កញ្ឆាគ្រាប់ ២កញ្ចប់ ម្សៅពណ៌ស្ករ ១ បំពង់បឺត និង ថ្នាំញៀនប្រភេទម្សៅពណ៌ផ្កាឈូក ចំនួន ២ ថង់ ៕
