ខេត្តប៉ៃលិន៖ ស្រី្តម្នាក់ បានស្លាប់យ៉ាងអាណោចអធ័ម ខណៈពេលរូបគាត់ មកពីផឹកស្រាស្រវឹងជោគជាំ រកផ្លូវចូលផ្ទះមិនឃើញ ក៏ឡើងលើរបងព័ទ្ធជុំវិញផ្ទះ រួចក៏ធ្លាក់មកជុងនិងចំរឹងខាងក្រោម កាលពីវេលាម៉ោង ១៩ និង៤០ នាទីយប់ ថ្ងៃទី២៦ ខែមិថុនា ឆ្នាំ២០១៥ ស្ថិតក្នុងភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ស្ត្រីដែលស្លាប់ជុងនិងចំរឹងដែកមានឈ្មោះ ឆឹម ម៉ៅ អាយុ ៣៩ឆ្នាំ (ពុំមានសាច់ញាតិ) មានមុខរបរស៊ីឈ្នួលគេ រស់នៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីកន្លែងកើតហេតុ បានឲ្យដឹងថា៖ មុនពេលកើតហេតុគេឃើញស្ត្រីរងគ្រោះ មកពីស៊ីឈ្នូលគេ ហើយក៏ទៅហូបស្រា ជារៀងរាលថ្ងៃ ដោយរស់តែម្នាក់ឯង ។ ប្រភពបន្តថា៖ នៅពេលកើតហេតុមិនដឹងជាស្ត្រីរងគ្រោះមកពីផឹកនៅទីណានោះទេ បានជារកផ្លូវចូលផ្ទះមិនឃើញ បែរជាឡើងលើរបង រួចក៏ធ្លាក់មកលើចំរឹងដែកស្លាប់យ៉ាងអាណោចអធ័ម ,បន្ទាប់មកពួកគាត់ក៏រាយការប្រាប់សមត្ថកិច្ចឲ្យដឹងផងដែរ ។
តាមការឲ្យដឹងពីសមត្ថកិច្ចជំនាញ នៃស្នងការនគរបាលខេត្ត បានឲ្យដឹងថា៖ ស្ត្រីរងគ្រោះឈ្មោះ ឆឹម ម៉ៅ អាយុ ៣៩ឆ្នាំ រស់តែម្នាក់ឯង ពិតជាបានស្លាប់ ដោយសារធ្លាក់ពីលើរបងផ្ទះពិតមែន ។ បច្ចុប្បន្នសពស្ត្រីរងគ្រោះត្រូវបានសមត្ថកិច្ចប្រគល់អោយសាច់ញាតិបងប្អូនជិតខាងធ្វើបុណ្យតាមប្រពៃណី៕ 
