(ខេត្តព្រៃវែង)៖ បច្ចុប្បន្នរថយន្តក្រុងដឹកភ្ញៀវពីប្រទេសកម្ពុជាទៅកាន់ប្រទេសវៀតណាមតាមផ្លូវជាតិលេខ១ មានជាច្រើនក្រុមហ៊ុន ហើយចរាចរមិនដាច់ទាំងយប់ទាំងថ្ងៃ បើកបរក្នុងល្បឿនលឿនមិនគោរពច្បាប់ចរាចរ វ៉ាប្រជែងទោះបីកន្លែង ចង្អៀត រឺទីប្រជុំជនក៏ដោយ
រថយន្តទាំងអស់នោះមិនបានបន្ថយល្បឿនធ្វើយ៉ាងណាអោយទៅដល់គោលដៅមុនម៉ោង ដែលក្រុមហ៊ុនបានកំណត់មិនគិតពីផលប៉ះពាល់ដល់អ្នកធ្វើដំណើរនោះទេ ។
ប្រជាពលរដ្ឋរស់នៅតាមបណ្តោយផ្លូវជាតិលេខ ១ បានលើកឡើងទៀតថា ពួកគាត់មានការព្រួយបារម្មណ៍យ៉ាងខ្លាំងខណៈពលេរថយន្តក្រុងដែលកំពុងធ្វើចរាចររាល់ថ្ងៃមានកំណើនកាន់តែច្រើន ហើយបើកហួសល្បឿនកំណត់ វ៉ាប្រជែងមិនគោរពច្បាប់ចរាចរ ។ ពួកគាត់បានបន្តទៀតថា ពេលរថយន្តក្រុងបើកបរមកដល់ ហើយវ៉ាកាត់ម្តងៗគាត់ភ័យលោះប្រលឹង ញាក់សាច់ទ្រីតៗ ខំជៀសស្ទើរធ្លាក់ចិញ្ចើមផ្លូវទៅហើយ នៅតែស្រុបខ្យល់រថយន្តក្រុងស្ទើរដួលម៉ូតូ ព្រោះ រថយន្តក្រុងទាំងនោះបើកបរក្នុងល្បឿនលឿនខ្លាំងណាស់ ។
ប្រជាពលរដ្ឋសំណូមពរដល់ស្ថាប័នពាក់ព័ន្ធ ជាពិសេសប៉ូលីសចរាចរមានវិធានការទប់ស្កាត់ និងធ្វើការផាកពិន័យ ម៉ឺងម៉ាត់ ធ្វើយ៉ាងណាកុំអោយរថយន្តក្រុងបើកបរហួសល្បឿនកំណត់មិនគោរពច្បាប់ចរាចរបែបនេះ ព្រោះបច្ចុប្បន្នគ្រោះថ្នាក់ចរាចរកំពុងកើតមានខ្ពស់គួរអោយព្រួយបារម្មណ៍ ។
លោក ម៉ៅ សាម៉េត នាយការិយាល័យចរាចរផ្លូវគោកនៃស្នងការដ្ឋាននគរបាលខេត្តព្រៃវែងបានប្រាប់កម្ពុជាថ្មីអោយដឹងថា ដោយមានបទបញ្ជាពីលោកស្នងការ លោកបានដឹងនាំកំលាំងចុះរៀបចំសណ្តាប់ធ្នាប់ វាស់ល្បឿនរថយន្ត និងធ្វើការផាកពិន័យ យ៉ាងម៉ឺងម៉ាត់ទៅតាមច្បាប់ចរាចរផ្លូវគោកដែលបានកំណត់ ៕
