សៀមរាប៖ បណ្តាញអ្នករស់នៅជាមួយមេរោគអេដស៍ប្រចាំតំបន់ក្នុងព្រះរាជាណាចក្រកម្ពុជា ក្នុងនោះរួមមានមកពីខេត្តសៀមរាប កំពង់ធំ ព្រះវិហារ ឧត្តរមានជ័យ និងខេត្តបន្ទាយមានជ័យ រួមជាមួយនឹងក្រុមការងារនៅតាមកន្លែងផ្តល់សេវាថ្នាំពន្យា ឬថ្នាំប្រឆាំងជម្ងឺអេដស៍ក្នុងបណ្តា
ខេត្តទាំង៥ខាងលើ ព្រមទាំងមានការចូលរួមផងដែរ ពីសំណាក់បណ្តាអង្គការជាដៃគូពាក់ព័ន្ធ បានជួបប្រជុំគ្នានៅក្រុងសៀមរាប នាថ្ងៃទី២៦ ខែមិថុនានេះ ដើម្បីពង្រឹងការទំនាក់ទំនង កិច្ចហការជាមួយគ្នាបន្តទៀត ក្រោមការសម្របសម្រួល ដោយមន្ត្រីមកពីស្ថាប័នបណ្តាញអ្នករស់នៅជាមួយមេរោគអេដស៍ថ្នាក់ជាតិ ផងដែរ ។
ក្នុងជំនួបនេះ គឺបានពិភាគ្សារួមគ្នា លើយន្តការនៃការសម្របសម្រួល ការបង្កើនកិច្ចសហការ រវាងបណ្តាញអ្នករស់នៅជាមួយមេរោគអេដស៍ និងមន្ទីរពេទ្យបង្អែក ជាមួយស្ថាប័ន អង្គការជាគូពាក់ព័ន្ធ ក្នុងការផ្តល់សេវាថែទាំសុខភាព សម្រាប់អ្នករស់នៅជាមួយមេរោគអេដស៍ ប្រកបដោយប្រសិទ្ធិភាព ហើយការពិភាគ្សាគ្នានេះ ក៏បានពិគ្រោះយោបល់គ្នាផងដែរ អំពីបញ្ហាប្រឈមនានា នៃការមកទទួលយកសេវាសុខភាពរបស់អ្នករស់នៅជាមួយមេរោគអេដស៍ និងក្រុមប្រឈមខ្ពស់ ។
នៅក្នុងកិច្ចប្រជុំនេះដែរ ក៏បានបញ្ចេញនូវក្តីព្រួយបារម្ភ អំពីតួនាទីសំខាន់ៗរបស់អង្គការសហគមន៍ ដើម្បីឆ្លើយតបបញ្ហាអេដស៍ ក្នុងបរិបទដែលមានការខ្វះខាតថវិកា ពីម្ចាស់ជំនួយ ។ ក៏ប៉ុន្តែ បើទោះជាយ៉ាងណា កិច្ចប្រជុំនេះ បានតំកល់ទុកនូវតួនាទីរបស់បណ្តាញអ្នករស់នៅជាមួយមេរោគអេដស៍ និង ស្ថាប័នពាក់ព័ន្ធ – អង្គការជាដៃគូ ជាសហភាគីជាមួយក្រសួងសុខាភិបាល ឆ្លើយតបទៅនឹងយុទ្ធសាស្ត្រសូន្យបី គឺ គ្មានការចម្លងថ្មីនៃមេរោគអេដស៍ គ្មានការស្លាប់ដោយជម្ងឺអេដស៍ និងគ្មានការរើសអើងចំពោះអ្នករស់នៅជាមួយមេរោគអេដស៍ ៕
