រាជធានីភ្នំពេញ ៖ រថយន្តសណ្ដោងកុងតឺន័រមួយគ្រឿងបានធ្វើដំណើរយ៉ាងលឿន ខណៈមកដល់ផ្លូវកោងក៏បួងចង្កូតជ្រុលបណ្ដាលអោយក្រឡាប់ បោកប៉ះរថយន្តហ៊ីយ៉ាន់ដាយមួយគ្រឿងដែលចតទុកនៅមុខផ្ទះ និងបង្គោលស្លាកយីហោមួយចំនួនបាក់រងការខូចខាត សំណាងល្អគ្មានមនុស្សគ្រោះថ្នាក់ដែលហេតុការណ៍នេះបានកើតឡើងកាលពីវេលាម៉ោង ១និង១៥នាទីរំលងអាធ្រាត្រ ឈានចូលថ្ងៃទី ២១ខែមេសាឆ្នាំ២០១៤ នៅតាមបណ្ដោយផ្លូវ២៧១កែងផ្លូវ១៨២ ស្ថិតក្នុងសង្កាត់ទឹកល្អក់២ ខណ្ឌទួលគោក ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានរថយន្តសណ្ដោងកុងតឺន័រមួយគ្រឿង ពណ៌ស ពាក់ស្លាកលេខ ភ្នំពេញ 3C-2606បើកបរដោយបុរសម្នាក់ធ្វើដំណើរតាមផ្លូវជាតិលេខ២៧១ ក្នុងទិសដៅពីកើតទៅលិចក្នុងល្បឿនលឿនខណៈមកដល់ចំណុចផ្លូវកោងកែងផ្លូវ១៨២ រថយន្តសណ្ដោងកុងតឺន័រក៏បួងចង្កូតជ្រុលបណ្ដាលអោយ
ក្រឡាប់បះជើងទៅចំហៀង បោកប៉ះចំគូថរថយន្តមួយគ្រឿងម៉ាកហ៊ីយ៉ាន់ដាយមួយគ្រឿង ពណ៌សំបកឪឡឹក ពាក់ស្លាកលេខ ភ្នំពេញ 2A-7554បណ្តាលឱ្យរថយន្តហ៊ីយ៉ាន់ដាយរងការខូចខាតផ្នែកខាងក្រោយនិងបាក់បង្គោលស្លាកយីហោមួយចំនួន សំណាងល្អគ្មានមនុស្សរងគ្រោះថ្នាក់។
ក្រោយពេលកើតហេតុ តៃកុងរថយន្តកុងតឺន័ររត់គេចខ្លួនបាត់ ហើយប៉ូលិសចរាចរណ៍បាន ចុះមកពិនិត្យនិងហៅរថយន្តស្ទូចមកស្ទូចរថយន្តនេះចេញពីផ្លូវឱ្យបាន មុនមេឃភ្លឺដើម្បីកុំឱ្យមានការកកស្ទះចរាចរ៕
