ខេត្តប៉ៃលិន៖ ជនសង្ស័យម្នាក់ត្រូវបាន កម្លាំងអធិការនគរបាលស្រុកសាលាក្រៅ សហការជាមួយកម្លាំងនគរបាលបុស្តិ៍ស្ទឹងត្រង់ ធ្វើការបង្ក្រាប និងឃាត់ខ្លូនកាលពីវេលាម៉ោង ១៦ និង១៥នាទីរសៀល ថ្ងៃទី២៨ ខែមិថុនា ឆ្នាំ២០១៥ ពាក់ព័ន្ធការរក្សាទុក និងចែកចាយនូវសារធាតុញៀន ព្រមទាំងរិបអូសថ្នាំញៀនប្រភេទម៉ាទឹកកកចំនួន ០៩កញ្ចប់តូច ស្ថិតក្នុងចំនុចភូមិដីស ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ជនសង្ស័យដែលកម្លាំងសមត្ថកិច្ចឃាត់ខ្លូនឈ្មោះ រី សុផាត ភេទប្រុស អាយុ ៣៣ឆ្នាំ ជាកសិករ មានស្រុកកំណើតភូមិសង្ហា ឃុំសង្ហា ស្រុករតនៈមណ្ឌល ខេត្តបាត់ដំបង សព្វថ្ងៃមានទីលំនៅភូមិដីសថ្មី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
លោក ឡោ ពុធ នាយរងផ្នែកព្រហ្មទណ្ឌ នៃអធិការនគរបាលស្រុកសាលាក្រៅ បានឲ្យអ្នកយកព័ត៌មានដឹងថា៖ ក្រោមការដឹកនាំនឹងបញ្ជារផ្ទាល់ពីលោក ញឹក ថុល អធិការនគរបាលស្រុកសាលាក្រៅ កម្លាំងសមត្ថកិច្ចស្រុក សហការជាមួយកម្លាំងនគរបាលបុស្តិ៍ស្ទឹងត្រង់ និងដោយមានសេចក្តីរាយការពីបណ្តាញផង កម្លាំងរបស់លោក បានចុះបង្ក្រាបនឹងចាប់បានជនសង្ស័យជួញដូរគ្រឿងញៀនចំនួន ០១នាក់ នៅចំណុចភូមិដីស ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដោយរកឃើញថ្នាំញៀនប្រភេទម៉ាទឹកកកចំនួន ០៩ កព្ចាប់តូច ។ លោកបន្តថា៖ ដោយមានការសង្ស័យ លោកក៏សុំការអនុញាតិពីលោកអធិការស្រុក និងសុំយោបល់ពី
ព្រះរាជាអាជ្ញាអមសាលាដំបូងខេត្តប៉ៃលិន ធ្វើការឆែកឆេរផ្ទះជនសង្ស័យ តែរកពុំឃើញមានប្រភេទថ្នាំញៀនអ្វីនោះទេ ។ លោកបន្តទៀតថា៖ ជនសង្ស័យមាន ឈ្មោះ រី សុផាត ភេទប្រុស អាយុ ៣៣ឆ្នាំ មានទីលំនៅភូមិដីសថ្មី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន រួមនិងគ្រឿងញៀន ម៉ាទឹកកកចំនួន ០៩ កព្ចាប់តូច ទើបមកនៅក្នុងភូមិកើតហេតុបានប្រហែល ១ខែ ។
បច្ចុប្បន្ន ជនសង្ស័យ និងវត្ថុតាង ត្រូវបានសមត្ថកិច្ចកសាងសំណុំរឿង បញ្ចូនទៅថ្នាក់លើ ដើម្បីចាត់ការបន្តទៅតាមនិតិវិធីច្បាប់៕ អត្ថបទ សេង សុវណ្ណារិទ្ធ
