ខេត្តកំពង់ឆ្នាំង៖ លោក ញ៉ែម សាវ៉ាត អនុប្រធានមន្ទីរអប់រំយុវជន និងកីឡាខេត្តបានមានប្រសាសន៍បែបនេះនៅក្នុងពិធីសច្ចាប្រណិធាន និងបំពាក់កន្សែងកាយរិទ្ធជាតិកម្ពុជាដល់ក្មួយៗសិស្សានុសិស្សមកពី៤សាលាបឋមសិក្សានៅក្នុងក្រុងកំពង់ឆ្នាំង សរុបចំនួន៦៥២នាក់
ដោយមានការចូលរួមពីរៀមច្បងកាយរិទ្ធិជាតិកម្ពុជា និងលោកគ្រូអ្នកគ្រូផងដែរ។ពិធីនេះបានធ្វើឡើងក្នុងសាលាបឋមសិក្សាគំរូក្រុង នៅព្រឹកថ្ងៃទី៣០ ខែមិថុនា ឆ្នាំ២០១៥។
នៅក្នុងពិធីសច្ចាប្រណិធាន និងបំពាក់កន្សែងកាយរិទ្ធិជាតិកម្ពុជា លោក ញ៉ែម សាវ៉ាត បានធ្វើការផ្តាំផ្ញើដល់ក្មួយៗជាកាយរិទ្ធិជាតិកម្ពុជាទាំងអស់ថា៖កុមារកាយរិទ្ធិជាតិកម្ពុជា គឺជាធនធានមនុស្សវ័យក្មេងដ៍សំខាន់ នៅពេលអនាគតរបស់កម្ពុជា។ការបង្កើតកំលាំងកាយរិទ្ធិជាតិកម្ពុជា គឺជាការចាំបាច់មិនអាចខ្វះបាន សម្រាប់ការអប់រំទាំងក្នុង និងក្រៅប្រព័ន្ធ ដើម្បីអភិវឌ្ឍន៍កុមារ និងយុវជន មានសក្តានុពលភាពពេញលេញទាំងផ្លូវកាយ ផ្លូវចិត្ត បញ្ញា ស្មារតី មានការទទួលខុសត្រូវខ្ពស់ចំពោះខ្លួនឯង និងសង្គមជាតិ ក្លាយជាពលរដ្ឋល្អ ចេះរួមរស់នៅជាមួយគ្នាដោយភាពសុខដុមរម្យនា ប្រកបដោយសុខសន្តិភាព ឯកភាពជាតិ ក្នុងសហគមន៍ជាតិ និងអន្តរជាតិទាំងមូល។
លោកបានបន្តថា៖ ការអប់រំបានធ្វើឡើងតាមគ្រប់រូបភាព ដែលជាតួនាទីយ៉ាងសំខាន់របស់ក្រសួងអប់រំយុវជន និងកីឡា ជាចក្ខុវិស័យ ជាអាទិភាពរបស់រាជរដ្ឋាភិបាលក្នុងការកសាងធនធានមនុស្ស ដែលជាបញ្ហាគន្លឹះនែការអភិវឌ្ឍន៍របស់មនុស្សម្នាក់ៗផង និងការអភិវឌ្ឍន៍សហគមន៍ទាំងមូលផង ព្រោះកុមារគឺជាធនធានមនុស្សដ៍សំខាន់បំផុតសម្រាប់ការអភិវឌ្ឍន៍ប្រទេសជាតិ និងជាភ្នាក់ងារសម្រាប់ការផ្លាស់ប្តូរសង្គមតាមរយៈការអភិវឌ្ឍន៍សេដ្ឋកិច្ច និងការបង្កើតបច្ចេកវិទ្យាថ្មីៗ។ហេតុនេះការលើកកំពស់អប់រំកុមារ និងយុវជនតាមរយៈចលនាកាយរិទ្ធ គឺធ្វើអោយកុមារ និងយុវជនចេះដឹកនាំប្រកបដោយការទទួលខុសត្រូវ ព្រមទាំងធ្វើគំរូល្អៗ មានសីលធម៌ល្អ និងទទួលបានបទពិសោធន៍ពីជីវិត ការងារ ការដឹកនាំគ្រប់គ្រង នាថ្ងៃអនាគត ជាអ្នកបន្តវេនដ៍សក្តិសមរបស់ប្រទេសជាតិ។
រាជរដ្ឋាភិបាលដែលមានសម្តេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជាបានចាត់ទុក និងធ្លាប់មានប្រសាសន៍ថា«កុមារគឺជាទំពាំងស្នងឬស្សី ជាកម្លាំងស្នូល ជាកោសិការដ៍រឹងមាំ និងជាអនាគតប្រទេសជាតិ»។ ដើម្បីសំរេចអោយបាននូវគោលបំណងនេះ យើងត្រូវឆ្លងកាត់ពេលវេលាមួយយូរក្នុងការអប់រំក្មួយៗកុមារ តែភារកិច្ចនេះមានសារៈសំខាន់ណាស់សម្រាប់ការអភិវឌ្ឍន៍ខ្លួនរបស់កុមារប្រកបដោយសមត្ថភាព មានចំណេះដឹង ចំណេះធ្វើ សីលធម៌ល្អ និងចេះរួមរស់នៅជាមួយគ្នាដោយសុខសន្តិភាព ជួយអោយសង្គមជាតិមានយុត្តិធម៌ មានប្រជាធិបតេយ្យ និងនីតិរដ្ឋ៕
