កំពង់ធំៈ សិប្បកម្មចំនួន៥កន្លែង ដែលកំពុងតែធ្វើសកម្មភាពនៅចំនុច អូរល្អក់ឃុំមានរិទ្ធ ស្រុកសណ្តាន់ ខេត្តកំពង់ធំ បានដំណើរការដោយរលូន ដោយពុំមានការខ្វល់ខ្វាយពីសំណាក់មេព្រៃ និងសមត្ថកិច្ចពាក់ព័ន្ឋ ឡើយដែលត្រូវបានគេដឹងថា មានការត្រូវដង ត្រូវផ្លែគ្នាអស់ហើយ ទើប
សមត្ថកិច្ចជំនាញទុកសិប្បកម្មទាំងនេះរកចំណូល ដាក់ហោប៉ាវដោយមិនខ្វល់ពីច្បាប់បន្តិចណាសោះ។
តាមការឃ្លាំមើលពីសកម្មភាព កាប់បំផ្លាញព្រៃឈើ ស្ថិតនៅក្នុងព្រៃឡង់ ត្រូវបានគេដឹងថា បណ្តាលមកពីមានការបើកភ្លើងខៀវ ពីសំណាក់លោក សៅ វណ្ណី នាយផ្នែករដ្ឋបាលព្រៃឈើសណ្តាន់ និងលោកអ៊ុន បុត អភិបាលស្រុកសណ្ដាន ឲ្យឈ្មួញឈ្មោះ ចែរ៉ន ចែហ៊ង អាចាប យាយញ៉ិប និងឡុងលីសាយ សុទ្ធតែឈ្មួញឈើដុះស្លែរប្រចាំស្រុកសណ្ដាន ជួលឲ្យប្រជាពលរដ្ឋ អាកាប់ពីព្រៃឡង់ដោយគ្មានច្បាប់អនុញ្ញាតិ រួចដឹកជញ្ចូនយ៉ាងរំភើយ ហើយមកបល្លែងជាឈើស្របច្បាប់ ដឹកចេញបន្តកន្ទុយ គ្នាដោយគ្មានការអើពើពីលោកមេព្រៃនោះឡើយ ។
ចំណែកឈើដែលបានអាកាត់ នៅព្រៃឡង់មួយចំនួនធំ ត្រូវបានដឹកជញ្ជូនមកកាន់ ដេប៉ូឈើរបស់ លោក យ៉េត ដែលមានតួនាទីជាមន្ត្រីកងរាជអាវុធហត្ថខេត្តកំពង់ធំ បានយកស្បែកមកកាង បើកកន្លែងទីតាំងអាជ្រៀក ឈើដោយខុសច្បាប់ និងបានធ្វើសកម្មភាពជាច្រើនឆ្នាំមកហើយ តែសមត្ថកិច្ចជំនាញ មិនហ៊ានបង្ក្រាបនោះ ទេ ជាហេតុធ្វើឲ្យមានការ សង្ស័យថាមានការឃុបឃិតគ្នា បើកដៃឲ្យធ្វើសកម្មភាពដឹកជញ្ជូនឈើដោយខុស ច្បាប់ចូលសិប្បកម្មលោក យ៉េត ទាក់ទិននិងការចោទប្រកាន់ថា លោក យ៉េត ជាអ្នកដាក់ថ្នាំសណ្តំមេព្រៃ ឲ្យជាប់ត្រគៀក ងាកខ្លួនមិនរួច មិនអាចលូកលាន់ក្នុងមុខរបរសិប្បកម្មរបស់លោកបានទេ ចំណែកទូស័ព្ទលោកយ៉េតវិញពុំអាចធ្វើការទំនាក់ទំនងបានទេ ទោះទូរស័ព្ទចូលរាប់សិបដង តែមិនព្រមលើក ទើបពុំមានការបំភ្លឺពីករណីនេះ។
លោក ឡាយ នាយរងសង្កាត់រដ្ឋបាលព្រៃឈើទំរីង បានឲ្យដឹងថាលោក យ៉េត ដែលមានសិប្បកម្មនៅអូល្អក់ មានច្បាប់បើកសិប្បកម្ម តែពុំមានច្បាប់អាឈើ និងដឹកជញ្ជូនឈើចេញពីព្រៃឡង់នោះទេ ចំណែកចែរ៉ន ដឹកឈើចេញពីព្រៃឡង់ចំនុច ទំអោង នោះគឺខុសច្បាប់ទាំងស្រុង លោកបានបញ្ជាក់ថា គឺចែរ៉នបានលួច ដឹកឈើនេះបើសមត្ថកិច្ចឃើញនិងត្រូវចាប់ ប៉ុន្តែហេតុអ្វីបានជា មន្ត្រីប្រចាំការរបស់លោក ដែលឈរជើងមិនព្រមរាយការណ៍សោះ។
ប្រភពពីប្រជាពលរដ្ឋ ដែលបានឃើញហេតុការណ៍ បានសម្តែងនូវកាសោកស្តាយ ខណៈពេលដែលព្រៃឡង់ កាន់តែរលាយ ហិនហោចបន្តិចម្តងៗ ដោយស្នាដៃអ្នកមានអំណាច មានបក្សពួក នាំគ្នាកាប់បំផ្លាញដោយ ពុំ បានគិតគូរពីផលប្រយោជន៍របស់ជាតិ គិតតែពីផលប្រយោជន៍ រកលាភស្ការៈដាក់ហោប៉ៅរាងខ្លួន តែបើសិនជាសមត្ថកិច្ចជំនាញមានការធូរលុងបែបនេះ ព្រៃឡង់នឹងក្លាយជាវាលរហរដ្ឋាននិងសល់តែត្រឹមឈ្មោះព្រៃឡង់តែប៉ុណ្ណោះនាថ្ងៃអនាគត់។
ដោយ ប៊ុន រិទ្ធី
