(ខេត្តព្រៃវែង)៖ ត្រីឆ្តោរាប់សិបតោនដែលឈ្មួញកំពុងសំរុកដឹកជញ្ជូនតាមប្រភេទរថយន្តយីឌុប និងរថយន្ត កូរ៉េនាំចូលពីប្រទេសវៀតណាមតាមច្រកអន្តរជាតិបន្ទាយចក្រី នាពេលសព្វថ្ងៃសមត្ថកិច្ចគ្រប់ស្ថាប័នកំពុងតែសប្បាយចិត្តបើកដៃយ៉ាងពេញទំហឹងអនុញ្ញាតិអោយមានការ
នាំចូលត្រីឆ្តោអត់ប៉ាស្ព័រទាំងថ្ងៃទាំងយប់យ៉ាងគគ្រិកគគ្រេង។ ជាពិសេសមន្ត្រីជំនាញជលផលខេត្តព្រៃវែងកំពុងទទួលបានផលប្រយោជន៍យ៉ាងក្រាស់ក្រើលពីក្រុម ឈ្មួញនាំត្រីឆ្តោពីប្រទេសវៀតណាមតាមច្រកបន្ទាយចក្រីជាយូរឆ្នាំមកហើយ ។
ជាការពិតណាស់បើគ្មានភ្លើងខៀវពីមន្ត្រីជំនាញជលផល ក្រុមឈ្មួញដឹកជញ្ជូនត្រីឆ្តោមិនអាចរកស៊ីដុះស្លែ និងយ៉ាងស្រួលបែបនេះបានឡើយ ។ នេះសរបញ្ជាក់អោយឃើញយ៉ាងច្បាស់ថា មន្ត្រីជំនាញជលផលខេត្ត ព្រៃវែងជាប់ពាក់ព័ន្ធទៅនឹងអំពើពុករលួយណាមួយពីក្រុមឈ្មួញទាំងអស់នោះហើយបានជាគ្មានមន្ត្រីជំនាញណាម្នាក់ចេញមុខសួរនាម រឺក៏ធ្វើការបង្ក្រាបម្តងណានោះទេ ។ ប្រភពពីកម្មករលើកត្រីដាក់ឡានបានប្រាប់កម្ពុជាថ្មី អោយដឹងថា ឡានដឹកត្រីតាមច្រកបន្ទាយចក្រីមានក្រុមឈ្មួញជាច្រើនអ្នក ហើយឈ្មួញទាំងអស់នោះ សុទ្ធតែជនជាតិវៀតណាមដឹកជញ្ជូនតាមច្រកនេះរាប់ឆ្នាំមកហើយ មានឈ្មួញមួយចំនួនបង្កប់កូនត្រីឆ្តោចូលមកស្រុកបានយ៉ាងស្រួល គ្មានព្រួយបារម្មណ៍ការបង្ក្រាបពីសំណាក់មន្ត្រីជំនាញ ព្រោះក្រុមឈ្មួញបានបង់លុយជូនលោកមន្ត្រីជំនាញទាំងអស់នោះហើយ ។
ពាក់ព័ន្ធករណីខាងលើនេះផងដែរកម្ពុជាថ្មីព្យាយាមសូមការបំភ្លឺពីលោក អូន ស៊ីណាត នាយខ័ណ្ឌរដ្ឋបាល ជលផលខេត្តព្រៃវែងផងដែរ តែមិនទាក់ទងបាន ៕
