កំពង់ឆ្នាំង ៖ ក្រុមការងារចំរុះថ្នាក់ខេត្តមួយក្រុមនៅព្រឹកថៃ្ងទី០១ ខែកក្កដា ឆ្នាំ២០១៥ បានចុះបោះបង្គោលកំណត់ទីតាំង និងឯកភាពព្រំប្រទល់ដែនដីបម្រុងទុកអចិន្ត្រៃយ៍របស់រដ្ឋ សំរាប់សហគមន៍មូលដ្ឋានស្ថិតនៅតំបន់សាច់ពូនភូមិថ្នល់កែង,ភូមិខ្វិតទួលឃ្លាំង,ភូមិក្រសាំងដុះឡើង ឃុំក្បាល ទឹកស្រុកទឹកផុស។ក្រុមការងារនេះដឹកនាំដោយលោក ម៉ម ឈឿម ប្រធានមន្ទីរព័ត៌មានខេត្តកំពង់ឆ្នាំង លោក ពៅ ប៊ុនថន ប្រធានមន្ទីរបរិស្ថានខេត្ត លោក ថោង វ៉ាន់វីរ៉ាវុឌ្ឍី នាយខ័ណ្ឌរដ្ឋបាលព្រៃឈើខេត្ត លោក ម៉េង ហាក់ អភិបាលស្រុកទឹកផុស
លោក លី សុភា អនុប្រធានសុរិយោដីខេត្ត និងអង្គភាពពាក់ព័ន្ធមួយចំនួនទៀតនិងមានការចូលរួមបោះបង្គោ លពីប្រជាពលរដ្ឋ៥៧នាក់ ដែលជាម្ចាស់ក្បាលដីដែលជាប់ដែនដីបម្រុងចូលរួមផងដែរ។
លោក ថោង វ៉ាន់វីរ៉ាវុឌ្ឍី នាយខ័ណ្ឌរដ្ឋបាលព្រៃឈើបានអោយដឹងថា៖ផ្ទៃដីដែលត្រូវបោះបង្គោលនៅតំបន់សាច់ពូនឃុំក្បាលទឹកស្រុកទឹកផុសនេះមានចំនួន៣៩៥ហិកតា ហើយលទ្ធផលដែលក្រុមចំរុះសំរេចបោះបង្គោលបានក្នុងថៃ្ងទី០១ ខែកក្កដា ឆ្នាំ២០១៥នេះ បានចំនួន២៥បង្គោលស្មើនិងផៃ្ទដីចំនួន១២០ហិកតា ហើយ
ទិសដៅបន្តរបស់ក្រុមការងារចំរុះត្រូវសំរេចបោះបង្គោផលអោយបានចប់សព្វគ្រប់នៅក្នុងខែកក្កដានេះ។
លោក ម៉ម ឈឿម ប្រធានមន្ទីរព័ត៌មានខេត្តតំណាងអោយឯកឧត្តម ចេង ញ៉ាន់ អភិបាលរងខេត្ត ជាប្រធានក្រុមការងារចំរុះបានមានប្រសាសន៍ថា៖ដោយមានការយកចិត្តទុកដាក់ពី ឯកឧត្តម ឈួរ ច័ន្ទឌឿនអភិបាលខេត្តកំពង់ឆ្នាំង សំរាប់ផលប្រយោជន៍ប្រជាពលរដ្ឋនិងសហគមន៍មានព្រៃបំរុងទុកសំរាប់អនាគតកូនចៅជំនាន់ក្រោយកុំអោយមានការបាត់បង់និងទុកជាប្រយោជន៍ប្រើប្រាស់រួមគ្នា ដែលទុករកអុសចំអិនអា ហារ ឃ្វាលគោក្របី និងសាំប់សង់ផ្ទះផងដែរ។ដោយថៃ្ងនេះឯកឧត្តមអោយក្រុមការងារចំរុះរបស់ខេត្ត ចុះបោះបង្គោលកំណត់ទីតាំងដែនដីព្រៃបំរុងអចិន្ត្រៃរបស់រដ្ឋសំរាប់សហគមន៍។
លោកក៏បានផ្តាំផ្ញើសុំអោយប្រជាពលរដ្ឋនិងសហគមន៍ចូលរួមជួយថែរក្សា កុំអោយជនឈ្លាតឱកាសយកដីនេះធ្វើជាកម្មសិទ្ធិឯកជន។លោកក៏បានសំណូមពរសុំអោយប្រជាពលរដ្ឋទាំងអស់ដែលមានព្រំជាប់និងដីព្រៃបំរុងទុកនេះសូមកុំឈ្លាតឱកាសឈួសចូលក្នុងដីព្រៃបំរុងទុកនេះ និងចាប់ពីថៃ្ងបោះបង្គោលនេះទៅបើមានជនឈ្លាតឱកាសរំលោភយកដីនេះ ត្រូវរាយការណ៍អោយអាជ្ញាធរដែនដី ជំនាញ និងសមត្ថកិច្ចអោយបានទាន់ពេលវេលា។លោកបានសំណូមពរផងដែរដល់ក្រុមការងារចំរុះ ទាំងអស់ត្រូវសហការគ្នាបោះបង្គោលអោយបានរួចរាល់តាមផែនការ ហើយរាយការណ៍ជូនជូនឯកឧត្តមអភិបាលខេត្ត៕ 
