ភ្នំពេញ ៖ រថយន្ត Ford Ranger ពណ៌ទឹកប្រាក់ មួយគ្រឿងបានបើកបុកម៉ូតូហុងដាឌ្រីម ធុនសេ១២៥ បណ្តាលឱ្យបុរសម្នាក់រងរបួសស្រាល ហើយម៉ូតូរងការខូចខាតយ៉ាងដំណំ ចំណែករថយន្តខូចខាតតិចតួច ដែលហេតុការណ៍នេះបានកើតឡើងនៅវេលាម៉ោង៩និង១៥នាទីយប់ថ្ងៃទី២១ខែ
មេសាឆ្នាំ២០១៤ នៅចំណុចមុខសាលាបង្រៀនបើកបរ៧មករា តាមបណ្តោយផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ ។
ប្រភពព័ត៌មានបានឱ្យដឹងថា រថយន្ត Ford Ranger ពណ៌ទឹកប្រាក់ពាក់ស្លាកលេខ ភ្នំពេញ 2Z-1323 បើកបរដោយបុរសម្នាក់ធ្វើដំណើរតាមបណ្ដោយផ្លូវ២៧១ក្នុងទិសដៅពីជើងទៅត្បូង មកដល់ចំណុចកើតហេតុ (មុខសាលាបង្រៀនបើកបរ៧មករា) ក៏បានបុកម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ 1BJ-3442 ជិះធ្វើដំណើរដោយបុរសម្នាក់ក្នុងទិសដៅបញ្ច្រាសគ្នា បណ្តាលឱ្យម៉ូតូខូចខាតកំណាត់មុខយ៉ាងដំណំចំណែករថយន្តខូចខាតតិចតួច ចំណែកអ្នកបើកបររងរបួសស្រាល។
ក្រោយពេលកើតហេតុ ភាគីទាំងពីរបានធ្វើការសម្រួលគ្នាតែមិនត្រូវ ដូច្នោះសមត្ថកិច្ចក៏បានធ្វើការវាស់វែងយករថយន្ត និងម៉ូតូខាងលើយកទៅរក្សាទុកនៅអធិការខណ្ឌសែនសុខដើម្បីដោះស្រាយតាមផ្លូវច្បាប់៕
