ខេត្តសៀមរាប៖ ករណីឈ្លោះប្រកែកគ្នានៅកន្លែងជល់មាន់រឿងលុយ១០០ដុល្លារសោះក្លាយជាទំនាស់ធំដុំរហូតមានការប្តឹងផ្តល់គ្នាទៅដល់ប៉េអ៊ឹមខេត្តឲ្យជួយអន្តរាគមន៍ ក្នុងនោះជនរងគ្រោះទាមទារសងជម្ងឺចិត្តចំនួន២ម៉ឺនដុល្លារ ដោយចោទប្រកាន់ថា ប៉ូលិសព្រហ្មទណ្ឌកំរិតស្រាលម្នាក់ដែលជាអ្នកលេងដូចគ្នានោះ បានវាយតប់មកលើរូបខ្លួន។
ហេតុការណ៍នេះកើតឡើងនៅវេលាម៉ោង ៤.និង០០នាទីថ្ងៃទី០៤ខែកក្កដាឆ្នាំ២០១៥ស្ថិតនៅចំនុចបរិវេណភូមិវប្បធម៌ ក្នុងភូមិកសិកម្ម សង្កាត់ស្រង៉ែ ក្រុងសៀមរាប ។
តាមការរៀបរាប់របស់ លោក ជី ប៊ុនណារ៉ា រស់នៅភូមិគោកស្នួល ឃុំខ្នាត ស្រុកពួក ខេត្តសៀមរាប ដែលជាជនរងគ្រោះបានឲ្យដឹងថា លោក អនុសេនីយ៍ទោ គា ប៊ុនឡុង លេងចាញ់ខ្លួន ២០០ដុល្លា ហើយបានសងលោក១០០ដុល្លារ នៅសល់១០០ដុល្លារទៀត ហើយឲ្យទៅទារពីលោក យិន ថាវ ដែលជាអ្នកលេងដូចគ្នា តែលោក យិន ថាវ មិនព្រមឲ្យ ដោយសារតែលោក ប្រកាន់ថា លេងជាមួយអ្នកណា គឺអ្នកនោះសង មិនមែនទៅកាត់កងជាមួយអ្នកផ្សេងទេ តែលោក គា ប៊ុនឡុង មិនព្រមសង លោកក៏តាមអង្វរ ដល់ចូលក្នុងឡាន តែត្រូវបានលោកនិយាយថា មានលុយប៉ុណ្ណឹង ដែរម្តេចបានលេងថោកម្លេះ ក្រោយមកលោក គា ប៊ុនឡុង បានវាយចំ ក្បាលផ្នែកខាងក្រោយ ហើយអាមេផ្ជង់គំរាម ថែមទាំងនិយាយថា ហែងកុំភ្លើជាមួយអញវើយ ហើយក៏បើកឡានបាត់ទៅ។ ក្រោយមកលោកក៏បានមកដាក់ពាក្យបណ្តឹង នៅទីបញ្ជាការកងរាជអាវុធហត្ថខេត្តសៀមរាប ដើម្បីទាមទារ សងជំងឺចិត្តចំនួន ២ម៉ឺនដុល្លា។
ចំណែកលោក អនុសេនីយ៍ទោ គា ប៊ុនឡុង បានផ្តល់បទសម្ភាសន៍ដល់អ្នកកាសែតនៅរសៀលថ្ងៃទី០៥ខែកក្កដានេះថា ករណីនេះពិតជាមានទំនាស់ជាមួយលោក ជី ប៊ុណ្ណារ៉ា នោះមែន តែលោកមិនបានវាយតប់ឬភ្ជង់កាំភ្លើងទៅលើជី ប៊ុណ្ណារ៉ានោះទេ ដោយគ្រាន់ច្រានចេញពីមុខឡាន ព្រោះ ជី ប៊ុណ្ណារ៉ា នេះបានមកឈរពីមុខឡាន។លោកបន្តថា ករណីដែលមានការកើតឡើងនេះឲ្យលោកទៅស្បថស្បែរនៅទីណាក៏បានដែរ។
ជុំវិញករណីខាងលើនោះដែរលោកអនុសេនីយឯក អ៊ុយ ចយ នាយការិយាល័យ ស្រាវជ្រាវបទល្មើសព្រហ្មទណ្ឌនៃកងរាជអាវុធហត្ថខេត្តសៀមរាបបានឲ្យដឹងថា ចំពោះករណីរឿង
បណ្តឹងរវាងអ្នកលេងជល់មាន់នៅភូមិវប្បធម៌ឈ្លោះប្រកែកគ្នានោះ ត្រូវបានកម្លាំងជំនាញ
របស់ការិយាល័យស្រាវជ្រាវបទល្មើសព្រហ្មទណ្ឌនៃកងរាជអាវុធហត្ថខេត្ត កំពុងរៀបចំកសាងសំណុំរឿងបញ្ជូនទៅតុលាការដើម្បីចាត់ការតាមផ្លូវច្បាប់។
គួរកត់សម្គាល់ផងដែរថា ល្បែងបញ្ជល់មាន់នៅក្នុងខេត្តសៀមរាបត្រូវបានគេសង្កេតឃើញថា មានសកម្មភាពរីករាលដាលស្ទើគ្រប់ទិសទីនៃខេត្តសៀមរាប ដោយគ្រាន់តែពួកគេនាំគ្នាលេងដូរទីតាំងរាល់ថ្ងៃ ធ្វើឲ្យសមត្ថកិច្ចមួយចំនួនមានការពិបាកក្នុងការតាមដាននិងចុះបង្ក្រាប ដូច្នេះហើយបន្ទាប់ពីករណីជាក់ស្តែងនេះកើតឡើងរួច គេសង្ឃឹមថា ស្នងការនគរបាលខេត្ត,ប៉េអ៊ឹមខេត្ត និងជាពិសេស លោកអភិបាលខេត្តសៀមរាប អាចនឹងមានចំណាត់ការបង្ក្រាបករណីល្បែងស៊ីសងនេះបានឬយ៉ាងណា៕
