បន្ទាយមានជ័យៈ ជនសង្ស័យម្នាក់ត្រូវបានអាវុធហត្ថខេត្តបន្ទាយមានជ័យ ឃាត់ខ្លួនបន្ទាប់ពីរងការចោតប្រកាន់ ថាគំរាមសម្លាប់លើជនរងគ្រោះម្នាក់ ខណៈពេលស្រវឹង តែជនសង្ស័យបដិសេធមិនទទួលស្គាល់ថាខ្លួនបាននិយាយនោះទេ ។
លោក ជា ដា មេបញ្ជាការអាវុធហត្ថក្រុងប៉ោយប៉ែតបានអោយដឹងថា ដោយយោងតាមពាក្យបណ្តឹងពីជនរងគ្រោះម្នាក់ឈ្មោះ ទូច ឈុន ភេទ ស្រី អាយុ ៦៤ឆ្នាំ រស់នៅភូមិក្បាលស្ពាន១ សង្កាត់-ក្រុងប៉ោយប៉ែតខេត្តបន្ទាយមានជ័យ កាលពីថ្ងៃទី ០៥ កក្កដា ២០១៥ តាមទូរស័ព្ទ កំលាំងកងរាជអាវុធហត្ថរបស់លោកបានចុះប្រតិបត្តិការណ៍ឃាត់ខ្លួនជនសង្ស័យម្នាក់ឈ្មោះ ទួន ចាន់ឌី ភេទ ប្រុស អាយុ ២៧ឆ្នាំ រស់នៅផ្ទះជួលស្ថិតក្នុង ភូមិ ក្បាលស្ពាន១ សង្កាត់-ក្រុងប៉ោយប៉ែត ។
ការឃាត់ខ្លួននេះធ្វើឡើងដោយសារតែជនរងគ្រោះបានប្តឹងថា ជនសង្ស័យបានគំរាមជនរងគ្រោះ កាលពីវេលាម៉ោង១និង៣០នាទីរំលងអាធ្រាតថ្ងៃទី៥ កក្កដា ២០១៥ បន្ទាប់ពីបានផឹកស្រាស្រវឹងហើយស្រែកឡូឡា ជេរប្រមាថ និងគំរាមកំហែងដុតផ្ទះ និងសំលាប់ចោលទាំងអស់ ។ ក្រោយពីគំរាមកំហែង ជនសង្ស័យខាងលើបានធ្វើសកម្មភាព គោះទ្វារផ្ទះ រុញបំបុកទ្វារផ្ទះរបស់គាត់ហើយស្រែកថា បើសិនជាបានចូលទៅដល់ក្នុងផ្ទះនឹងសំលាប់ចោលទាំងអស់គ្នា សូម្បីកូនក្នុងអង្រឹងក៍មិនទុកដែរ ទើបជនរងគ្រោះទូរស័ព្ទមកប្ដឹងតែម្ដង។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា រូបគេពិតជាបានធ្វើសកម្មភាពផឹកស្រាស្រវឹងហើយស្រែកឡូឡានិងរុញបំបុកទ្វារផ្ទះរបស់ជនរង្គ្រោះពិតប្រាកដមែន ប៉ុន្តែបដិសេធថា រូបគេមិនបានស្រែកគំរាមសំលាប់ឡើយ ។
ទោះបីជាជនសង្ស័យ មិនបានសារភាពថា មិនបានគំរាមសម្លាប់យ៉ាងណាក៏ដោយ ក៏សមត្ថកិច្ចនៅតែកសាងសំណុំរឿង និងបញ្ជូនទៅសាលាដំបូងខេត្តចាត់ការតាមនិតិវិធី ៕.
