ខេត្តតាកែវ៖ កម្មកររោងចក្រផលិតស្បែកជើងយីហោ យិនហ័រ ប្រមាណ២៨០នាក់នៅព្រឹកថ្ងៃទី៦ ខែកក្កដា ឆ្នាំ២០១៥បានប្រមូលផ្តុំគ្នានៅមុខរោងចក្រធ្វើបាតុកម្ម ទាមទារឲ្យថៅកែបើកប្រាក់ខែឲ្យពួកខ្លួន ។ ការតវ៉ានេះនិងត្រូវបានអូសបន្លាយយូរ និងព្រមានថា អាចនឹងឈាន
ដល់ការបិទផ្លូវ ឬបិទមុខរោងចក្រផងដែរប្រសិនបើនៅតែគ្មានដំដោះស្រាយដល់ពួកគាត់ ។
តំណាងកម្មករមួយរូបដែលកំពុងឈរធ្វើបាតុកម្មនិយាយថា ពួកគេធ្វើការងារឲ្យរោងចក្រយិនហ័រ ប៉ុន្តែរោងចក្រនេះបានយកផលិតផលដែលពួកគេផលិតលក់បន្តទៅឲ្យរោងចក្រប៉ុណ្ណទូស ហ្វូតហ្វែរ អិលធីឌី ជារោងចក្រធំ ដែលមានទីតាំងនៅឃុំអង្គតាសោម ស្រុកត្រាំកក់ ខេត្តតាកែវ ចម្ងាយពីរោងចក្រយិនហ័រប្រមាណ១គីឡូម៉ែត្រ ។ បើតាមព័ត៌មានយកជាការបានពីអ្នកធ្វើការនៅរោងចក្រយិនហ័របានឲ្យដឹងថា រោងចក្រធំដែលទទួលយកផលិតផលពីរោងចក្រពួកគាត់ បានជំពាក់ប្រាក់រោងចក្រយិ នហ័រ២៤ម៉ឺនដុល្លារ គិតចាប់តាំងពីខែមេសាមក ។
ដោយសារតែរោងចក្រធំគឺរោងចក្រប៉ុណ្ណទូស ហ្វូតហ្វែរ មិនសងប្រាក់ឲ្យរោងចក្រយិនហ័រដូច្នេះហើយ ទើបធ្វើឲ្យកម្មករនៅក្នុងរោងចក្រដែលជាសាខាតូចគ្មានប្រាក់ខែ ពោលគឺដោយសារតែរោងចក្រធំមិនសងលុយឲ្យរោងចក្រតូច ដូច្នេះរោងចក្រតូចគ្មានលុយបើកប្រាក់ខែឲ្យកម្មករខ្លួន ។ ក្រុមកម្មករបានព្រមានថា នឹងធ្វើបាតុកម្មនៅមុខរោងចក្រធំរហូតទាល់តែមានដំដោះស្រាយណាមួយដែលពួកគាត់អាចទទួលយកបាន។
ថៅកែរោងចក្រប៉ុណ្ណទូស ហ្វូតហ្វែរ ជាជនជាតិចិនមិនបានបកស្រាយអ្វីមួយទាក់ទាងនិងបញ្ហាទាំងអស់ដែលបានកើតឡើងរវាងរោងចក្រខ្លួន និង រោងចក្រយិនហ័រនោះទេ លើសពីនេះទៀត ថៅកែរោងចក្រធំបានដេញអ្នកកាសែត ពេលដែលអ្នកកាសែតចុះទៅយកព័ត៌មាននៅទីនោះ ដោយគេនិយាយតាមរយៈអ្នកបកប្រែថា វាជារឿងរបស់ពួកគេ អ្នកកាសែតមិនត្រូវដឹងឮអ្វីឡើយ។
ក្រុមកម្មករសង្ឃឹមថា អាជ្ញាធរដែលពាក់ព័ន្ធក្នុងខេត្តអាចនឹងជួយអន្តរាគមន៍ ឬលូកដៃចូលក្នុងរឿងនេះដើម្បីជួយកម្មករទាំងអស់ឲ្យបានបើកប្រាក់ខែ បើមិនដូច្នេះទេក្រុមកម្មករទាំងអស់នោះនិងធ្វើបាតុកម្មរហូត និង អាចមានការបិទផ្លូវ និង បិទផ្លូវចូលរោងចក្រធំផងដែរ៕
