ខេត្តសៀមរាប៖ អធិការនគរបាលក្រុងសៀមរាបត្រូវបានជនមិនស្គាល់អត្តសញ្ញាណបានបាចលិខិត បើកកកាយ ផ្ទៃក្នុងជាច្រើនករណីនៅមុខស្នងការដ្ឋាននគរបាលខេត្តសៀមរាបកាលពីថ្ងៃទី០៧ខែកក្កដានេះ ដោយសំណូមពរលោកស្នងការឲ្យមានវិធានការ ទៅលើលោកអធិការ
ក្នុងលិខិតអនាមឹកនោះបានរៀបរាប់យ៉ាងដូច្នេះថា គោរពជូនលោកស្នងការនគរបាលខេត្ត យើងខ្ញុំជាមន្ត្រីនគរបាលក្រុងមិនសប្បាយចិត្តសូមអន្តរាគមន៏ពីលោកស្នងការ លើការតែងតាំងមុខតំណែង មន្ត្រីនគរបាលនាពេលកន្លងមក និងពេលបច្ចុប្បន្ន។ ការតែងតាំងមុខតំណែងលោកអធិការក្រុង ដែលតែងតាំងតែមនុស្សនៅជិតខ្លួន ភាគច្រើនកម្លាំងថ្មី និងកម្លាំងអសកម្មតាមប៉ុស្តិ៏ ដែលបានបញ្ឍរជើង ពីព្រោះពួកគេសំបូរលុយស៊ូកប៉ាន់ មកយកតួនាទី។ឯអ្នកធ្វើយូរឆ្នាំហើយមើលមិនឃើញទេ ព្រោះគ្មានលុយស៊ូកដូចគេ។
លិខិតបានសរសេរទៀតថា គោរពជូនលោកស្នងការមេត្តាជ្រាប មានមន្ត្រីឈ្មោះម៉ុក បូរ៉ា បានដើរប្រ មូលលុយតាមបនល្បែងហ្គេម .ឆ្នោត.និងតាមកន្លែងវ៉ៃស៊ិច ដែលជ្រកក្រោមស្លាកម៉ាស្សា នៅក្នុងក្រុងសៀមរាប។
ប្រភពបានទម្លាយថា កាលពីថ្ងៃទី១៣ខែមិនាឆ្នាំ២០១៥ ឈ្មោះម៉ុក បូរ៉ា បានទៅឆក់ត្រីហើយយកកាំភ្លើង អាកា បាញ់ជាច្រើនគ្រាប់នៅវាលស្រែប្រាំង ក្នុងសង្កាត់ជ្រាវក្រុងសៀមរាប ផ្អើលពលរដ្ឋទាំងថ្ងៃ តែលោកអធិការមិនដាក់វិន័យទេ ថែមទាំងតែងតាំងជាអនុផ្នែកព្រហ្មទណ្ឌទៀត។ប្រភពបានបន្តថា ក្រៅពីលាតត្រដាងរឿងអាស្រូវលោកអធិការ នៅក្នុងលិខិតនោះដែលមិនបានចុះថ្ងៃទីនិងឈ្មោះ បានសំណូមពរ ថា ការតែងតាំងមុខតំណែងមន្ត្រីណាមួយ គួរតែប្រជុំវាយតំលៃឲ្យបានត្រឹមត្រូវសិន ពិសេសគួរមើលមន្ត្រីចាស់ដែលធ្វើការយូឆ្នាំ។កម្លាំងដែលជាប់វិន័យមិនគួរតម្តើងតួនាទីទេ។
លោកស្នងការគួតែបង្កើតគណៈកម្មការត្រួតពិនិត្យកម្លាំងក្នុងក្រុងសៀមរាប ហើយលោកកុំសូវជឿរទៅលើរបាយការណ៏ពេក។ជុំវិញករណីខាងលើនេះ លោកវរសេនីយ៏ទោ ទិត្យ ណារ៉ុង អធិការនគរបាលក្រុងសៀមរាប បានថ្លែងប្រាប់តាមទូរសព្ទ័នៅរសៀលថ្ងៃទី០៨ខែកក្កដានេះថា លោកសុំមិនធ្វើអធិប្បាយបានទេ ព្រោះលោកបានរាយការដាក់ជូនទៅលោកស្នងការរួចរាល់អស់ហើយ។
ចំពោះលោកឧត្តមសេនីយ៏ទោសត ណាឌី ស្នងការនៃស្នងការដ្ឋាននគរបាលខេត្តសៀមរាប បានមានប្រសាសន៏តាមទូរសព្ទ័ថា រឿងនឹងលោកនៅមិនទាន់ដឹងទេ ព្រោះពេលនេះកំពុងប្រជុំនៅឯភ្នំពេញ។
បន្ទាប់ពីលិខិតអនាមឹកបានទៅដល់ដៃមន្ត្រីប៉ូលិស ស្ទើរពេញខេត្តសៀមរាប ក៏មានព័ត៏មានទម្លាយតៗគ្នាថា លោកអធិការរូបនេះ ក្រៅពីដើរដាក់ខែយកលុយតាមបនល្បែង និងតាមបណ្តាបទល្មើសផ្សេងៗ ក៏តម្រូវឲ្យ ប៉ូលិសក្រោមឪវាទ ដែលនៅតាមប៉ុស្តិ៏ឬគោលដៅ បង់ប្រាក់ទៅឲ្យលោក១០០ដុល្លារក្នុង១ខែផងដែរ។បើមិនដូច្នេះទេ ចាំបាច់ត្រូវផ្លាស់ប្តូរចេញពីកន្លែងឈរជើង មិនខ្វល់ថាមន្ត្រីក្រោមឪវាទរកប្រាក់ដោយវិធីណាឡើយ។ ប្រភពបន្តថា ទង្វើនិងសកម្មភាព របស់លោកអធិការ បានធ្វើឲ្យមន្ត្រីក្រោមឪវាទ សតិអារម្មណ៏អស់ជំនឿលើការងារ ព្យាយាមប្រព្រឹត្តិអំពើពុករលួយ ដើម្បីបានប្រាក់បង់ខែឲ្យមេ។
ប្រភពដដែល បន្ថែមទៀតថា បច្ចុប្បន្នបនល្បែងក្នុងក្រុងសៀមរាប កំពុងរីកដូចផ្សិត តួយ៉ាងដូចជាកន្ទុយលេខ(ឆ្នោត) ប្រជល់មាន់ ពិសេសហ្កេមបាញ់ត្រី តែសមត្ថកិច្ចក្នុងមូលដ្ឋាន មិនអាចទៅក្បែរបានទេ បើមិនចឹងឮដល់លោកអធិការភ្លាមៗ(គ្រោះថ្នាក់)។ ល្បែងហ្កេមបាញ់ត្រី ដែលកំពុងពុះកញ្ជ្រោលខ្លាំងជាងគេនាពេលនេះគឺនៅក្នុងក្លឹបស្នូកឃរ័ឈ្មោះ ប៊ីអេសស៊ី(BSC) ដែលមានទីតាំងនៅចំណូចផ្លូវកែងផ្សារញ៉ែ ក្បែរគោលដៅឈរជើងរបស់ប៉ូលិស។ ក្នុងក្លឹបមួយនេះពួកអ្នកចូលលេង ភ្នាល់ចាញ់ឈ្នះរាប់ម៉ឺនដុល្លារ ហើយភាគច្រើនអ្នកដែលចូលទៅជក់ថ្នាំញៀន។
គួររំលឹកផងដែរថា សម្រាប់ក្រុងទេសចរណ៏សៀមរាបអង្គរ នាពេលថ្មីៗនេះ សកម្មភាពមានដូចជា៖ចោរកាច់សោរកម៉ូតូ ឆក់កាបូប និងគាស់ជញ្ជាំង គាស់ទ្វារផ្ទះ ចូលប្លន់យកលុយ ទ្រព្យសម្បត្តិ កំពុងតែកក្រើកយ៉ាងខ្លាំងពេញតំបន់ទេសចរខេត្តសៀមរាប។បច្ចុប្បន្ន សមត្ថកិច្ចនៅមិនទាន់រកឃើញមុខសញ្ញាជនដែលប្រព្រឹត្តិនៅឡើយទេ។ទង្វើរទាំងអស់នេះហើយគឺបង្ហាញថា កើតចេញពីការចាញ់ល្បែង ដោយសាតែភាពកំសោយរបស់លោកអធិការ តែម្តង។
ជុំវិញករណីខាងលើ នេះ គេនៅមិនទាន់ដឹងថា លោកឧត្តសេនីយ៏ទោសត ណាឌី មានវិធានការយ៉ាងណាទេ ទៅលើលោកអធិការក្រុងសៀមរាបនោះទេ៕
ដោយ វេហា
