កំពង់ឆ្នាំង៖ ឯកឧត្តម យុទ្ធ ភូថង បានមានប្រសាសន៍ថា«ថ្ងៃនេះយើងនាំគ្នាដាំកូនឈើចំនួន១៥០០ដើមក្នុងបុណ្យរុក្ខទិវា ប៉ុន្តែដោយសារតែយើងទប់ស្កាត់បទល្មើសព្រៃឈើមិនបាន ទើបធ្វើអោយព្រៃឈើក្នុងសហគមន៍រងការបំផ្លិចបំផ្លាញនៅក្នុងចំណុចខ្សាច់ពូនឃុំក្បាលទឹក កន្លងមក»។ឯកឧត្តមបានលើកឡើងបែបនេះនៅក្នុងពិធីបុណ្យរុក្ខទិវា០៩កក្កដា នៅព្រឹកថ្ងៃទី០៧ ខែកក្កដា ឆ្នាំ២០១៥ នៅក្នុងដីព្រៃសហគមន៍ចំណុចខ្សាច់ពួន ឃុំក្បាលទឹក ស្រុកទឹកផុស ។
លោក ថោង វ៉ាន់វីរ៉ាវុទ្ធី នាយខ័ណ្ឌរដ្ឋបាលព្រៃឈើទើបកាន់តំណែងថ្មីបានអោយដឹងថា៖ដើម្បីអបអរថ្ងៃបុណ្យរុក្ខទិវា ថ្ងៃ០៩ ខែកក្កដា ឆ្នាំ២០១៥ នៅក្នុងព្រឹកនេះ ខ័ណ្ឌរដ្ឋបាលព្រៃឈើកំពង់ឆ្នាំង សហការជាមួយអាជ្ញាធរមូលដ្ឋាន ប្រជាពលរដ្ឋ និងមន្ត្រីរាជការក្នុងខេត្ត បាននាំយកកូនឈើចំនួន១៥០០ដើមរួមមាន កូនឈើធ្នង់ បេង គគីរ មកដាំដុះនៅលើដីព្រៃសហគមន៍ចំណុចខ្សាច់ពូន ឃុំក្បាលទឹក ស្រុកទឹកផុស។ក្នុងពេលនេះដែរក៍បានប្រកាសប្រគល់ដីព្រៃបំរុងទុករបស់រដ្ឋចំនួន៣៩៣ហិកតា ទៅអោយសហគមន៍ព្រៃឈើគ្រប់គ្រង មាន៣ភូមិនៅក្នុងឃុំក្បាលទឹកគឺ៖ មានភូមិខ្វិតទួលឃ្លាំង ភូមិក្រសាំងដុះឡើង និងភូមិថ្នល់កែង។
នៅក្នុងពិធីនេះដែរក៍មានការដុតបំផ្លាញរណាយន្តចំនួន១៤២គ្រឿង និងឧបករណ៍ឆក់ត្រីចំនួន១៣គ្រឿង ដែលត្រូវបានប្រជាពលរដ្ឋស្ម័គចិត្តប្រគល់ជូនអាជ្ញាធរ និងសមត្ថកិច្ចក្នុងស្រុកទឹកផុសកន្លងមក។
ឯកឧត្តម យុទ្ធ ភូថង បានផ្តាំផ្ញើដល់ប្រជាពលរដ្ឋនៅក្នុងសហគមន៍ដែលបានចូលរួមក្នុងពិធីដាំកូនឈើថ្ងៃនេះថា៖សូមប្រជាពលរដ្ឋ ចូលរួមសហការការពារព្រៃឈើនៅក្នុងសហគមន៍របស់ខ្លួនអោយបានល្អ កុំអោយជនល្មើសឆ្លៀតឱកាសកាប់គាស់រុករានទន្ទ្រានយកដីធ្លីធ្វើជាកម្មសិទ្ធិ ហើយឯកឧត្តមសង្ឃឹមថាតំបន់នេះនឹងក្លាយជាតំបន់ព្រៃឈើពណ៌បៃតងស្រស់បំព្រងក្នុងពេលអនាគត ដើម្បីធានានិរន្តរភាពព្រៃឈើរក្សាលំនឹងបរិស្ថានធម្មជាតិ សំរាប់ទ្រទ្រង់ជីវិតមនុស្ស សត្វគ្រប់ប្រភេទ និងការស្ថិតស្ថេរនៃភពផែនដីយើងនេះ។
គួរបញ្ជាក់ដែរថា៖កន្លងមកបទល្មើសព្រៃឈើនៅក្នុងស្រុកទឹកផុស កើតមានច្រើនជាហូរហែរជារៀងរាល់ថ្ងៃ ដូចជាការកាប់ព្រៃឈើមិនទាន់គ្រប់អាយុគ្រប់ប្រភេទធ្វើជាអុសស្ទែរលក់អោយឈ្មួញទៅក្រៅខេត្ត ដែលក្នុង១ថ្ងៃៗមានដល់រាប់រយគោយន្ត និងរថយន្ត នៅក្នុងឃុំក្បាលទឹក ឃុំទួលខ្ពស់ ឃុំជៀប និងឃុំក្រាំងស្គារ ដែលត្រូវបានប្រជាពលរដ្ឋរិះគន់ថា មិនត្រូវបានសមត្ថកិច្ជរដ្ឋបាលព្រៃឈើ សង្កាត់ និងផ្នែក នៅក្នុងស្រុកទឹកផុសធ្វើការបង្ក្រាបឡើយបានឡើយ ដែលគេនិយាយថាពិតេជាមានការឃុបឃិតជាមួយពួកឈ្មួញ៕
