កំពង់ឆ្នាំង៖បុរសម្នាក់ត្រូវសត្វពស់មានពឹស១ក្បាលចឹកចំមេជើងខាងស្តាំ ខណោះពេលដែលគាត់កំពុងដើរឆ្លុះសត្វនៅក្នុងព្រៃ ករណីនេះបានកើតឡើងវេលាម៉ោង៩យប់ថ្ងៃទី០៨ ខែមិថុនា ឆ្នាំ២០១៥ នៅភូមិកុសមៈ ឃុំទឹកហូត ស្រុករលាប្អៀរ ខេត្តកំពង់ឆ្នាំង ហើយត្រូវបានក្រុមគ្រួសារដឹកយកមកសង្គ្រោះនៅមន្ទីពេទ្យបង្អែកខេត្តកំពង់ឆ្នាំង ។
នៅក្នុងមន្ទីរពេទ្យក្រុមគ្រួសាររបស់ជនរងគ្រោះបានអោយដឹងថា៖ជនរងគ្រោះមានឈ្មោះ ឈុត ទិន ភេទប្រុស អាយុ២៩ឆ្នាំ មានទីលំនៅក្នងភូមិឃុំកើតហេតុខាងលើ ។ នៅមុនពេលកើតហេតុ ជនរងគ្រោះរួមនឹងអ្នកភូមិ៤ទៅ៥នាក់បាននាំគ្នាដើរទៅឆ្លុះសត្វពេលយប់មានចំងាយជាងមួយគីឡូម៉ែត្រពីភូមិ ពេលកំពុងដើរតែឆ្លុះសត្វក៍ត្រូវពស់ចឹកចំមេជើង បណ្តាលអោយជនរងគ្រោះពើតចុកដួលប្រកាច់នៅនឹងកន្លែង ភ្លាមៗនោះអ្នកដែលទៅឆ្លុះសត្វជាមួយបានប្រញាប់ដឹកជនរងគ្រោះមកសង្គ្រោះនៅមន្ទីរពេទ្យខេត្ត ដើម្បីអោយក្រុមគ្រូពេទ្យខេត្តជួយសង្គ្រោះជីវិត ។
អ្នកជម្ងឺសំរាកក្នុងមន្ទីរពេទ្យខេត្តបានអោយដឹងថា៖នៅក្នុងរយៈពេលតែមួយថ្ងៃមានជនរងគ្រោះដោយពស់ចឹក នៅក្នុងមូលដ្ឋានផ្សេងៗគ្នា មកព្យាបាលនៅមន្ទីរពេទ្យខេត្តមានចំនួន៥នាក់ ប៉ុន្តែត្រូវបានគ្រូពេទ្យជួយសង្គ្រោះ អោយរួចផុតពីគ្រោះថ្នាក់ទាំងអស់ ។ គួរយល់ដឹងថា៖ប្រសិនបើមានករណីសត្វពស់ចឹក ឬសត្វមានពឹសខាំត្រូវប្រញាប់ប្រញាល់ដឹកជនរងគ្រោះមកមន្ទីរពេទ្យខេត្តជាបន្ទាន់ ដើម្បីគ្រូពេទ្យខេត្តមានលទ្ធភាពជួយសង្គ្រោះជីវិតបានទាន់ពេលវេលាព្រោះនៅក្នុងមន្ទីរពេទ្យខេត្ត មានថ្នាំចាក់បន្សាបពិសយ៉ាងពូកែំតែបើហួសពេល ពិតជាពិបាកជួយសង្គ្រោះណាស់ ៕
