ខេត្តតាកែវ៖ ករណីប្លន់ប្រដាប់អាវុធមួយបានកើតឡើងនៅរោងម៉ាស៊ីនកិនស្រូវមួយកន្លែងស្ថិតនៅខាងកើតផ្សារចំបក់ ក្នុងភូមិសីហា ឃុំចំបក់ ស្រុកបាទី ខេត្តតាកែវ។ តាមសេចក្តីបំភ្លឺរបស់ម្ចាស់ផ្ទះដែលជាជនរងគ្រោះឈ្មោះហ៊ុល លាង អាយុ៣៦ ជាប្តី និង ប្រពន្ធឈ្មោះ សៀង
ស៊ីរ៉េន អាយុ៣១ឆ្នាំ បានឲ្យដឹងថា នៅវេលាម៉ោង៧និង៤០នាទីយប់ថ្ងៃទី៩ ខែកក្តដា ឆ្នាំ២០១៥ មានក្រុមចោរបីនាក់ប្រដាប់ដោយអាវុធខ្លីមួយដើមមិនស្គាល់ម៉ាក និង អាកាមួយដើម បានធ្វើសកម្មភាពចូលមកផ្ទះរបស់គាត់ដោយយកកន្ត្រៃកាត់របងសំណាញ់ដែកខាងក្រោយផ្ទះផ្នែកខាងស្តាំរួចបានចូលមកភ្ជុងគំរាមគាត់និងបានបាញ់២គ្រាប់ មួយគ្រាប់ផ្ទុះ និង មួយគ្រាប់ទៀតមិនបានផ្ទុះទេ។ម្ចាស់ផ្ទះបានបន្តទៀតថា ក្រោយធ្វើសកម្មភាពប្លន់បានសម្រេចដោយយកប្រាក់អស់ ២០លានរៀន ប្រាក់ដុល្លា៤៥០ដុល្លា ចិញ្ជៀនមាស២ជី និងទូរសព្ទដៃ៤គ្រឿង ពួកវាបានចេញទៅទិសខាងកើតបាតតែម្តង។
ក្រោយពីមានការប្លន់ប្រដាប់អាវុធនេះបានកើតឡើងចប់ភ្លាមៗ សមត្ថកិច្ចស្រុកបាទីចុះមកអន្តរាគមន៍ជួយដល់ជនរងគ្រោះដែរ តែហួសពេលទៅហើយ ព្រោះក្រុមជនសង្ស័យប្លន់ប្រដាប់អាវុធនោះបានគេចខ្លួនបាតស្រមោលអស់ទៅហើយ ដោយបន្សល់ទុកវត្ថុតាងឲ្យសមត្ថកិច្ចស្រាវជ្រាវមាន ស្បែកជើងប៉ាតាខាងស្តាំមួយចំហៀង កន្ត្រៃកាត់ដែកមួយ និង សំបក់កន្ទុះគ្រាប់មួយនៅនិងផ្ទះជនរងគ្រោះ ឯចំណែកជនរងគ្រោះវិញពួកវាមិនបានបង្ករបួសស្នាមអ្វីទេ គឺគ្រាន់តែបាត់បង់ទ្រព្យសម្បត្តិប៉ុណ្ណោះ។ ករណីខាងលើនេះសមត្ថកិច្ចស្រុកបាទីមិនទាន់កំណត់មុខសញ្ញាក្រុមចោរប្លន់ប្រដាប់អាវុធនេះបាននៅឡើយទេ ដោយកម្លាំងរបស់លោកកំពុងតែដុតដៃដុតជើងស្រាវជ្រាវលើរឿងនេះ៕
