ខេត្តបន្ទាយមានជ័យមនុស្សស្លាប់ម្នាក់និងរបួសធ្ងន់ ៤នាក់ និងរបួសស្រាលជិត១០នាក់ទៀតក្នុងករណីគ្រោះថ្នាក់ចរាចរណ៍ដ៏គួរឲ្យរន្ធត់ ដោយហេតុរថយន្តទូរីសសាំយ៉ុងមួយគ្រឿងបានដឹកក្រុមទស្សនះកិច្ចសិក្សាស្រះជំរកត្រីនៅតាមសហគមន៍ ចំនួន១៧នាក់ បើកផ្ទុះកងក្រោយ ក្រឡាប់ធ្លាក់ចូលវាលស្រែ។
ហេតុការណ៍គ្រោះថ្នាក់នេះកើតឡើង នៅវេលាម៉ោង១០.៣០ ព្រឹកថ្ងៃទី១៣ ខែកក្កដាឆ្នាំ២០១៥ នៅចំណុចផ្លូវជាតិលេខ៦ខាងលិចភូមិសាលាក្រៅប្រហែល ២០០ម៉ែត្រនៅភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមាន ជ័យ។
លោក សួន នីប៉ូ នាយរងការិល័យចរាចរណ៍នៃស្នងការនគបាលខេត្តប្រាប់ថា: មុនពេលកើតហេតុមានរថយន្តទូរីសមួយគ្រឿងព៌ណ ស ពាក់ស្លាកលេខភ្នំពេញ ២Q៤១៥៦ បានដឹកសមាជិកគណះកម្មាធិការកម្មវិធីទស្សនះកិច្ចសិក្សាស្រះជំរកត្រីនៅតាមសហគមន៍មួយឡានមានគ្នាចំនួន ១៧ នាក់ចេញមកពីភូមិចក ឃុំកកោះ ស្រុកម៉ោងឬស្សី ខេត្តបាត់ដំបងសំដៅ ទៅខេត្តសៀមរាប បើកមកដល់ចំណុចកើតហេតុរថយន្តនោះក៏ផ្ទុះកង់ក្រោយឆ្វេងរេចង្កូតធ្លាក់ចូលវាលស្រែតែម្តង។
លោកវរះសេនីយ៍ត្រី តោ សារូ៉ នាយផ្នែកចរាចរណ៍បានឲ្យដឹងថា: សពជនរង គ្រោះមានឈ្មោះឡែត ឡិញ ប្រុសអាយុ៦១ឆ្នាំរស់នៅភូមិចក ឃុំកកោះ ស្រុកម៉ោងឬស្សី ខេត្តបាត់ដំបង អ្នករបួសធ្ងន់ប្រុស២ស្រី២ចំណែក របួសស្រាលជិត១០នាក់ត្រូវបានដឹកជញ្ជូនទៅមន្ទីរពេទ្យដើម្បីសង្គ្រោះជីវិត។
ក្រោយពីកើតហេតុរួចអ្នកបើកចុះគេចខ្លួនបាត់រីឯអ្នករងរបួសទាំង៤នាក់នោះត្រូវបានរថយន្តរបស់ស្នងការដឹកយកទៅសង្គ្រោះជីវិតនៅមន្ទីរពេទ្យ៕
