កំពត៖ ប៉ូលីសេដ្ឋកិច្ចខេត្តចំនួនបួននាក់ត្រូវបានស្ត្រីរកស៊ីដឹកទំនិញចាប់ហួយពីច្រកព្រែកចាកព្រំដែន វៀតណាមយកស្បែកជើងដេញវាយ ពេលឃាត់រថយន្តដឹកទំនិញសំពីងសំពោងរបស់ស្ត្រីរូបនោះផ្អើលពេញក្រុងកំពត នៅតាមផ្លូវជាតិលេខ៣១ ចំណុចស្ពានក្បាលរមាស ក្រុង
កំពត កាលពីវេលម៉ោង៣ និង៣០នាទីរសៀលថ្ងៃទី១៣ ខែកក្កដា ឆ្នាំ២០១៥ នេះ។ស្ត្រីជើងខ្លាំងដែលយកស្បែកដេញជើងវាយប៉ូលីសមានឈ្មោះ អៀម ហៀប អាយុ៥០ឆ្នាំ រស់នៅភូមិដំណាក់កន្ទួត ឃុំដំណាក់កន្ទួត ស្រុកកំពង់ត្រាច ខេត្តកំពត មានមុខរបរដឹកទំនិញចាប់ពីច្រកព្រែកចាកព្រំដែនវៀតណាម ទៅលក់នៅត្រពាំងល្ពៅ ស្រុកទឹកឈូ ត្រូវជាម្តាយ និងអ្នកបើកបរឈ្មោះ សិដ្ឋ អឿន អាយុ៣០ ត្រូវជាកូន។លោកអនុសេនីយឯក សូ បញ្ញា នាយរងការិយាល័យនគរបាលប្រឆាំងបទល្មើសសេដ្ឋកិច្ចខេត្តកំពត បានឲ្យដឹងថា កម្លាំង របស់លោកបានហៅឃាត់រថយន្តដឹកទំនិញខាងលើ ដើម្បីត្រួតពិនិត្យតាំងពីចំណុចចម្ការសាវម៉ាវ ក្នុងភូមិសាស្ត្រឃុំព្រែកសង្កែ ស្រុកទឹកឈូរ សង្ស័យថា រថយន្តនោះទឹកទំនិញគេចពន្ធពីប្រទេសវៀតណាម ។ ប៉ុន្តែអ្នកបើកបរមិនព្រមឈប់ឲ្យត្រួតពិនិត្យ ព្រមទាំងបានបើកដេញកៀររថយន្តរបស់កម្លាំង របស់លោកថែម ទៀតផង។ លុះមកដល់ចំណុចជិតទីបញ្ជាការប៉េអឹមខេត្ត ក្នុង ក្រុងកំពត កម្លាំងរបស់លោកបានស្ទាក់ឃាត់ជាប់ ស្រាប់តែពេលនេះស្ត្រីជាម្តាយ បានស្ទុះយកស្បែកជើងដេញវាយកម្លាំងរបស់លោកតែម្តង។ ហេតុការណ៍នេះ បានធ្វើឲ្យភ្ញាក់ផ្អើលចោមរោមមើល យ៉ាងច្រើន។ចំណែកស្ត្រីម្ចាស់រថយន្តដឹកទំនិញដែលយកស្បែកឈើដេញវាយប៉ូលីសនោះ បាននិយាយថា មូលហេតុដែលគាត់យកស្បែកជើង វាយប៉ូលីសនោះ ដោយសារគាត់ខឹងពេកពេលដែលប៉ូលីសយករថយន្តមកស្ទាក់ចំពីមុខ ធ្វើកូនគាត់ជាន់ហ្វ្រាំង ហើយទំនិញ ក្នុងទ្បានសង្កត់មកលើរូបគាត់ ។ក្រោយពេលកើតហេតុការណ៍កម្លាំងប៉ូលីសបានចាប់ឃាត់ខ្លួនស្ត្រីម្ចាស់រថយន្តដឹកទំនិញសំពីងសំពោងរូបនោះ និង រថយន្ត យកមកធ្វើការឆែកឆេត្រួតពិនិត្យនៅក្នុងស្នងការនគរបាលខេត្តកំពត ដោយមានលោក ខៃ សម្ផស្ស ព្រះរាជអាជ្ញារង និង មន្ត្រីគយ សាខាខេត្តកំពត ចូលរួមផងដែរ ។
ស្ត្រី អៀម ហៀប បាននិយាយថា ទំនិញរបស់គាត់មួយចំនួនមានពន្ធមួយចំនួនទៀត មិនមានពន្ធទេ ដោយគាត់ជួលអ្នករត់ម៉ូតូ ឲ្យដឹកទំនិញទាំងនោះចេញពីប្រទេសវៀតណាម ដោយក្នុងមួយម៉ូតូបង់លុយឲ្យសមត្ថកិច្ចនៅច្រកទ្វារព្រចាកចំនួន៤ម៉ឺនរៀល។រហូតមកយប់ថ្ងៃទី១៣ ខែកក្កដា នេះស្ត្រីដែលដោះស្បែកជើងវាយនគរបាលនេះ និងកូនប្រុសត្រូវប៉ូលីសឃាត់ខ្លួន នៅស្នងការនគរបាលខេត្តកំពត ដើម្បីចាត់ការបន្តតាមនីតិវិធី ៕
