ខេត្តព្រះវិហារ គ្រោះថ្នាក់ចរាចរណ៍មួយបានកើតទ្បើងបណ្តាលអោយជនរងគ្រោះម្នាក់បានស្លាប់បាត់បង់ជីវិតនិងជនរងគ្រោះម្នាក់ទៀតរងរបួសស្រាលក្នុងហេតុការណ៍រថយន្ដ១គ្រឿងបើកបរក្នុងល្បឿនលឿនមិនគោរពច្បាប់ចរាចរទៅបុកម៉ូតូសង់ចិន១គ្រឿងពេញទំហឹងកាលពីវេលាម៉ោង៩និង០៥នាទីយប់ថ្ងៃទី១៣កក្កដា២០១៥ស្ថិតនៅចំណុចបេងដូបភូមិស្រយង់ជើងឃុំស្រយង់ស្រុកគូលែន។ម៉ូតូរងគ្រោះត្រូវនគរបាលយកទៅរក្សាទុកនៅប៉ុស្ដិ៍នគរបាលរដ្ឋបាលស្រយង់។
សាក្សីនិយាយថាភាគីជនរងគ្រោះប្រើប្រាស់ទោចក្រយានយន្តមិនគ្រប់លក្ខណះបច្ចេកទេសត្រឹមត្រូវគឺម៉ូតូរបស់ជនរងគ្រោះប្រភេទសង់ចិនពណ៌ខ្មៅកញ្ចាស់១គ្រឿងគ្មានស្លាកលេខនិងមិនមានប្រព័ន្ធភ្លើងបំភ្លឺខាងមុខនិងក្រោយជាហេតុនាំអោយគ្រោះថ្នាក់ចរារណ៍នៅពេលយប់យ៉ាងដូច្នេះ។សាក្សីនិយាយថារថយន្ដបង្កហេតុមិនស្គាល់ម៉ាកបានបើករត់គេចខ្លួនដោយសុវត្ថិភាពដោយសារទីតាំងចំណុចកើតហេតុនោះនៅដាច់ស្រយ៉ាលពីភូមិដ្ឋាន។ជនរងគ្រោះទាំង២នាក់នេះមិនបានពាក់មួកសុវត្ថិភាពក្នុងពេលធ្វើដំណើរនោះទេ។
អាជ្ញាធរមូលដ្ឋានបានរាយការណ៍អោយដឹងថាជនរងគ្រោះទាំង២នាក់ជាកសិករមកធ្វើចំការនៅស្រុកគូលែនហើយពួកគេមកពីភូមិបន្ទាយស្រីឃុំខ្នារសណ្តាយស្រុកបន្ទាយស្រីខេត្តសៀមរាប។ជនរងគ្រោះទី១ឈ្មោះផាន់សំណាងហៅឆេងភេទប្រុសអាយុ២៧ឆ្នាំជាអ្នកបើកម៉ូតូរងរបួសស្រាលនិងទី២ឈ្មោះរើនវែងភេទប្រុសអាយុ២៥ឆ្នាំរងរបួសធ្ងន់ធ្ងរត្រូវបានសមត្ថកិច្ចមូលដ្ឋានបញ្ជូនទៅសង្គ្រោះព្យាបាលនៅមណ្ឌលសុខភាពកោះកេរ្តិ៍។
ភ្នាក់ងារនិយាយថាមកដល់ព្រឹកថ្ងៃទី១៤កក្កដានេះជនរងគ្រោះឈ្មោះរើនវែងបានស្លាប់បាត់បង់ជីវិតទៅហើយដោយសារស្ថានភាពមុខរបួសធ្ងន់ធ្ងរខ្លាំងពេកធ្វើអោយក្រុមគ្រូពេទ្យមិនអាចជួយសង្គ្រោះជីវិតបានទាន់ពេលវេលា។
គួរបញ្ជាក់ថាអង្គការអន្តរជាតិខ្លះដែលមានមូលដ្ឋាននៅកម្ពុជាបានចំណាយថវិកាមូលនិធិមួយចំនួនដើម្បីចូលរួមចំណែកទូលំទូលាយផ្សព្វផ្សាយពត៌មានអំពីសុវត្ថិភាពចរាចរណ៍អោយអ្នកបើកបរយានយន្តមានការប្រុងប្រយ័ត្នចំពោះហានិភ័យដែលអាចនឹងកើតមានទ្បើង។ក្នុងរបាយការណ៍ស្រាវជ្រាវរបស់អង្គការអន្តរជាតិមួយបានអោយដឹងថាជារៀងរាល់ថ្ងៃជនរងគ្រោះស្លាប់បាត់បង់ជីវិតក្នុងហេតុការណ៍គ្រោះថ្នាក់ចរាចរណ៍នៅកម្ពុជាមានចំនួនពី៥ទៅ៦នាក់ហើយបានខាតបង់ថវិការាប់លានដុល្លារអាមេរិកក្នុ១ឆ្នាំៗ៕
