ខេត្តឧត្តរមានជ័យ៖ កម្លាំងកងរាជអាវុធហត្ថស្រុកអន្លង់វែង បង្ក្រាបសំបុកចែកចាយគ្រឿងញៀន និងអ្នកប្រើប្រាស់ថ្នាំញៀនបានចំនួន ១៦នាក់ និងរឹងអូសបានថ្នាំញៀន ប្រភេទយ៉ាម៉ាចំនួន ៤៨គ្រាប់ ថ្នាំម៉ាទឹកកកចំនួន ២កញ្ចប់តូច រួមនឹងវត្ថុតាងចំនួនទៀត។ ក្នុងប្រតិបត្តិការ រយពេល ២ថ្ងៃ និងបានឈានដល់បង្ក្រាបបានមុខសញ្ញាចែកចាយគ្រឿងញៀនដ៏សកម្មផងដែរ។
លោកវរសេនីយ៍ត្រី ងួន ទ្ធីរឹទ្ធ មេបញ្ជាការកងរាជអាវុធហត្ថស្រុកអន្លង់វែងបានឱ្យដឹងថា នៅវេលាម៉ោង ៧យប់ ថ្ងៃទី១៣ ខែកក្កដា កម្លាំងអាវុធហត្ថស្រុកអន្លង់វែង ចុះបង្ក្រាបទីតាំងជាមុខសញ្ញាប្រើប្រាស់ និងជួញដូរគ្រឿងញៀនក្នុងផ្ទះជួលមួយកន្លែង ស្ថិតនៅភូមិអូរជញ្ជៀន ឃុំអន្លង់វែង ស្រុកអន្លង់វែង ហើយឃាត់ខ្លួនបាន ជនសង្ស័យចំនួន១៥នាក់ ដែលស្នាក់នៅក្នុងបន្ទប់ជួល ២បន្ទប់ជាប់គ្នា របស់ឈ្មោះ ឆែម សំអាងភេទប្រុសអាយុ ២៧ឆ្នាំ មុខរបរជាងសិប្បកម្ម និងឈ្មោះ សុខ ធូ ភេទប្រុសអាយុ ៣៨ឆ្នាំមុខរបរកម្មករ ដែលកំពុងតែធ្វើសកម្មភាព ចែកចាយ និងប្រើប្រាស់គ្រឿងញៀន។ ហើយកម្លាំងអាវុធហត្ថរឹបអូសបានថ្នាំញៀនប្រភេទយ៉ាម៉ាចំនួន ៤៨គ្រាប់ ថ្នាំម៉ាទឹកកកចំនួន ២កញ្ចប់តូច កាំភ្លើងខ្លីប្រភេទរ៉ូឡូ ១ដើម ដាវសាមរ៉ៃ ២ កាំបិតស្នៀត១ ម៉ូតូចំនួន ៨គ្រឿង និងសម្ភារៈជក់មួយចំនួនទៀត។ ក្នុងនោះដែរ ក៏បានរកឃើញវត្ថុតាងទទួលរបស់ចោរកម្ម ជាច្រើនទៀត ដូចជា ស្តុប និងចង្កៀងរថយន្តសេរីទំនើប ម៉ូទ័រឈូសឈើ ម៉ូទ័រអាបឈើ ម៉ាស៊ីនត្រង់ស៊ីន័រ។ ដែលចំពោះវត្ថុតាងទាំងនេះ កន្លងមកមានប្រជាពលរដ្ឋជាច្រើន បានរអ៊ូរទាំថា បាត់មិនដែលរកឃើញឡើយ។
លោកវរសេនីយ៍ត្រី ងួន ទ្ធីរឹទ្ធ បន្តថា ដោយមានបទបញ្ជាការពីឯកឧត្តមឧត្តមសេនីយ៍ត្រី ពុទ្ធ សារ៉ាន់ មេបញ្ជាការកងរាជអាវុធហត្ថខេត្ត បានយកចិត្តទុកដាក់ លើផែនការទប់ស្កាត់បទល្មើស ក្នុងឱកាសប្រជុំបូកសរុបការងារយោធា.ឆមាសទី១ បន្ថែមការងារយោធា.ឆមាសទី២ ក្នុងឆ្នាំ២០១៥ និងមានបទបញ្ជាផ្ទាល់ពីលោក កូយ កាន់យ៉ា ព្រះរាជអាជ្ញាខេត្តឧត្តរមានជ័យ។ ក្រោយពីកម្លាំងរបស់លោក ឃាត់ខ្លួន និងនាំយកជនសង្ស័យទាំង ១៥នាក់ រួមនឹងវត្ថុតាងគ្រឿងញៀន មកស្នាក់ការអាវុធហត្ថស្រុក ធ្វើការសាកសួរ យោងតាមចម្លើយសារភាពជនសង្ស័យទាំង ១៥នាក់។ ទើបនៅព្រឹកថ្ងៃទី១៤ ខែឆ្នាំដដែល កម្លាំងរបស់លោក ឈានទៅដល់ឃាត់ខ្លួន មុខសញ្ញាជនសង្ស័យចែកចាយថ្នាំញៀនដ៏សកម្ម ម្នាក់ទៀតឈ្មោះ សំ ជ័យ ភេទប្រុស អាយុ ៤៣ឆ្នាំ មានតួនាទីជាមន្ត្រី ក្នុងអង្គការទប់ស្កាត់បទល្មើសកម្ពុជា ដែលកម្លាំងតែលាក់ខ្លួន នៅផ្ទះ ក្នុងចំការស្វាយមួយកន្លែង ស្ថិតនៅភូមិអូរជញ្ជៀន ឃុំ-ស្រុកអន្លង់វែង។
ហើយកម្លាំងអាវុធហត្ថ បានរកឃើញវត្ថុតាង ជាសំភារៈប្រើប្រាស់ថ្នាំញៀននៅក្នុងព្រៃ ក្បែរផ្ទះរបស់ឈ្មោះ សំ ជ័យ ដែលទើបនឹងជក់ថ្នាំថ្មីៗ តែជនសង្ស័យ អ្នកប្រើប្រាស់បានរត់គេចខ្លួនបាត់ ដោយបន្សល់ទុកម៉ូតូ ១គ្រឿង។ ក្រោយពីធ្វើការឆែកឆេរ កម្លាំងអាវុធហត្ថបានរឹបអូសបាន រថយន្តតូយ៉ូតាការីណា១គ្រឿងចង្កូតស្តាំ ខ្សែកលោហៈធាតុពណ៌ទង់ដែងចំនួន ២ខ្សែ ខ្សែដៃ ១ខ្សែ ប្រាក់រៀល ២លានរៀល កាំភ្លើងឆ្នុក ប្រភេទច្នៃ ១ដើម។
បន្ទាប់ពីធ្វើការសាកសួរកម្លាំងអាវុធហត្ថស្រុកអន្លង់វែង បានកសាងសំណុំរឿងបញ្ជូនជនសង្ស័យទាំង ១៦នាក់ ទៅតុលាការខេត្តឧត្តរមានជ័យ នៅរសៀលថ្ងៃដដែលនេះ៕
