ខេត្តកំពង់ឆ្នាំង៖សិក្ខាសាលាស្តីពីផលប៉ះពាល់ដីចំណីផ្លូវ នៅក្នុងរាជធានី ខេត្ត ក្រុង និងទីប្រជុំជន ត្រូវបានផ្សព្វផ្សាយជូនមនុស្សចំនួន៧២៥នាក់ ដែលមកពីមន្ទីរអង្គភាពជុំវិញខេត្ត ថ្នាក់ដឹកនាំខេត្ត ក្រុមប្រឹក្សាក្រុង ឃុំ មេភូមិ តំណាងក្រុមហ៊ុនអគ្គីសនី ដើម្បីស្វែងយល់ពីច្បាប់
និងវិធានការចំពោះមុខក្នុងកិច្ចការពារ និងប្រើប្រាស់ដីចំណីផ្លូវក្នុងខេត្ត ក្រុង និងទីប្រជុំជន។សិក្ខាសាលានេះបានធ្វើឡើងនៅព្រឹកថ្ងៃទី០៨ ខែកក្កដា ឆ្នាំ២០១៥ នៅក្នុងសាលានយោបាយខេត្ត មានការរៀបចំឡើងដោយក្រសួង សហការជាមួយមន្ទីរសាធារណៈការនិងដឹកជញ្ជូនខេត្តកំពង់ឆ្នាំង។
ឯកឧត្តម យិត ប៊ុណ្ណា អនុរដ្ឋលេខាធិការក្រសួងសាធារណៈការ និងដឹកជញ្ជូន បានមានប្រសាសន៍ថា៖សិក្ខាសាលាក្នុងថ្ងៃនេះ គឺចង់អោយយើងទាំងអស់យល់ដឹងពី សុវត្ថិភាពសាធារណៈ សុវត្ថិភាពចរាចរណ៍ ការថែរក្សាផ្លូវសាធារណៈសំរាប់អ្នកប្រើប្រាស់ទូទៅ រៀបចំអោយមានបទដ្ឋានបច្ចេកទេសក្នុងការសាងសង់ និងការប្រើប្រាស់ចំណីផ្លូវក្នុងទីក្រុង និងទីប្រជុំជន ការពារការរំលោភបំពានដីចំណីផ្លូវប្រើប្រាស់ជាលក្ខណៈឯកជន ការពារទ្រព្យសម្បត្តិរបស់ប្រជាពលរដ្ឋតាមបណ្តោយផ្លូវ លើកកំពស់សោភ័ណ្ឌភាពទីក្រុង និងទីប្រជុំជន កាត់បន្ថយការកកស្ទះចរាចរ និងសម្រួលចរាចរណ៍ដល់អ្នកថ្មើរជើង គ្រប់គ្រងលំហូរចរាចរក្នុងទីក្រុង ទីប្រជុំជន និងចូលរួមប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ។
ឯកឧត្តមបានបន្តថា៖បច្ចុប្បន្នច្បាប់ផ្លូវថ្នល់ ច្បាប់ចរាចរណ៍ និងអនុក្រិតលេខ១៩៧អនក្រ.បក ស្តីពីការគ្រប់គ្រងដីចំណីផ្លូវតាមបណ្តោយផ្លូវជាតិ ផ្លូវរថភ្លើង នៃព្រះរាជាណាចក្រកម្ពុជាបានប្រកាសដាក់អោយអនុវត្តជាធរមាន ប៉ុន្តែអនុក្រិតនេះពុំទាន់គ្របដណ្តប់ទៅលើដីចំណីផ្លូវក្នុងរាជធានីខេត្តក្រុង និងទីប្រជុំជននៅឡើយទេ។ការប្រើប្រាស់ដីចំណីផ្លូវក្នុងទីក្រុង និងទីប្រជុំជននាពេលបច្ចុប្បន្ន ពុំបានឆ្លើយតបទៅនឹងភាពសុខដុមរមនាក្នុងទីក្រុង និងប្រជុំជនដោយមានការរំលោភផ្សេងៗពីអ្នកប្រើប្រាស់យានយន្ត និងអ្នកប្រកបអាជីវកម្មតាមបណ្តោយផ្លូវ។
ក្នុងទិសដៅអនុវត្តបន្តឯកឧត្តមបានថ្លែងថា៖ត្រូវរៀបចំបទដ្ឋានបច្ចេកទេស ក្នុងការប្រើប្រាស់ដីចំណីផ្លូវ(ចិញ្ចើមផ្លូវ)ក្នុងទីក្រុង និងទីប្រជុំជន រៀបចំយុទ្ធសាស្ត្រ និងវិធានការចាំបាច់ចំពោះមុខក្នុងការការពារ និងអភិវឌ្ឍន៍ដីចំណីផ្លូវក្នុងក្រុង និងទីប្រជុំជន បង្កើនចក្ខុវិស័យក្នុង ការកសាងផែនការមេសម្រាប់ហេដ្ឋារចនាសម្ព័ន្ធក្នុងទីក្រុង និងទីប្រជុំជន។
លោកជំទាវ ប៉ាល់ យឿន អភិបាលរងខេត្ត ដែលបានចូលរួមក្នុងកម្មវិធីនេះ បានសំណូមពរដល់អង្គសិក្ខាសាលាចូលរួមអនុវត្តច្បាប់ស្តីពីផ្លូវថ្នល់ និងរួមសហការទប់ស្កាត់ នូវការកាន់កាប់ដីចំណីផ្លូវ ផ្តល់ព័ត៌មានដល់ប្រជាពលរដ្ឋ នូវការប្រើប្រាស់ដីចំណីផ្លូវទៅតាមប្រភេទផ្លូវដែលបានកំណត់ក្នុងប្លង់មេនៃទីក្រុង ឬទីប្រជុំជន និងចូលរួមផ្សព្វផ្សាយអំពីការប្រើប្រាស់ដីចំណីផ្លូវក្នុងលក្ខណៈបំរើសេវាសាធារណៈ សំរាប់យានយន្ត និងសម្រាប់អ្នកថ្មើរជើង រួមទាំងប្រព័ន្ធគមនាគមន៍ផ្សេងៗនៅលើដី និងក្រោមដី ដើម្បីចូលរួមក្នុងការអភិវឌ្ឍន៍ និងរៀបចំសណ្តាប់ធ្នាប់នៅតាមទីក្រុង និងទីប្រជុំជនយើងអោយបានស្អាត ជាមួយប្រមុខរាជរដ្ឋាភិបាលយើង៕
