កំពង់ឆ្នាំង៖ ថ្លែងនៅក្នុងសិក្ខាសាលាស្តីពីផលប៉ះពាល់ដីចំណីផ្លូវ នាព្រឹកថ្ងៃទី០៩ ខែកក្កដា ឆ្នាំ២០១៥ នៅក្នុងសាលានយោបាយខេត្ត លោកជំទាវ ប៉ាល់ យឿន អភិបាលរងខេត្តកំពង់ឆ្នាំងបានមានប្រតិកម្មចំពោះរថយន្តដឹកដីឯកជនមួយចំនួន ដែលបាននឹងកំពុងដឹកដីឆ្លងកាត់ផ្លូវជា
ច្រើនខ្សែនៅក្នុងឃុំស្រែថ្មី ស្រុករលាប្អៀរ បានធ្វើអោយរងនូវការខូចខាតផ្លូវជាអន្លើរៗ ការបើកប្រជែងគ្នាក្នុងល្បឿនលឿនដើម្បីដណ្តើមយកជើងដឹក ដែលសកម្មភាពបែបនេះបានធ្វើអោយប៉ះពាល់ដល់ការធ្វើដំណើរចរាចរណ៍នៅក្នុងមូលដ្ឋាន ស្នើសុំសមត្ថកិច្ចទប់ស្កាត់ជាបន្ទាន់។
លោកជំទាវបានបន្តថា៖កន្លងមកថ្មីៗនេះ ក្រោយពីមានបណ្តឹងរបស់ប្រជាពលរដ្ឋ ប្តឹងមកលោកជំទាវតាមរយៈទូរស័ព្ទ លោកជំទាវបានចុះទៅពិនិត្យមើលផ្លូវថ្នល់ និងឃ្លាំចាំមើលសកម្មភាពបើកបររបស់អ្នកបើកបររថយន្តដឹកដី ឃើញថាអ្វីដែលប្រជាពលរដ្ឋបានប្រាប់លោកជំទាវ គឺជាការពិតទាំងអស់។ដូចនេះសូមអោយសមត្ថកិច្ចជំនាញ និងមន្ទីរពាក់ព័ន្ធចុះពិនិត្យ ទប់ស្កាត់រឿងនេះឡើងវិញ កុំបណ្តោយអោយពួកគេធ្វើតាមទំនើងចិត្ត ព្រោះមិនត្រឹមតែបំផ្លាញប្រព័ន្ធផ្លូវថ្នល់ប៉ុណ្ណោះទេ ក៍អាចបង្កគ្រោះថ្នាក់ចរាចរណ៍បណ្តាលអោយមានការរបួសនិងស្លាប់ផងដែរក្នុងរយៈពេលកន្លងមក។
លោក កែវ ពៅ ប្រធានមន្ទីរសាធារណៈការ និងដឹកជញ្ជូនខេត្តបានអោយដឹងថា៖កន្លងមកមន្ទីរសាធារណៈការបានសហការជាមួយនគរបាលចរាចរណ៍ផ្លូវគោកខេត្ត ចុះចាប់រថយន្តមិនគោរពច្បាប់ទាំងនោះជាញឹកញាប់ និងបានធ្វើកិច្ចសន្យាផាកពិន័យជាមួយម្ចាស់រថយន្តជាបន្តបន្ទាប់ សូម្បីតែរថយន្តដឹកដីជ្រុះលើថ្នល់ក៍ត្រូវចាប់ផាកពិន័យដែរ។ចំពោះការលើកឡើងរបស់លោកជំទាវអភិបាលរងខេត្ត មន្ទីររបស់លោកនិងសហការជាមួយសមត្ថកិច្ចនគរបាលចរាចរណ៍ខេត្ត ចុះពិនិត្យសកម្មភាពរថយន្តដឹកដីទាំងនោះជាបន្ទាន់ផងដែរ ដើម្បីកុំអោយមានផលប៉ះពាល់ខូចខាតដល់ប្រព័ន្ធផ្លូវ និងសុវត្ថិភាពចរាចរណ៍របស់ប្រជាពលរដ្ឋក្នុងមូលដ្ឋាន។
សូមបញ្ជាក់ថា៖ការផាកពិន័យទៅលើក្រុមរថយន្តដឹកដីនៅក្នុងខេត្តកំពង់ឆ្នាំង មានសកម្មភាពដូចវែកចកក្នុងទឹក ដោយកន្លងមកសមត្ថកិច្ចនគរបាលចរាចរណ៍ខេត្ត រួមនិងមន្ទីរសាធារណៈការខេត្ត បានចាប់ផាកពិន័យ និងធ្វើកិច្ចសន្យាជាបន្តបន្ទាប់ តែសកម្មភាពរបស់គេនោះស្ងាត់បានតែមួយរយៈ បន្ទាប់មកគឺនៅតែប្រព្រឹត្តនូវសកម្មភាពល្មើសនេះដដែល។ប្រជាពលរដ្ឋបានសំណូមពរដល់សមត្ថកិច្ច និងមន្ទីរដែលពាក់ព័ន្ធ ត្រូវតែអនុវត្តទៅតាមផ្លូវច្បាប់អោយបានម៉ឺងម៉ាត់ទើគេរាងចាល ព្រោះគេបានដឹងថាគ្រប់ម្ចាស់រថយន្តដឹកដីទាំងអស់ មួយចំនួនធំពុំមានផ្លាកលេខត្រឹមត្រូវឡើយ និងសុទ្ធតែមានខ្នងបង្អែកមិនគោរពច្បាប់ និងថែមទាំងមើលងាយដល់សមត្ថកិច្ចអ្នកអនុវត្តច្បាប់ទៀតផង៕
