កំពង់ឆ្នាំង ៖ ក្រុមការងារមួយក្រុមដឹកនាំដោយលោកជំទាវ តុង ណារី សមាជិកក្រុមប្រឹក្សាខេត្ត រួមដំ ណើរដោយលោក ថោង ចំរើន ប្រធានមន្ទីរសង្គមកិច្ចខេត្ត, លោក សរ លាង ប្រធានស្តីទីមន្ទីរធម្មការខេត្ត និងអាជ្ញាធរដែនដីនៅព្រឹកថៃ្ងទី១៤ខែកក្កដាឆ្នាំ២០១៥ឯបានចុះសាកសួរសុខទុក្ខ ពិនិត្យស្ថានភាពរស់នៅជាក់ស្តែង ហើយនាំយកអំណោយ និងថវិកា របស់កាកបាទក្រហម និងសប្បុរសជនជួយឧបត្ថម្ភ សំរាលការលំបាកដល់គ្រួសារយោធិនពិការម្នាក់ រស់នៅភូមិទ័ពបោះ ឃុំធ្លកវៀន ស្រុកសាមគ្គីមានជ័យ។
លោកជំទាវ តុង ណារី សមាជិកក្រុមប្រឹក្សាខេត្ត មានប្រសាសន៍ថា៖ក្រោយពីឯកឧត្តម ឈួរ ច័ន្ទឌឿន អភិបាលខេត្តទទួលបានព័ត៌មានផ្ទាល់រៀបរាប់ពីការលំបាកយោធិនពិការ ឈ្មោះអ៊ុំ ជា រស់នៅភូមិ ឃុំខាងលើថា៖មុខរបួសកន្លែងកាត់ជើងពិការរបស់គាត់មានការឈឺគ្មានលុយព្រាបាល ឯកឧត្តមបាន
អោយក្រុមការងារបស់ខេត្ត ចុះមកសាកសួរសុខទុក្ខនិងពិនិត្យដោយផ្ទាល់ដល់មូលដ្ឋាន និងនាំយកអំណោយមកផ្តល់ជូនយោធិនពិការ ឈ្មោះអ៊ុ ជា ដែលកំពុងរស់នៅជាមួយប្រពន្ធ ឈ្មោះ ជៀស សារ៉ន មានកូន៦នាក់នៅក្នុងបន្ទុក។
លោកជំទាវបានបន្តទៀតថា៖កន្លងមកសម្តេចតេជោហ៊ុនសែន បានមានប្រសាសន៍ថាសម្តេចតែងយកចិត្តទុកដាក់ដល់អតីតយុទ្ឋជនទាំងអស់ដែលមានគុណបំណាច់ចំពោះជាតិដោយមិនប្រកាន់និន្នាការ នយោបាយនិងមិនបោះបង់ចោលឡើយទោះស្ថិតនៅមូលដ្ឋានណាក៏ដោយ។ ទន្ទឹមនិងសេចក្តីផ្តាំផ្ញើនិងការសាកសួរសុខទុក្ខរបស់សម្តេចតេជោហ៊ុនសែន សម្តេចកិត្តិព្រឹទ្ធបណ្ឌិត ប៊ុនរ៉ានីហ៊ុនសែន លោកជំទាវដោក សុទ្ធា ប្រធានក្រុមប្រឹក្សាខេត្ត និង ឯកឧត្តមឈួរ ច័ន្ទឌឿនអភិបាលខេត្ត។លោកជំទាវតុងណារីនិងក្រុមការងារ ក៏បានផ្តល់អំណោយជូនមាន៖ អង្ករ៦០គីឡូ មី១កេះ ទឹកស៊ីអ៊ីវ១យួរ ត្រីខ១០កំប៉ុង សំភារៈប្រើប្រាស់មួយចំនួនទៀត និងថវិកាចំនួន១៥ម៉ឺនរៀល សំរាប់សោហ៊ុយធ្វើដំណើរ មកកាន់អង្គការកម្ពុជាត្រាស្តខេត្តកំពង់ឆ្នាំង ដើម្បីអោយគ្រូពេទ្យពិនិត្យនិងព្យាបាលជើងដែលឈឺ និងដូរជើងសប្បនិមិត្តថ្មី។
បន្ទាប់ចុះសាកសួរសុខទុក្ខគ្រួសារលោក អ៊ុំ ជា លោកជំទាវ តុង ណារី និងក្រុមការងារក៏បាននាំយកថវិកាទៅចូលបុណ្យគ្រួសារសពលោក សៅ សារុន មន្ត្រីចូលនិវត្តន៍ចំនួន១៥ម៉ឺនរៀល លោកយាយទេព យ៉ាត ចំនួន១៧ម៉ុនរៀល និងបុរសពិការភ្នែកទាំងសងខាង៣ម៉ឺនរៀល ហើយគ្រួសារសពទាំង២នេះគឺមានទីលំនៅ ឃុំថ្មឥដ្ឋ ស្រុកសាមគ្គីមានជ័យ។ 
លោកជំទាវបានបញ្ជាក់ថា ៖អំណោយនិងថវិកាទាំងនេះបានពីការជួយឧបត្ថម្ភរបស់កាកបាទក្រហមខេត្ត,លោកថោង ចំរើន ,លោក សរ លាង,ព្រះចៅអធិការវត្តសំរោង ព្រះនាម ប៊ុន ជីង,ព្រះចៅអធិការអាស្រមត្រពាំងបី ព្រះនាម ណុប មុនី សប្បុរសជនមួយចំនួនទៀត និងលោកជំទាវផ្ទាល់ផងដែរ។
ក្នុងពេលនោះដែរលោក អ៊ុំ ជា រួម និង ក្រុមគ្រួសារ បានលើកដៃសំពះ សុំថ្លែងអំណរគុណយ៉ាងជ្រាលជ្រៅ និងសូមប្រសិទ្ឋិពរជ័យ ដល់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា សម្តេចកិតិព្រឹទ្ឋបណ្ឌិត ប៊ុន រ៉ានី ហ៊ុន សែន និងសប្បុរសជនទាំងអស់ សូមជូបតែសេចក្តីសុខ ឈ្នះមារសត្រូវគ្រប់ទិសទី ដើម្បីដឹកនាំប្រទេសកម្ពុជាទទួលបានសុខសន្តិភាព និងការអភិវឌ្ឍន៍មានការរីកចំរើនរហូតទៅ៕
