កំពង់ធំ៖ ដីចំណីស្ទឹងសែន ត្រូវបានឈ្មួញមានការឃុបឃិតគ្នាជាប្រព័ន្ឋ កាយដីយកយ៉ាងអាធិបតេយ្យ ដោយពុំមានការ គិតពផលប៉ះពាល់គិតតែពីផលចំណេញរកចំណូលចូលហោប៉ៅ ដោយមិនខ្វាល់ពីការបាក់ច្រាំងស្ទឹងនោះទេ ជាហេតុធ្វើឲ្យមានការ ក្តៅក្រហាយពីសំណាក់មហាជន ខណៈពេលដែលឃុំទទួលបានលុយពី ពីមូលនិធិឃុំ បែរជាមិន ព្រមទៅទិញដីនៅទីកន្លែងផ្សេងៗ បែរជាចង់ធ្វើនំអត់ម្សៅ ឃុបឃិតគ្នាកាយដីចំណីស្ទឹងយ៉ាងរំភើយ។
សកម្មភាពការឈូសឆាយនេះដីចំណីស្ទឹងនេះបានធ្វើឡើងនៅចំនុចភូមិ ខ្សាច់ជីរោះ ឃុំកំពង់គោ ស្រុកកំពង់ស្វាយ ខេត្តកំពង់ធំ បានធ្វើសកម្មភាពដោយពុំមានការខ្លាចញញើតសូម្បីតែបន្តិច ទោះជាដឹងថា ដីចំណីស្ទឹងនេះវានិងបាក់រៀលដាលជាមិនខាន ។ តាមការឲ្យដឹងពីលោក ស្រី ណាល់ ក្រុមប្រឹក្សាឃុំកំពង់គោ បានឲ្យដឹងថា កាលដើមឡើយ ការកាយដីនេះ គឺកាយនៅក្នុងស្ទឹង ដល់ពេលទឹកឡើងរកដីជីកពុំបាន ក៏បាននាំគ្នាកាយដីចំណីស្ទឹងនៅប៉ែកខាងលើ វិញ តែដីនេះបានដឹកយកទៅចាក់ធ្វើជាផ្លូវលំក្នុងឃុំ ដើម្បីធ្វើផ្លូវឲ្យប្រជាពលរដ្ឋប្រើប្រាស់។
លោក ចាន់ ស មេឃុំកំពង់គោ លោកបានទៅសិក្ខាសាលានៅខេត្តកំពង់ស្ពឺ បានឲ្យដឹងតាមទូរស័ព្ទថា លោកពុំបានឲ្យ កាយដីចំណីស្ទឹងនោះទេ គឺលោកអនុញ្ញាតិឲ្យកាយតែដីក្នុងស្ទឹង ដែលជាដីដុះ ហើយពុំមានផលប៉ះពាល់ដីលំនៅដ្ឋាន របស់ប្រជាពលរដ្ឋនោះទេ ហើយលោកបានសុំឲ្យទាក់ទងទៅម្ចាស់គ្រឿងចក្រ ដែលមានឈ្មោះ ទាម សៀង រស់នភូមិកំពង់ក្រប៉ៅ ក្រុងស្ទឹងសែន ខេត្តកំពង់ធំ ចំណែកលោក ទាម សៀង បានឲ្យដឹងថា គាត់ធ្វើទៅតាមដែលលោកមេឃុំ អោយធ្វើ ព្រោះជាដីនៅក្នុងដែនរបស់មេឃុំ ។
តាមការឲ្យដឹងពីប្រជាពលរដ្ឋ បានឲ្យដឹងថា ការកាយដីរបស់លោក ទាម សៀង នេះគឺមានការឃុបឃិតគ្នាជាមួយ មេឃុំកំពង់គោ ដោយអែបអាងបុគ្គលម្នាក់ឈ្មោះប៉ែន ចាន់ណា ដែលមានតួនាទីនៅសាលាខេត្តកំពង់ធំ លូកដៃក្នុងការ បើកភ្លើងខៀវឲ្យមានការកាយដីចំណីស្ទឹងសែន បង្ករឲ្យមានការព្រួយបារម្ភណ៍ប្រជាពលរដ្ឋ ដែលនិងជួបប្រទះការបាក់ច្រាង់ជាមិនខានឡើយ ។
ដោយ ផន សុខជាតិ
