កំពង់ឆ្នាំង៖ លោកមេឃុំប្រឡាយមាសមកចូលរួមប្រជុំបូកសរុបលទ្ធផលលើគ្រប់វិស័យ នៅក្នុងសា លានយោបាយខេត្ត នាព្រឹកថ្ងៃទី១៥ ខែកក្កដា ឆ្នាំ២០១៥ បាននិយាយអោយដឹងថា៖ លោក សឿន ធឿន ប្រធានសហគមន៍នេសាទអន្លង់កញ្ចុះដែលប្រជាពលរដ្ឋតវ៉ាសុំផ្លាស់ប្តូរនោះ ពេលនេះលោកបានសុំលាលែងពីតំណែងប្រធានសហគមន៍នសាទហើយ ដើម្បីកុំអោយមានបញ្ហានៅក្នុងសហគមន៍នេសាទតទៅទៀត។
លោក គង់ គន មេឃុំប្រឡាយមាសបានអោយដឹងថា៖លោក សឿន ធឿន ប្រធានសហគមន៍នសាទអន្លង់កញ្ចុះ ត្រូវបានប្រជានេសាទប្រមាណជាង៥០នាក់មកពីភូមិអន្លង់កញ្ជុះ ឃុំប្រឡាយមាស ស្រុកកំពង់លែង នាំគ្នាមកយកលិខិតតវ៉ាដែលមានស្នាមមេដៃចំនួន១១២នាក់សុំដកចេញពីប្រធានសហគមន៍នេសាទអន្លង់កញ្ចុះ ដោយពួកគាត់បានចោទប្រកាន់ថាលោកប្រធានសហគមន៍បអសមត្ថភាព។ ការដាក់លិខិតតវ៉ានេះបានធ្វើឡើងនៅព្រឹកថ្ងៃទី០៨ ខែមិថុនា ឆ្នាំ២០១៥ នៅមុខខ័ណ្ឌរដ្ឋបាលជលផលកំពង់ឆ្នាំង។ក្រោយមកបាន១ខែ នៅថ្ងៃទី១៣ ខែកក្កដា ឆ្នាំ២០១៥ លោក សឿន ធឿន បានសុំដកលាលែងពីប្រធានសហគមន៍នសាទ ដើម្បីកុំអោយប្រជានេសាទអន់ចិត្តជាមួយរូបលោក។
គួរបញ្ជាក់ថា៖រឿងចំរូងចំរាស់ជាមួយទៀតដែលទាក់ទងនឹងលោក ផាន់ ផល្លា ប្រធានសហគមន៍នសាទកំពង់ព្រះគគីរ ស្រុកបរិបូរណ៌វិញ ប្រជាពលរដ្ឋកំពុងតែងឿងឆ្ងល់នោះ គឺខុសគ្នាដាច់ស្រឡះពីលោក សឿន ធឿន ប្រធានសហគមន៍នសាទអន្លង់កញ្ចុះ ដោយលោក សឿន ធឿន ហ៊ានទទួលខុសត្រូវ ចំពោះមុខប្រជាពលរដ្ឋនៅពេលគេថាខ្លួនអសមត្ថភាព។ប៉ុន្តែលោក ផាន់ ផល្លា ប្រធានសហគមន៍នេសាទកំពង់ព្រះគគីវិញ គឺនៅឈរជើងរឹងមាំមិនទាន់មានការផ្លាស់ប្តូរ ឬសុំលាលែងពីតំណែងឡើយ ខណៈដែលបទល្មើសនេសាទបានកើតយ៉ាងច្រើនពេញឡូត៍អភិរក្សពូជត្រីស្តីពាក់កន្ទេល ស្ថិតក្នុងឃុំកំពង់ព្រះគគីរ ក្នុងឆ្នាំ២០១៤កន្លងមកក្នុងរដូវបិត និងបើកនេសាទ។បទល្មើសទាំងនោះមានដូចជា ការកាប់បំផ្លាញព្រៃលិចទឹកក្នុងតំបន់អភិរក្ស ការដាក់សម្រាស់ក្នុងតំបន់អភិរក្ស ការដាក់របាំងរាប់ពាន់ម៉ែត្រក្នុងតំបន់អភិរក្ស ដែលទង្វើទាំងនេះ គឺបានធ្វើផ្ទុយពីអនុសាសន៍ទាំង៧ចំណុចរបស់សម្តេច ហ៊ុន សែន ផ្ទុយពីច្បាប់ស្តីពីជលផលក្នុងការអភិរក្សពូជត្រី និងផ្ទុយពីច្បាប់សហគមន៍នេសាទ។
ជុំវិញបញ្ហាប្រធានសហគមន៍ទាំង២ខាងលើនេះ លោក សោម ភិរុណ នាយខ័ណ្ឌរដ្ឋបាលជលផលកំពង់ឆ្នាំងបានអោយដឹងថា៖ករណីលោក សឿន ធឿន ប្រធានសហគមន៍នរសាទអន្លង់កញ្ចុះគឺគាត់បានស្ម័គចិត្តលាលែងពីដំណែង ដូច្នេះខ័ណ្ឌរដ្ឋបាលជលផលរង់ចាំបងប្អូនប្រជានេសាទក្នុងឃុំចុះឈ្មោះចូលជាសមាជឹកសហគមន៍អោយបានច្រើនសិន នឹងធ្វើការបោះឆ្នោតជ្រើសរើសប្រធានសហគមន៍ថ្មីជំនួសលោក សឿន ធឿន។ចំណែកលោក ផាន់ ផល្លា ប្រធានសហគមន៍កំពង់ព្រះគគីរវិញ គឺគាត់មិនបានស្ម័គចិត្តចុះចេញពីតំណែងទេ ហើយខាងខ័ណ្ឌរដ្ឋបាលជលផលក៍រង់ចាំប្រជានេសាទនៅក្នុងសហគមន៍នោះចុះឈ្មោះអោយបានច្រើនដូចគ្នាដើម្បីបោះឆ្នោតទំលាក់ជ្រើសរើស ប្រធានសហគមន៍នេសាទថ្មីជំនួសវិញ៕
