ខេត្តព្រះវិហារ ស្តូបលោកតាឌីជាទីកន្លែងគោរពសក្ការបូជាសាធារណះដែលប្រជាពលរដ្ឋទូទៅនៅខេត្តព្រះវិហារមានជំនឿទៅអុជធូបបួងសួងសុំសេចក្ដីសុខបានទទួលរងការរិះគន់ខ្លះៗពីសាធារណជនចំពោះទង្វើគ្មានសណ្តាប់ធ្នាប់បង្កទ្បើងដោយក្មេងៗប្រុសស្រីរស់នៅក្បែរនោះស្រេកឃ្លានដណ្ដើមគ្នាយកសំណែនផ្លែឈើនំចំណីទៅហូបខណះទើបចាប់ផ្តើមអុចធូបដើម្បីបន់ស្រន់។ជំនឿបារមីលោកតាឌីល្បីល្បាញខ្លាំងនៅតំបន់ព្រំដែនប្រាសាទព្រះវិហារនៅក្នុងប្រវត្តិសាស្ដ្រគឺមិនសាបសូន្យទេរហូតមកដល់សព្វថ្ងៃនេះជាពិសេសមេទ័ពខ្មែរនៅព្រំដែនបច្ចុប្បន្នប្រតិបត្តិគោរពបួងសួងខ្លាំងជាងគេ។
ស្តូបលោកតាឌីអាជ្ញាធរខេត្តសាងសង់ស្ថិតនៅចំណុចច្រមុះជ្រូកជាប់ដងផ្លូវជាតិលេខ៦២ក្នុងភូមិភារកិច្ចសង្កាត់ប៉ាលហាលក្រុងព្រះវិហារកំពុងទាក់ទាញសាធារណជនមកពីទីជិតឆ្ងាយទៅគោរពអុជធូបបួងសួងសុំសេចក្ដីសុខនិងលាបំណន់ជារៀងរាល់ថ្ងៃ។រូបសំណាកមេទ័ពតាឌីជិះសេះដែលគេមានជំនឿថាមានបារមីខ្លាំងពូកែនោះត្រូវបានលាបថ្នាំថ្មីពណ៌ខ្មៅនិងទឹកមាសល្អស្អាតទ្បើងវិញហើយបន្ទាប់ពីមួយរយះពេលកន្លងមកត្រូវអ្នកចាក់ឆ្នោតកន្ទុយលេខជ្រុលនិយម១ក្រុមនាំគ្នាយកម្ស៉ៅទៅលាបអង្អែលពីលើរូបសំណាកទ្បើងសិកថ្នាំស្ទើរអស់។
តាមសេចក្ដីរាយការណ៍បានអោយដឹងថាកន្លងមករូបសំណាកលោកតាឌីជិះសេះត្រូវបានក្រុមអ្នកញៀនល្បែងស៊ីសងខុសច្បាប់ចាក់ឆ្នោតកន្ទុយលេខនាំគ្នាយកម្ស៉ៅទៅលាភប៉ាតអង្អែលពីលើរូបសំណាកសេះបណ្តើរបន់ផ្សងសំណាងសុំលេខឆ្នោតបណ្តើរគឺទ្បើងពពាលថ្នាំបាត់បង់លក្ខណះដើមស្ទើរទាំងស្រុង។ថ្មីៗនេះត្រូវអាជ្ញាធរខេត្តណែនាំដល់នគរបាលក្រុងព្រះវិហារអោយជួយធ្វើការទប់ស្កាត់ករណីមិនល្អខាងលើនេះ។
លោកគង់គារអធិការនគរបាលក្រុងព្រះវិហារបានអោយដឹងនៅព្រឹកថ្ងៃទី១៦កក្កដា២០១៥ថាលោកបានរៀបចំអោយកំលាំងនគរបាលប៉ុស្តិ៍រដ្ឋបាលប៉ាលហាលឧស្សាហ៍ឆ្លៀតពេលចុះទៅប្រចាំការនៅគោលដៅស្តូបលោកតាឌីដើម្បីជួយរៀបចំសណ្តាប់ធ្នាប់រញ៉េរញៃអោយវិលទៅរកភាពល្អធម្មតាវិញ។
លោកអធិការបន្តថាសណ្តាប់ធ្នាប់នៅទីនោះបានល្អគ្រាន់បើបន្តិចវិញហើយគឺហាមមិនអោយមានការលាបប៉ាតម្ស៉ៅលើរូបសំណាកលោកតាឌីនិងសេះមិនបណ្តោយអោយក្រុមក្មេងៗទ្បើងជិះសេះលេងនិងដណ្តើមរបស់របរសែនពីអ្នកទៅអុចធូប។ភ្នាក់ងារនិយាយថាមានពលរដ្ឋជាច្រើនបានគាំទ្រចំពោះកំលាំងនគរបាលមូលដ្ឋានក្នុងការចុះទៅជួយរៀបចំសណ្តាប់ធ្នាប់បានល្អនៅទីនោះ៕
