ខេត្តសៀមរាប៖ កម្លាំងការិយាល័យនគរបាលកំរិតស្រាលសហការជាមួយប៉ុស្តិ៍រដ្ឋបាលនគរបាលសង្កាត់ស្វាយដង្គំនិងអាជ្ញាធរមូលដ្ឋានដែលដឹកនាំផ្ទាល់លោកវរសេនីយទោ ភឹង ចិន្តារ៉េត នាយការិយាល័យនគរបាលព្រហ្មទណ្ឌកំរិតស្រាលនៃស្នងការនគរបាលខេត្តនិងមាន
ការចូលរួមពីលោក សូ ប្លាតុង អភិបាលក្រុង បានឱ្យកម្លាំងចុះឆែកឆេរទីតាំងល្បែងហ្គេមខុសច្បាប់មួយកន្លែងរហូតឈានដល់ធ្វើការឃាត់ខ្លួនបានមនុស្សប្រុសស្រីចំនួន១២នាក់ រួចយកទៅសួរនាំនៅការិយាល័យនគរបាលកំរិតស្រាលទាំងយប់ ចំណែក វត្ថុតាងដកហូតយកទៅទុកនៅសាលាក្រុងសៀមរាបដើម្បីរងចាំដោះស្រាយតាមផ្លូវច្បាប់។
ហេតុការចុះបង្ក្រាបនិងធ្វើការឆែកឆេរទីតាំងហ្គេមគ្មានច្បាប់នេះធ្វើឡើងនៅវេលាម៉ោង៨និង៣០នាទីថ្ងៃទី១៥ខែកក្កដាឆ្នាំ២០១៥ស្ថិតនៅក្នុងបរិវេណផ្សាររាត្រី ក្នុងភូមិស្ទឹងថ្មី សង្កាត់ស្វាយដង្គំ ក្រុងនិងខេត្តសៀមរាប។
តាមសម្តីលោកវរសេនីយទោ ភឹង ចិន្តារ៉េត ប្រធានការិយាល័យនគរបាលកំរិតស្រាលនៃស្នងការខេត្តបានប្រាប់អ្នកយកព័ត៍មាននៅព្រឹកថ្ងៃទី១៦ខែកក្កដានេះថា ដោយយោងតាមបទបញ្ជារបស់លោក សត ណាឌី ស្នងការនគរបាលខេត្តនិងមានការចូលរួមពីលោកអភិបាលក្រុងសៀមរាប បានឱ្យកម្លាំងការិយាល័យនគរបាលកំរិតស្រាលចុះសហការជាមួយប៉ុស្តិ៍នគរបាលសង្កាត់ស្វាយដង្គំ បង្ក្រាបករណីហ្គេមគ្មានច្បាប់ខាងលើ។លោកបន្តថា ក្រោយពីធ្វើការចុះបង្ក្រាបរហូតឈានដល់ធ្វើការឃាត់ខ្លួនបានមនុស្សប្រុសស្រីចំនួន១២នាក់រួចមកកម្លាំងជំនាញបាននាំខ្លួនអ្នកទាំងនោះយកទៅសួរនាំនៅការិយាល័យនគរបាលព្រហ្មទណ្ឌកំរិតស្រាលនៃស្នងការនគរបាលខេត្ត។លោកបញ្ជាក់បន្ថែមថា អ្នកដែលឃាត់ខ្លួនបានចំនួន១២នាក់នោះក្នុងនោះមានប្រុស៦នាក់និង(ស្រី៦នាក់ក្នុងនោះមានបុគ្គលិកសម្រាប់លក់កាក់ឱ្យភ្ញៀវចូលមកលេង២នាក់មានឈ្មោះ លៀន សុដា ភេទស្រីអាយុ២០ឆ្នាំស្រុកកំណើតនៅខេត្តកំពត បច្ចុប្បន្នស្នាក់នៅភូមិស្ទឹងថ្មី សង្កាត់ស្វាយដង្គំនិងម្នាក់ទៀតឈ្មោះ ឡាង សារី ភេទស្រីអាយុ២៥ឆ្នាំស្រុកកំណើតនៅខេតតាកែវ បច្ចុប្បន្នស្នាក់នៅភូមិស្ទឹងថ្មី សង្កាត់ស្វាយដង្គំ ពួកគេទាំង២នាក់ទើបចូលមកបំរើការងារមិនទាន់បាន១ខែនោះទេត្រូវបានឃាត់ខ្លួនតាមបញ្ជារបស់ព្រះរាជអាជ្ញាអមសាលាដំបូងខេត្តផងដែរ រីឯអ្នកលេងត្រូវបានដោះលែងឱ្យត្រឡប់ទៅផ្ទះវិញ។
ចំណែកវត្ថុតាងដែលដកហូតយកទៅទុកនៅសាលាក្រុងព្រឹកថ្ងៃទី១៦ខែកក្កដានេះរួមមាន៖ទូរហ្គេមបាញ់ត្រីចំនួន៤,ទូរហ្គេមបោះបាល់ចំនួន២,ទូរហ្គេមចាប់រង្វាន់តុកក្តាចំនួន៣,ទូរហ្គេមតុកក្តាបាញ់គ្នាចំនួន២,កាក់ចំនួន១៩៤០ដែលសមត្ថកិច្ចបានដកហូតយកទៅទុកនៅសាលាក្រុងដើម្បីរងចាំដោះស្រាយតាមផ្លូវច្បាប់។បច្ចុប្បន្នម្ចាស់ទីតាំងត្រូវបានគេចខ្លួនបាត់ តែទោះជាយ៉ាងណាក៏សមត្ថកិច្ចជំនាញនឹងតាមស្វែងរកយកមកផ្តន្ទាទោសតាមច្បាប់ឱ្យខានតែបាន។
ប្រភពពីអ្នកដែលបានឈនៅមុខទីតាំងខាងលើបានខ្សឹបប្រាប់អ្នកយកព័ត៌មានថា អ្នកគ្រប់គ្រងនៅទីនេះមានឈ្មោះ វណ្ណដា តែយប់នេះអត់ឃើញគាត់មកទេ ព្រោះកន្លែងនេះពួកគេបើកលេងជាយូឆ្នាំណាស់មកហើយ ថែមទាំងឃើញសមត្ថកិច្ចចេញចូលផងញឹកញាប់ផងដែរ ចុះហេតុអីក៏មិនចុះចាប់? បែជាចុះចាប់យប់ថ្ងៃទី១៥ខែកក្កដានេះទៅវិញ ដូច្នេះមជ្ឈដ្ឋានជុំវិញដាក់ការសង្ស័យថា ប្រហែលពីមុនមានអីៗនឹងគ្នាហើយមើលទៅ បានជាមិនចាប់៕
ដោយ ខេង ឧត្តម
