បន្ទាយមានជ័យ:ឯកឧត្ដម គោ ស៊ុំសារឿតមានប្រសាសន៍ថា: ការកាប់បំផ្លាញព្រៃឈើ នាំមកនូវគ្រោះធម្មជាតិផ្សេងៗដូចជា ខ្យល់ព្យុះ ខ្យល់កន្ទាក់ ភាពរាំងស្ងួត និងទឹកជំនន់ ហើយអាចធ្វើអោយមានការប៉ះពាល់ ដល់ហេដ្ឋារចនាសម្ព័ន ទ្រព្យសម្បាត្តិសាធារណ: និងទ្រព្យសម្បាត្តិពលរដ្ឋ។លើកឡើងដូច្នេះ ក្នុងពិធី រក្ខទិវា ៩ កក្ដដា នៅក្នុងបរិវេន ប្រាសាទបន្ទាយឆ្មារ ស្ថិតឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យកាលពីថ្ងៃទី ១៦ កក្ដដា ២០១៥។
លោក ផ្លែក វ៉ារី អភិបាលស្រុកថ្មពួករាយការណ៍ថា: ពីមុនផ្ទៃដីព្រៃឈើ មានចំនួនរហូតដល់ ៦៥,៥៤៧ហិតាចែកចេញជា ដីតំបន់ការពារទេសភាពបន្ទាយឆ្មារ និងដីព្រៃសហគមន៍។តាមរយ:ការផ្តល់កម្មសិទ្ធជូនប្រជាពលរដ្ឋ អនុវត្តបទបញ្ជាលេខ០១ បប ត្រូវកាត់ដីគម្របព្រៃឈើចំនួន ១៦,៥១១ហិតា ដីកាត់ចេញពីតំបន់ទេសភាពបន្ទាយឆ្មារ២០,៩២៥.០៥ហិតា។ ដីព្រៃដែលនៅសេសសល់ មានការ ទន្រានដែលធ្វើអោយ ព្រៃថយចុះយ៉ាងគំហក់។
លោក ជា ផល្លី នាយខណ្ឌរដ្ឋបាលព្រៃឈើខេត្តបន្ទាយមានជ័យនិយាយថាក្នុងពិធីបុណ្យនេះមានកូនដើមឈើ គ្រញូង បេង ធ្នង់ និងឈើទាល សរុបចំនួន ២០០០ដើមដែលសុទ្ធសឹងជាប្រភេទឈើប្រណិតនិងមានតំលៃជាប្រវត្តិសាស្ត្រ។ក្រៅពីដើមឈើប្រណិតដែលត្រូវដាំនៅមានកូនដើមឈើ សរុប១,០០០០ដើមបន្ថែមទៀតសម្រាបចែកដល់ពលរដ្ឋយកទៅដាំ។
ឯកឧត្ដម គោ ស៊ុំសារឿត អភិបាលខេត្តបន្ទាយថ្លែង អំពាវនាវសូមបញ្ឈប់នូវរាល់សកម្មភាពរំលោភកាន់កាប់ដីព្រៃរបស់រដ្ឋដោយខុសច្បាប់មកការដាំនិងការពារ រក្សាព្រៃឈើ ដីព្រៃនិងដាំដើមឈើឡើងវិញ ព្រោះថាការអស់ព្រៃឈើនាំមកនូវគ្រោះ ធម្មជាតិផ្សេងៗ៕
