ខេត្តប៉ៃលិន៖ ព្រឹកថ្ងៃទី១៦ ខែកក្តដា ឆ្នាំ២០១៥ អាជ្ញាធរខេត្តប៉ៃលិន បានរៀបចំទិវាអន្តរជាតិ ប្រយុទ្ធប្រឆាំងគ្រឿងញៀន ២៦ មិថុនា ២០១៥ (ក្រោមប្រធានបទ ចូរធ្វើអោយជីវិត សហគមន៍ និងអត្តសញ្ញាណយើងគ្មានគ្រឿងញៀន) ស្ថិតក្រោមអធិបតីភាព លោក ឡី ចាន់
ឆាយ ប្រធានក្រុមប្រឹក្សាខេត្តប៉ៃលិន ,លោក កើត សុធា អភិបាល នៃគណៈអភិបាលខេត្តប៉ៃលិន ដោយមានការចូលរួមពីលោក លាង សួគ៌ ប្រធានសាលាដំបូងខេត្ត ,លោក ជុំ សែនសទ្ធា ព្រះរាជអាជ្ញាអមសាលាដំបូងខេត្ត មន្ត្រីរាជការជុំវិញខេត្ត ,កងកម្លាំងប្រដាប់អាវុធ សិស្ស និស្សិត ព្រមទាំងប្រជាពលរដ្ឋសរុប២១៤នាក់ ។ ដែលការប្រារព្ធពិធីនេះ ប្រព្រិត្តទៅនៅបរិវេណដីឡូត៌មួយកន្លែង ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោក សំ សារ៉េត អភិបាលស្រុកសាលាក្រៅបានឱ្យដឹងថាៈ បច្ចុប្បន្នគ្រឿងញៀន មានសភាពស្ងប់ស្ងាត់ នូវការចរាចរឆ្លងកាត់នាំចូល តែមានការចែកចាយបន្តិចបន្តួចនូវប្រភេទថ្នាំញៀនសំយោគ មេតំហ្វេតាមីនជាដើម, ដោយក្នុងឆមាសទី១ឆ្នាំ២០១៥នេះ សមត្ថកិច្ចបានបង្ក្រាបការជួញដូរគ្រឿងញៀនបានចំនួន១២ករណី ប្រើប្រាស់ ០២ករណី ក្នុងនោះឃាត់ខ្លួនបានចំនួន ២០នាក់ ស្រី ០៣នាក់ រឹបអូសថ្នាំញៀនប្រភេទ មេតំហ្វេតាមីនចំនួន ១៦០គ្រាប់ ម៉ាទឹកកកចំនួន ១៩កញ្ចប់តូច ជញ្ជីងថ្លឹងថ្នាំញៀនចំនួន ០២ ម៉ូតូចំនួន ០៥គ្រឿង និងទូរស័ព្ទដៃ ០២គ្រឿង។
ស្រាវជ្រាវរកមុខសញ្ញាអ្នកប្រើប្រាស់គ្រឿងញៀនចំនួន ១៩២នាក់ ស្រី ១៦នាក់។ លោកបន្តទៀតថា ជាលទ្ធផលឆ្នាំ២០១៤ និងឆមាសទី១ឆ្នាំ២០១៥ នេះយើងអាចសន្និដ្ឋានបានថា ក្នុងផែនការសកម្មភាពប្រចាំឆ្នាំរបស់គណៈកម្មាធិការត្រួតពិនិត្យគ្រឿងញៀនខេត្តបានយកចិត្តទុកដាក់បង្ក្រាបបទល្មើសការប្រើប្រាស់ និងជួញដូរគ្រឿងញៀនបានល្អប្រសើរ។
លោក កើត សុធា អភិបាល នៃគណៈអភិបាលខេត្តប៉ៃលិន បានអានសារលិខិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុចា ដោយគូសបញ្ជាក់ថាៈ ទិវាប្រយុទ្ធប្រឆាំងគ្រឿងញៀន ក្រោមប្រធានបទ ចូរធ្វើអោយជីវិត សហគមន៍ និងអត្តសញ្ញាណយើងគ្មានគ្រឿងញៀន ក្នុងគោលបំណងបំផុសស្មារតី និងអំពាវនាវឲ្យជនគ្រប់រូប យកចិត្តទុកនិងចូលរួមកាន់តែសកម្មថែមទៀត គ្រប់សកម្មភាពគាំទ្រដល់ការងារប្រយុទ្ធប្រឆាំងគ្រឿងញៀន ព្រោះបើគ្មានការចូលរួមពីមហាជន ការដោះស្រាយបញ្ហាគ្រឿងញៀន ពិតជាមានភាព ស្មុគស្មាញ និងពិបាកឈានទៅរកការលុបបំបាត់ជាក់ជាមិនខាន រួមគ្នាគាំទ្រ និងធ្វើឲ្យកាន់តែប្រសើរឡើងស្របគ្នា និងវិធានការអនុវត្តគោលនយោបាយភូមិ/ឃុំមានសុវត្ថិភាព ហើយកម្មវិធី ព្យាបាល និងស្ដារនីតិសម្បទានអ្នកញៀនគ្រឿងញៀន ដោយផ្អែកលើសហគមន៍។
លោកបានបន្តថា គ្រឿងញៀន មានបញ្ហាប្រឈមដល់បុគ្គលអ្នកប្រើប្រាស់ ក្រុមគ្រួសារ សង្គមជាតិ ធ្វើឲ្យខូចសុខភាពផ្ទាល់ខ្លួន បាត់បង់ការសិក្សា ការងារ កិត្តិយស បង្កអំពើហិង្សាក្នុងគ្រួ សារ និងសហគមន៍ បំផ្លាញទ្រព្យសម្បត្តិគ្រួសារ ប្រឈមផ្លូវច្បាប់ ខូចអនាគត អាចបង្កគ្រោះថ្នាក់ដល់អាយុជីវិត ព្រមទាំងជះឥទ្ធិពលមិនល្អដល់គោលនយោបាយភូមិ/ឃុំមានសុវត្ថិភាពរបស់រាជរដ្ឋាភិបាល ពិសេសសង្គមមិនប៉ះពាល់ដល់សន្តិសុខ និងសណ្ដាប់ធ្នាប់សង្គម កាន់តែប្រសើរឡើង។ ដើម្បីឆ្លើយតបនឹងគោលបំណងឲ្យមានប្រសិទ្ធភាពនូវប្រធានបទឆ្នាំនេះ ស្ថាប័នពាក់ព័ន្ធ វិស័យសាសនា វិស័យឯកជន អង្គការដៃគូជាតិ អន្តរជាតិ ព្រមទាំងជនរួមជាតិ ចូលរួមប្រយុទ្ធប្រឆាំងគ្រឿងញៀនឲ្យទទួលបានជោគជ័យ ដោយចាត់ទុកថា គ្រឿងញៀនជាបញ្ហារបស់យើងទាំងអស់គ្នា។
ចូលរួមផ្សព្វផ្សាយអប់រំប្រជាពលរដ្ឋក្នុងមូលដ្ឋាន និងសហគមន៍ ពីផលប៉ះពាល់ និងគ្រោះថ្នាក់ដោយសារគ្រឿងញៀន ដើម្បីចាត់វិធានការសមស្របទាន់ពេលវេលា។ លោកបន្តទៀតថា៖ សមត្ថកិច្ចគ្រប់លំដាប់ថ្នាក់ ត្រូវបន្តពង្រឹងយន្តការអនុវត្តត្រួតពិនិត្យគ្រឿងញៀន ឆ្លើយតបប្រកបដោយប្រសិទ្ធភាពតាមស្ថានភាពជាក់ស្ដែង បង្ការទប់ស្កាត់ពាក់ព័ន្ធការផលិត ការដាំដុះ ការជួញដូរ ការចរាចរណ៍ ការរក្សាទុក និងការប្រើប្រាស់ខុសច្បាប់នូវគ្រឿងញៀន និងសារធាតុគីមីផ្សំគ្រប់ប្រភេទ។ បន្តផ្សព្វផ្សាយក្រុមគោលដៅ ដូចជាកម្មករ កម្មការិនី អ្នកបម្រើការងារតាមផ្ទះសំណាក់ និងសេវាកម្មកម្សាន្តនានា។ បន្តស្រាវជ្រាវ ស៊ើបអង្កេត និងបង្ក្រាបបទល្មើសពាក់ព័ន្ធគ្រឿងញៀនមកផ្ដន្ទាទោសតាមផ្លូវ។
លោកក៏បានអំពាវនាវដល់ដល់ក្មួយៗជាសិស្ស និស្សិត ត្រូវការពារខ្លួន ចេះអប់រំមិត្តភ័ក្ដិឲ្យជៀសផុតពីគ្រឿងញៀន ធ្វើជាជនបង្គោលប្រយុទ្ធប្រឆាំងគ្រឿងញៀនកាន់តែមានលទ្ធភាព សមត្ថភាព ក្នុងការចូលរួមចំណែកធ្វើឲ្យកម្ពុជា អាស៊ាន និងពិភពលោកជៀសផុតពីការគំរាមនៃគ្រឿងញៀន ដើម្បីឧត្ដមប្រយោជន៍ គឺលើកកម្ពស់សុខុមាលភាពប្រជាជន ការពារថែរក្សាសន្តិសុខ សណ្ដាប់ធ្នាប់ និងបង្កលក្ខណៈកាន់តែអនុគ្រោះដល់ការចូលរួមអភិវឌ្ឍន៍ប្រទេសគ្មាន គ្រឿងញៀន ។
ក្នុងពិធីនេះក៏មានការដុតថ្នាំញៀនប្រភេទយ៉ាម៉ាចំនួន ៣៥,៥គ្រាប់ និងម៉ាទឹកកកចំនួន៣កញ្ចប់តូច ដែលសមត្ថកិច្ចបង្រាបអូសរឹបបានកាលពីឆ្នាំ២០១៤ ៕
