ភ្នំពេញ ៖ រថយន្តកាមម៉ារីហាយប្រ៊ីតជិះដោយបុរសម្នាក់បានជិះវ៉ារថយន្តមួយគ្រឿងទៀតហើយជ្រុលទៅបុកអ្នកជិះម៉ូតូស្មាសវីពេញទំហឹងបណ្តាលឱ្យអ្នកជិះម៉ូតូ០២នាក់របួសធ្ងន់ ។
ហេតុការណ៏គ្រោះថ្នាក់ចរចារណ៏នេះកើតឡើងកាលពីវេលាម៉ោង៨និង៤០នាទីយប់ថ្ងៃទី២២មេសា២០១៤ នៅចំណុចលើស្ពានជ្រោយចង្វា ស្ថិតនៅក្នុងសង្កាត់ជ្រោយចង្វា ខណ្ឌឬស្សីកែវ ។
យោងតាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តកាមម៉ារីហាយប្រ៊ីតមួយគ្រឿងពណ៌ទឹកប្រាក់ ពាក់ស្លាកលេខភ្នំពេញ 2Y-1151 បើកដោយបុរសម្នាក់នៅលើស្ពានជ្រោយចង្វា ក្នុងទិសដៅពីលិចទៅកើតដោយព្យាយាមបើកវ៉ារថយន្តមួយគ្រឿងទៀត ក៏បានជ្រុលទៅបុកម៉ូតូស្មាសវី ពាក់ស្លាកលេខ នគរបាល1.8191ជិះគ្នា០២នាក់ក្នុងទិសដៅពីកើតទៅលិច(បញ្ច្រសទិសគ្នា) ពេញទំហឹងខ្ទាតបោកអ្នកជិះម៉ូតូទាំង០២នាក់ទៅលើថ្នល់រងរបួសធ្ងន់ធ្ងរចំណែកជនរងគ្រោះត្រូវរថយន្តសាមុយដឹកទៅសង្គ្រោះនៅមន្ទីរពេទ្យ ។
ក្រោយពេលកើតហេតុរថយន្តបង្កបានបើកគេចដល់ខាងក្រោមស្ពានហើយសមត្ថកិច្ចជិះតាមទាន់ដោយរថយន្តបង្កដាច់កាឡេខាងឆ្វេងហើយសមត្ថកិច្ចយកទាំងរថយន្តនិងម៉ូតូជនរងគ្រោះទៅរក្សាទុកនៅការិយាល័យនគរបាលចរាចរណ៏ផ្លូវគោករាជធានីភ្នំពេញ ៕
