ខេត្តសៀមរាប៖ សណ្ឋាគារសូហ្វីតែល នៅខាងអគារឌីឡាក់ដែលនៅជាន់ក្រោមកន្លែងបន្ទប់ដាក់អីវ៉ាន់ ត្រូវបានផ្ទុះស្សេខ្សែភ្លើងឆេះអស់ទាំងស្រុង ដែលជាប់របងមន្ទីពេទ្យគន្ធបុប្ផាធ្វើឱ្យមានការភ្ញាក់ផ្អើលពេញក្រុងសៀមរាប ប៉ុន្តែក្នុងហេតុការគ្រោះអគ្គីភ័យឆេះនោះគេឃើញមាន
វត្តមាន លោកអភិបាលខេត្ត,ប្រធានក្រុមប្រឹក្សាខេត្ត,អភិបាលក្រុង,លោកស្នងការ និងកម្លាំងសមត្ថកិច្ចរួមមាន៖នគរបាលពន្លត់អគ្គិភ័យ,ប៉េអ៊ឹមពន្លត់អគ្គិភ័យព្រមទាំងកម្លាំងមូលដ្ឋានចូលរួមផងដែរ។
ហេតុការធ្វើឱ្យមានការភ្ញាក់ផ្អើលពេញក្រុងសៀមរាបកើតឡើងកាលពីវេលាម៉ោង ១០និង៤០នាទីព្រឹកថ្ងៃទី១៩ខែកក្កដាឆ្នាំ២០១៥ ស្ថិតនៅសណ្ឋាគារ សូហ្វីតែលក្នុងអគារដាក់អីវ៉ាន់ជាន់ក្រោម ក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាបត្រូវ បានឆេះទាំងស្រុង ខណៈម្ចាស់សណ្ឋាគារនិងអ្នកគ្រប់ បានយកបំពង់ទៅពន្លត់អគ្គិភ័យមកពន្លត់ តែគ្រប់គ្រងស្ថានភាពមិនបាន ទើបហៅរថយន្តពន្លត់អគ្គិភ័យរបស់នគរបាលខេត្តមកជួយពន្លត់។
តាមប្រភពសាក្សីនៅកន្លែងកើតហេតុបានប្រាប់ថា មុនដំបូងពួកគាត់បានឃើញផ្សែងហុយចេញពីក្នុងសណ្ឋាគារអូតែល សូហ្វីតែល អគារខាងជើង ដែលជាប់នឹងរបងពេទ្យគន្ធបុប្ផានោះមិនដឹងជាមូលហេតុអ្វីទេ។ប្រភពបានបន្តថា មួយសន្ទុះក៏ឃើញបុគ្គលិកអូតែលនាំគ្នារត់ចេញមកក្រោយអគារដែលឆេះនោះមានកាន់ញញួរនិងបំពង់ពន្លត់អគ្គិភ័យព្រមទាំងទាញទុយ យោបាញ់ទឹកផងដែរ។ប៉ុន្តែមិនបានប៉ុន្មាននាទីផង ក៏ឃើញរថយន្តរបស់នគរបាលពន្លត់អគ្គិភ័យមកដល់ចាប់ទាញទុយ យោ បាញ់ទឹកយកតែម្តង ទើបពួកខ្ញុំដឹងថា ឆេះអូតែលនេះហើយ។
លោកវរសេនីយឯក សំ សុជាតិ ស្នងការរងទទួលបន្ទុកពន្លត់និងបង្កាអគ្គិភ័យនៃស្នងការនគរបាលខេត្តបានប្រាប់កោះសន្តិភាពតាមទូរស័ព្ទនៅរសៀលថ្ងៃទី១៩ខែកក្កដានេះថា មូលហេតុអគិ្គភ័យដែលឆេះនៅក្នុងសណ្ឋាគារសូហ្វីតែល ផ្នែកអគារដាក់អីវ៉ាន់ជាន់ក្រោម ដែលនៅពីខាងជើងជាប់របងមន្ទីរពេទ្យគន្ធបុប្ផានោះ មូលហេតុមកពីផ្ទុះស្សេឆ្លងចរន្តអគ្គិសនី តែពុំបណ្តាលឱ្យមាននរណាម្នាក់រងរបួសឡើយ រហូតមកដល់រសៀលម៉ោង២ថ្ងៃទី១៩ខែកក្កដានេះ ត្រូវបានរលត់ជាស្ថាប័ពរហើយ។លោកបន្តថា ភ្លើងដែលឆេះនៅក្នុងសណ្ឋាគារសូហ្វីតែលនេះ លោកបានបញ្ជាឱ្យរថយន្តពន្លត់អគ្គិភ័យចេញចំនួន៥ឡាន បាញ់អស់ទឹក៤ឡាន ទុកមួយឡានសម្រាប់ទ្រៀម ក្នុងការឆេះបន្តទៀតជាយថាហេតុ។
ចំណែករថយន្តពន្លត់អគ្គិភ័យរបស់កម្លាំងកងរាជអាវុធហត្ថខេត្តមកជួយពន្លត់នោះឃើញមាន៣ឡាននិងជួយបាញ់ទឹកទាំងអស់ និងទុយ យោរបស់សណ្ឋាគារបានបាញ់ទឹកអស់ជាច្រើនផងដែរ ទើបទប់ស្កាត់ស្ថានការឆេះនេះបានទាំងស្រុង។
លោកបញ្ជាក់ទៀតថា មូលហេតុដែលមុនដំបូងកម្លាំងរបស់យើងចូលមិនដល់គោលដៅនោះដោយសារ វាចេញផ្សែងមកក្រៅខ្មួលខ្មាញ់ពេក ទើបចូលមិនបាន ដល់ពេលនាំគ្នាបាញ់ទឹកអស់ប្រមាណជិត៨០% ទើបកម្លាំងនាំគ្នាចូលទៅដល់ទីតាំងដាក់អីវ៉ាន់ ប៉ុន្តែក្នុងការឆេះនៅបន្ទប់ដាក់អីវ៉ាន់នោះ សមត្ថកិច្ចជំនាញនៅមិនទាន់ដឹងថា ខូចខាតអស់សម្ភារៈដែលឆេះនោះនៅទឹកប្រាក់ប៉ុន្មានទេ ព្រោះខាងសណ្ឋាគារមិនទាន់បានប្រាប់មកសមត្ថកិច្ចរបស់ជំនាញ ។
ជុះវិញករណីដែលមានភ្លើងឆេះសណ្ឋាគារ ឬឆេះផ្ទះ លោកវរសេនីយឯក សំ សុជាតិ ស្នងការរងទទួលបន្ទុកពន្លត់និងបង្កាអគ្គិភ័យនៃស្នងការនគរបាលខេត្តសៀមរាប មេត្តាឱ្យពលរដ្ឋដែលរស់នៅក្នុងខេត្តសៀមរាប ជួយផ្តល់ដំណឹងមកខាងផ្នែករថយន្តពន្លត់អគ្គិភ័យរសប់ស្នងការខេត្តផង ដើម្បីទ្រៀមនឹងចុះទៅជួយឱ្យទាន់ពេលវេលា មិនទុកឱ្យបងប្អូនពលរដ្ឋអស់សង្ឃឹមក្នុងការជួយពន្លត់នោះទេ៕
ដោយ ខេង ឧត្តម
