ភ្នំពេញ ៖ នគរបាលប៉ុស្តិ៍មិត្តភាព បានចាប់ឃាត់ខ្លួនជនសង្ស័យ ២នាក់ នៅចំណុចផ្លូវកម្ពុជាក្រោម កែងផ្លូវ១៦៩ ខណៈជនសង្ស័យ ទាំងពីរជិះម៉ូតូមួយគ្រឿងឌុបគ្នាមកធ្វើសកម្មភាពឆក់ទូរស័ព្ទ ពីយុវជនម្នាក់កំពុងជិះម៉ូតូ ហើយព្យាយាមជិះម៉ូតូគេចខ្លូនក៏ត្រូវបានសមត្ថកិច្ចឃាត់ខ្លួនភ្លាមៗ
តែម្តង ហេតុការណ៍នេះ បានកើតឡើងកាលពីវេលាម៉ោង ១០ នឹង ៣០ នាទីយប់ថ្ងៃទី ២២ ខែមេសា ឆ្នាំ ២០១៤ ក្នុងសង្កាត់មិត្តភាព ខណ្ឌ ៧មករា ។
សមត្ថកិច្ចបាននៅមិនទាន់អាចបញ្ចាក់ពីអត្តសញ្ញាណជនសង្ស័យខាងលើបាននៅឡើយទេ ព្រោះសមត្ថកិច្ចកំពុងធ្វើការសាកសួរ ។
សាក្សីនៅកន្លែងកើតហេតុបានឲ្យដឹងថាមុនពេលកើតហេតុគេបានឃើញយុវជនម្នាក់ បានជិះម៉ូតូមួយគ្រឿងអាយខន មួយគ្រឿង បានធ្វើដំណើរឆ្លងកាត់ផ្លូវកម្ពុជាក្រោម កែងផ្លូវ១៦៩ ហើយខណៈនោះស្រាប់ តែមានជនសង្ស័យពីរនាក់ ជិះម៉ូតូមួយគ្រឿងម៉ាកស្មាស់ពណ៌ ពាក់ស្លាកលេខ បន្ទាយមានជ័យ 1E-2259 មកក្បែរនារីរងគ្រោះ នឹងបានធ្វើសកម្មភាពឆក់យកទូរស័ព្ទកាឡាស៊ីណូត ពីនារីរងគ្រោះបានសម្រេច ហើយព្យាយាមបើករត់គេចខ្លួន តែត្រូវប្រជាពលរដ្ឋនាំគ្នាដេញតាមចាប់ធ្វើឲ្យផ្អើលដល់សមត្ថកិច្ចមូលដ្ឋាន ចុះមកអន្តរាគមន៍ឃាត់ខ្លួនជនសង្ស័យ២នាក់នេះបានភ្លាមៗតែម្តង ។
បើតាមសម្ដីជនសង្ស័យបានអោយដឹងថា រូបគេបានជិះម៉ូតូប្រដេញគ្នាជាមួយមិត្តភ័ក្តិ ក៏ជួបនិងបុរសម្នាក់និយាយទូរស័ព្ទ ស្រាប់តែសមត្ថកិច្ច២នាក់ជិះម៉ូតូមួយគ្រឿងស្លៀកពាក់ស៊ីវិល បានចុះទៅដេញចាប់ពួកគេ ហើយពួកគេមិនដឹងថាជាសមត្ថកិច្ចរកតដៃ ក៏ត្រូវសមត្ថកិច្ចស្លៀកពាក់ស៊ីវិលនោះដកកាំភ្លើងភ្ជង់ចាប់បញ្ជូនទៅប៉ុស្ដិ៍នគរបាលមិត្តភាពតែម្ដង ដើម្បីធ្វើការសាកសួរបន្ត ព្រោះថាករណីខាងលើនេះគ្មានជនរងគ្រោះដាក់ពាក្យបណ្ដឹងឡើយ៕
