ក្មេងស្រីអាយុ៥ឆ្នាំម្នាក់បាត់ខ្លួនចេញពីផ្ទះដោយអាថកំបាំងបែជានាយប៉ុស្ដិ៍រដ្ឋបាលជាប់រវល់រឿងមេគោរបស់គាត់កើតកូនទៅវិញ។ហេតុការណ៍បាត់ខ្លួនកូនក្មេងនេះកើតឡើងកាលពីថ្ងៃទី១៩ខែកក្តដាឆ្នាំ២០១៥ វេលាម៉ោង១៤និង៣០នាទី ស្ថិតនៅភូមិទង្គែ ឃុំស្នោ ស្រុកព្រៃកប្បាស ខេត្តតាកែវ។ បើយោងតាមសម្ដីម្ដាយក្មេងស្រីរងគ្រោះ ឈ្មោះវ៉ែត សុខណា អាយុ៣១ឆ្នាំបាននិយាយថា កូនស្រីរបស់គាត់ឈ្មោះ ម៉េង លីហុង អាយុ៥ឆ្នាំ មុនពេលកើតហេតុកូនស្រីរបស់គាត់បានសុំលុយគាត់៥០០រៀលយកទៅទិញនំញ៉ាំ។លុះដល់ពេលបាយខ្លួនបានហៅកូនមកហូបបាយ តែរកហៅមិនឃើញ ទើបមានការភ្ញាក់ផ្អើលដល់អ្នកជិតខាងរឿងបាត់កូន ហើយបាននាំគ្នាដើររកតែរកមិនឃើញ និងបានទៅប្ដឹងសមត្ថកិច្ចឲ្យជួយរកតែលោកនាយប៉ុស្ដ៍រដ្ឋបាលឈ្មោះពុធ ប្រុស រវល់តែមើលមេគោគាត់កើតកូនមិនបានជួយដឹកនាំកម្លាំងរបស់គាត់តាមរកភ្លាមៗនោះទេ។ ជុំវិញករណីនេះផងដែរលោកអ៊ូ វណ្ណារឹទ្ធ អធិការរងទទួលបន្ទុកផ្នែកព្រហ្មទណ្ឌបានឲ្យដឹងថា រហូតមកដល់ពេលនេះកម្លាំងជំនាញរបស់លោកបាននិងកំពង់ខិតខំស្រាវជ្រាវដែរ តែនៅរកតម្រុយណាមួយពីការបាត់ខ្លួននេះមិនទាន់ឃើញនៅឡើយទេ។លោកអ៊ូ វណ្ណារឹទ្ធ បានបន្ដទៀតថាក្រោយពេលស្រាវជ្រាវពីសំណាក់សាក្សីជាច្រើនរូបមានការ
អះអាងផ្សេងៗពីគ្នា ជាពិសេសសម្ដីរបស់ម្ដាយក្មេងស្រីរងគ្រោះបាននិយាយថា ការបាត់ខ្លួនកូនស្រីរបស់គាត់គឺមានមនុស្សប្រុសមិនស្គាល់អត្តសញ្ញាណម្នាក់ស្លៀកពាក់ឯកសណ្ឋានជាទាហានជិះម៉ូតូមិនស្គាល់ម៉ាកដែលពាក់ស្លាកលេខ ខ ម ជាអ្នកចាប់កូនរបស់គាតយកទៅ។ ជុំវិញករណីនេះប្រជាពលរដ្ឋរស់នៅតំបន់កើតហេតុបានធ្វើការរិះគន់ធ្ងន់ៗថា កម្លាំងប៉ុស្ដិ៍នគរបាលរដ្ឋបាលឃុំស្នោហាក់មិនគិតគូរសោះក្នុងការស្រាវជ្រាវស៊ើបអង្កេតទៅលើសំណុំរឿងនេះ ដោយមន្ត្រីប៉ុស្ដ៍ជាច្រើនអ្នក គិតតែពីផឹកគ្រឿងស្រវ៉ឹង ឯមេប៉ុស្ដិ៍វិញគិតតែពីការថែទាំមេគោរបស់គាត់កើតកូនទៅវិញ។
