កំពង់ឆ្នាំង៖ ឯកឧត្តមបានព្រមានបែបនេះដល់សមត្ថកិច្ច និងអាជ្ញាធរគ្រប់មូលដ្ឋានដែលបានមកចូលរួមប្រជុំបូកសរុបត្រួតពិនិត្យលទ្ធផល នៃការអនុវត្តន៍កម្មវិធីនយោបាយចតុកោណដំណាក់កាលទី៣ របស់ក្រុមការងារថ្នាក់ជាតិចុះមូលដ្ឋានខេត្តកំពង់ឆ្នាំងប្រចាំឆមាសទី១ នៅ
ក្នុងសាលាខេត្តកំពង់ឆ្នាំងនាព្រឹកថ្ងៃទី២០ ខែកក្កដា ឆ្នាំ២០១៥ ដោយមានការចូលរួមពីសមាជឹកក្រុមការងារថ្នាក់ជាតិ អាជ្ញាធរគ្រប់ស្រុក និងប្រធានមន្ទីរ អង្គភាពជុំវិញខេត្តចូលរួមសរុប១៥៦នាក់។
នៅក្នុងរបាយការណ៍បូកសរុបត្រួតពិនិត្យលទ្ធផល នៃការអនុវត្តន៍កម្មវិធីនយោបាយចតុកោណដំណាក់កាលទី៣ របស់ក្រុមការងារថ្នាក់ជាតិចុះមូលដ្ឋានខេត្តកំពង់ឆ្នាំងប្រចាំឆមាសទី១ នៅក្នុងសាលាខេត្តកំពង់ឆ្នាំង ដែលអានដោយឯកឧត្តម ឈួរ ច័ន្ទឌឿន អភិបាលខេត្ត និងជាអនុប្រធានអចិន្ត្រៃយ៍ក្រុមការងារថ្នាក់ជាតិ បានលើកឡើងថា៖នៅក្នុងវេទិការសាធារណៈកន្លងមក ប្រជាពលរដ្ឋស្រុកកំពង់លែង បានលើកសំណួរថា«តម្លៃចម្លងសំបុត្របញ្ជាក់កំណើតនៅក្នុងវិក័យប័ត្រយកត្រឹមតែ៥ពាន់រៀលប៉ុណ្ណោះ ហេតុអ្វីមន្ត្រីអត្រានុកូលដ្ឋានស្រុកយកដល់៦ពាន់រៀល?។ តម្លៃធ្វើអត្តសញ្ញាណប័ណ្ណក្នុងវិក័យប័ត្រកំណត់យកត្រឹមតែ១ម៉ឺនរៀល ហេតុអ្វីនគរបាលយកដល់១ម៉ឺន២ពាន់ ទៅ១ម៉ឺន៥ពាន់រៀល?។ការធ្វើច្បាប់អាពាហ៍ពិពាហ៍ ប្រជាពលរដ្ឋមានចម្ងល់ថា ហេតុអ្វីយកសេវាដល់ទៅ៩ម៉ឺន៧ពាន់រៀល?»។
នៅក្នុងរបាយការណ៍លោក ស៊ុំ សុជាតិ ស្នងការរងនគរបាលខេត្តកំពង់ឆ្នាំងបានបំភ្លឺថា៖ការធ្វើអត្តសញ្ញាណប័ណ្ណគឺមានតម្លៃ១ម៉ឺនរៀល ហើយចំពោះអ្នកដែលយកហួសពីតម្លៃនេះ ត្រូវតែទទួលទោសតាមផ្លូវច្បាប់។ចំពោះការចម្លងសំបុត្របញ្ជាក់កំណើត នៅក្នុងរបាយការណ៍លោកអភិបាលស្រុកកំពង់លែង បានបំភ្លឺថា៖គឺយកត្រឹមតែ៥ពាន់រៀល បូកនឹងថ្លៃតែម២រយរៀលប៉ុណ្ណោះ បើមន្ត្រីអត្រានុកូលដ្ឋាននៅសាលាស្រុកយកលើស ស្រុកនឹងចាត់វិធានការណ៍។ដោយឡែកលោក ចេង ញ៉ាន់ អភិបាលរងខេត្តបានបញ្ជាក់នៅក្នុងរបាយការណ៍នោះដែរថា បញ្ហាតម្លៃសេវាសាធារណៈទាំងនេះ គឺអនុវត្តតាមប្រកាសអន្តរក្រសួង រវាងក្រសួងហិរញ្ញវត្ថុ និងក្រសួងមហាផ្ទៃ ហើយតម្លៃសេវានេះក៍មានបិតនៅតាមសាលាឃុំនីមួយៗផងដែរ។បើក្រុមការងាររកឃើញថា សាលាឃុំយកលើសពីនេះ ត្រូវរាយការណ៍ជូនរដ្ឋបាលខេត្តចាត់ការតាមផ្លូវច្បាប់។
ឯកឧត្តម អ៊ុក រ៉ាប៊ុន ប្រធានក្រុមការងារថ្នាក់ជាតិចុះមូលដ្ឋានកំពង់ឆ្នាំងបានបកស្រាយ និងព្រមានថា៖ទាក់ទងនឹងការយកតម្លៃសេវាសាធារណៈលើសការកំណត់ ដែលប្រជាពលរដ្ឋស្រុកកំពង់លែងបានលើកឡើងកន្លងមក ក្រុមការងារចុះមូលដ្ឋានមិនគួរបកស្រាយជូនប្រជាពលរដ្ឋអោយរួចតែខ្លួននោះទេ ចំពោះពាក្យនិយាយថា នឹងចាត់ការតាមផ្លូវច្បាប់ ចំពោះមន្ត្រីដែលពាក់ព័ន្ធយកតម្លៃសេវាសាធារណៈលើសតម្លៃកំណត់ខាងលើនេះ។រឿងនេះ ក្រុមការងារចុះមូលដ្ឋាន និងសមត្ថកិច្ចពាក់ព័ន្ធគួរតែស្រាវជ្រាវរកមន្ត្រីពាក់ព័ន្ធខាងលើអោយឃើញ ហើយចាត់វិធានការណ៍ណែនាំអប់រំ ធ្វើកិច្ចសន្យាបញ្ឈប់ បើគេមិនកែខ្លួនត្រូវដាក់ទោសទណ្ឌ ឬចោទប្រកាន់ប្តឹងទៅតុលាការតាមផ្លូវច្បាប់ ហើយត្រូវបកស្រាយរឿងទាំងអស់នេះអោយប្រជាពលរដ្ឋដឹងឮវិញ ដើម្បីអោយប្រជាពលរដ្ឋគាំទ្រគោលនយោបាយរបស់រាជរដ្ឋាភិបាល និងមានជំនឿលើក្រុមការងារថ្នាក់ជាតិចុះមូលដ្ឋានដែលបង្កើតឡើងដោយប្រមុខរាជរដ្ឋាភិបាល និងក៏មិនប៉ះពាល់ដល់សន្លឹកឆ្នោតគាំទ្រផងដែរ៕
