ខេត្តសៀមរាប៖កម្លាំងសមត្ថកិច្ចចំរុះបានចុះឆែកឆេទីតាំងស្តុបម៉ូតូ កង់ ដែលបានដាក់បញ្ចាំគ្មានច្បាប់ទម្លាប់មួយ ដែលមានទីតាំងស្ថិតនៅក្នុងភូមិ អារញ្ញ័ សង្កាត់សៀមរាប ក្រុង ខេត្តសៀមរាប ក្នុងការចុះបំពេញបេសកកម្មត្រួតពិនិត្យ របស់គណៈកម្មការដោះស្រាយគោល
នយោបាយផលប៉ះពាល់ ក្នុង គម្រោងស្តារស្ទឹងសៀមរាប ជំហានទី២នោះ កម្លាំងសមត្ថកិច្ចប៉ុស្តិ៍នគរបាលសង្កាត់សៀមរាប បានជួបកន្លែងដាក់ បញ្ចាំម៉ូតូ កង់ នៅវេលាម៉ោង១០និង៣០នាទី នាថ្ងៃទី ២១ ខែ កក្កដា ឆ្នាំ២០១៥ ដែលមានទីតាំងស្ថិតនៅក្នុងភូមិ អារញ្ញ័ សង្កាត់សៀមរាប ក្រុង ខេត្តសៀមរាប ហើយត្រូវបានរាយការណ៍ជូនដល់អធិការនគរបាលក្រុង ចុះមកធ្វើការត្រួតពិនិត្យ ដោយមានការសម្របសម្រួលដឹកនាំដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាបផងដែរ ។
ហេតុការចុះដកហូតយកម៉ូតូនោះធ្វើឡើងនៅវេលាម៉ោង១៣ និង ១៥នាទីថ្ងៃទី២១ខែកក្កដា ស្ថិតនៅក្នុងភូមិ អារញ្ញ័ សង្កាត់សៀមរាប ក្រុង ខេត្តសៀមរាប ។
តាមប្រភពពីកម្លាំងចំរុះបានចុះមកធ្វើការ ត្រួតពិនិត្យ បានប្រាប់ ថា ទីតាំងបញ្ចាំម៉ូតូនេះ ពុំមានច្បាប់អនុញ្ញាតឡើយ ដោយមានម្ចាស់ឈ្មោះ ឡាយ គឹមហួ ភេទ ស្រី អាយុ ៦៨ឆ្នាំ ដែលជាជនជរាពិការ ដេកនៅជាប់នឹងកន្ទេល ដែលជាអ្នកទទួលបញ្ចាំទាំងនេះ ។
តាមសម្តីរបស់ប្រជាពលរដ្ឋរស់នៅជិតខាងបានឲ្យដឹងថា លោកយាយពិការខាងលើនេះ បានប្រកបរបរបញ្ចាំម៉ូតូនិងកង់ទំនើបៗនេះជាយូឆ្នាំមកហើយក្នុងការចិញ្ចឹមជីវិតរបស់គាត់ ពុំដែលមានសមត្ថកិច្ច ឬអាជ្ញាធរមូលដ្ឋានណាចុះមកក្បែរទីនោះឡើយ គឺមានម្តងម្កាលកម្លាំង នគរបាលប៉ុស្តិ៍ម្នាក់ សុំមិនបញ្ចេញឈ្មោះតែងតែមកសួរនាំ នៅពេលដែលមានការបាត់បង់ម៉ូតូពីកន្លែងផ្សេងៗ ។
ក្នុងកិច្ចចុះប្រតិបត្តិការនេះ កម្លាំងសមត្ថកិច្ចបានឲ្យដឹងថា ម៉ូតូដែលបានចូលមកកន្លែងកុងស៊ីបញ្ចាំនេះ មានចំនួនជាង ៧០គ្រឿង ហើយត្រូវបានព្រះរាជអាជ្ញារង បានបញ្ជាឲ្យធ្វើការប្រមូលផ្តុំនិងដកហូត ដើម្បីដឹកជញ្ជូនយកទៅរក្សាទុកនៅ អធិការដ្ឋាននគរបាលក្រុងសៀមរាប រីឯម៉ូតូចំនួន ២០គ្រឿង នឹង នៅសល់ប៉ុន្មានទៀតត្រូវរក្សាទុកនៅទីតាំងនេះដដែល សិន។
បើតាមការវាយតម្លៃរបស់ព្រះរាជអាជ្ញារង និង កម្លាំងសមត្ថកិច្ច បានឲ្យដឹងថា តាមរូបភាពនេះ ចំពោះលោកយាយជរា ពិការដែលមិនអាចចាកចេញទៅណាពុំបានព្រោះ គាត់ពុំមានលទ្ធភាពធានារាប់រងទទួលបញ្ញើបញ្ចាំនេះទេ ក្នុងស្ថានភាពទាំងនេះពិតជាមានអ្នកនៅពីក្រោយខ្នង ឬ ក៏ជួលទីតាំងផ្ទះរបស់គាត់សម្រាប់ដាក់ម៉ូតូបញ្ចាំទាំងអស់នេះ ទុកសម្រាប់ឲ្យគាត់ជួយមើល ដើម្បីបន្លំភ្នែកសមត្ថកិច្ច។
តាមការសង្កេតរបស់អ្នកសារព័ត៌មានយើងឃើញថា ទីតាំងបញ្ចាំម៉ូតូនេះ គឺមានទទួលបញ្ញើបញ្ចាំម៉ូតូគ្រប់ប្រភេទ រួមទាំងកង់ និង រឺម៉ក់ រទេះអូសជាដើមទៀតផង ។
តាមការបញ្ជាក់របស់លោកនាយមេប៉ុស្តិ៍សង្កាត់សៀមរាបបានឲ្យដឹងថា ម៉ូតូដែលត្រូវបានយកមកបញ្ចាំនេះ មកពី ៣ភូមិ ក្នុងសង្កាត់សៀមរាបនេះ ហើយនៅព្រឹកថ្ងៃទី២២ ខែកក្កដានេះ នឹងឲ្យម្ចាស់ម៉ូតូដែលបានបញ្ចាំទាំងអស់ យកចុងប័ណ្ណបញ្ចាំ ទៅធ្វើការផ្ទៀងផ្ទាត់ និង គល់ប័ណ្ណបញ្ជីដែលអ្នកទទួលបញ្ជើបញ្ចាំ នៅអធិការដ្ឋាននគរបាលក្រុង ព្រមទាំងធ្វើការអប់រំ ណែនាំ ដល់ម្ចាស់ទទួលបញ្ញើបញ្ចាំ ឲ្យចូលខ្លួនមកធ្វើច្បាប់ប្រកបអាជីវកម្មកុងស៊ីបញ្ចាំនេះ ឲ្យបានត្រឹមត្រូវទៅតាមផ្លូវ ច្បាប់ផងដែរ ៕
ដោយ ឧត្តម
