ខេត្តតាកែវ៖ បុរសម្នាក់បានរងរបួសបាក់ជើងក្នុងហេតុការណ៍គ្រោះថ្នាក់ចរាចរណ៍មួយរវាងរថយន្ត និងម៉ូតូ ដែលមានទិសដៅបញ្ច្រាស់ទិសគ្នា ហេតុការណ៍នេះកើតឡើង កាលពីវេលាម៉ោង ១៨ និង ៤៥ នាទី ថ្ងៃទី២៦ ខែកក្កដា ឆ្នាំ២០១៥ នៅលើកំណាត់ផ្លូវជាតិលេខ៣ ចន្លោះ
បង្គោលគីឡូម៉ែត្រលេខ ៤៦-៤៧ស្ថិតក្នុងភូមិត្រពាំងឈូក ឃុំសូភី ស្រុកបាទី ខេត្តតាកែវ ។ តាមសាក្សីនៅកន្លែងកើតហេតុបានឲ្យដឹងថា មុនពេលគ្រោះថ្នាក់ចរាចរណ៍នេះកើតឡើង ពួកគាត់បានឃើញរថយន្ត និង ម៉ូតូ បើកបរបញ្ច្រាសទិសគ្នាដោយរថយន្តបើកក្នុងល្បឿន លុះមកដល់ចំណុចកើតហេតុខាងលើ មិនដឹងជាយ៉ាងម៉េចបានជារថយន្តរេចង្កូតចូលផ្លូវខាងឆ្វេងក៏បណ្តាលឲ្យប៉ះនិងម៉ូតូ១គ្រឿងដែលកំពុងបើកបរដូចគ្នាក្នុងល្បឿនមធ្យមមកពីទិសខាងជើងមកត្បូងបណ្តាលឲ្យដួលនិងបាក់ជើងខាងឆ្វេងម្ចាងទៅ។ មន្ត្រីនគរបាលចរាចរណ៍ស្រុកបាទី បានឲ្យដឹងថា អ្នកបើកបរម៉ូតូឈ្មោះ ពៅ ភាស់ ភេទប្រុស អាយុ៤៥ឆ្នាំ មុខធ្វើស្រែ មានទីលំនៅភូមិពានមាសខាងលិច ឃុំលំពង់ ស្រុកបាទី ខេត្តតាកែវ ជិះម៉ូតូ១គ្រឿងម៉ាក សេ១០០ (កូរ៉េ) ពណ៌ក្រហម គ្មានស្លាកលេខ បើកបរមកពីទិសខាងជើង បណ្តាលឲ្យរងរបួសបាក់ជើងខាងឆ្វេង ។ ចំណែឯរថយន្តម៉ាកហ៊ីយ៉ាន់ដាយស្តារិច ពណ៌ប្រផេះ ផ្លាកលេខ ភ្នំពេញ 2Q-6544 មកពីទិសខាងត្បូង បើកបរដោយឈ្មោះ លីន ហារីយ៉ា ភេទប្រុស អាយុ២៨ឆ្នាំ មានទីលំនៅភូមិចំការសំរោង២ សង្កាតសំរោង ក្រុងបាត់ដំបង ខេត្តបាត់ដំបង ។ ក្រោយពេលទទួលបានព័ត៌មានអំពីគ្រោះថ្នាក់ចរាចរណ៍នេះ សមត្ថកិច្ចចរាចរណ៍ស្រុកបាទី បានចុះដល់កន្លែងកើតហេតុ និងបញ្ជូនជនរងគ្រោះទៅកាន់មន្ទីពេទ្យ ចំណែកម៉និងរថយន្តត្រូវបានធ្វើកំណត់ហេតុដកហូតទាំងពីរគ្រឿង យកមករក្សាទុកអធិការដ្ឋាននគរបាលស្រុកបាទី ដើម្បីបំពេញបែបបទធ្វើការដោះស្រាយ តាមនីតិវិធី ៕
