ខេត្តឧត្តរមានជ័យ៖ មន្ត្រីជំនាញរដ្ឋាបាលព្រៃឈើស្រុកត្រពាំងប្រាសាទរួមទាំងកំលាំងសមត្ថកិច្ចចំរុះក្នុងស្រុកបាន ស្ទាក់ចាប់បង្ក្រាបបានរថយន្តឆ្លាមមួយគ្រឿងផ្ទុកបទល្មើសឈើក្រញ៉ូងពេញប្រៀប រួមទាំងតៃកុងរថយន្តម្នាក់។ កាលពីវេលាម៉ោង៥ទាបភ្លឺរ ថ្ងៃទី២៦ ខែកក្កដា ឆ្នាំ២០១៥ ស្ថិតនៅចំនុចភូមិ ព្រះចំបក់ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ។រថយន្តដែលបានផ្ទុកឈើក្រញ៉ូងម៉ាក កាមរីឆ្លាម ពណ៌ឈ្លូញ ពាក់ស្លាកលេខ ភ្នំពេញ២C:5129 បើកបរដោយឈ្មោះ វ៉ាន់ សម្បត្តិ ភេទប្រុស អាយុ២៩ ឆ្នាំ រស់នៅភូមិឃ្លាំងកណ្ដាល ឃុំត្រពាំងប្រិយ៍ ស្រុកអន្លង់វែង។ រីឯម្ចាស់រថយន្តត្រូវបានសមត្ថកិច្ចស្គាល់ឈ្មោះ អ៊ុង រស់នៅភូមិអូរជញ្ជៀន ឃុំអន្លង់វែង ស្រុកអន្លង់វែង ។ ដែលបានទិញឈើរបស់ឈ្មោះ ខុម ជឿន រស់នៅភូមិ ឃុំអូរស្វាយ ស្រុកត្រពាំងប្រាសាទ។បើយោងតាមសេចក្ដីរាយការពីសមត្ថកិច្ចម្នាក់សូមមិនបញ្ចេញឈ្មោះ ដែលក្នុងសកម្មភាពបង្ក្រាបបានឃើញគល់បញ្ជីទិញឈើក្រញ៉ូងរបស់ឈ្មួញនិងរបាយការណ៍ ជំនាញរដ្ឋបាលព្រៃឈើមានការខុសប្លែកគ្នា ដោយគេសង្ស័យថាមានការបាត់បង់។នៅក្នុងគល់បញ្ជីរបស់ឈ្មួញចំនួនឈើ៩ ជញ្ជីង ស្មើរ៦៥ដុំ មានចំនួន១១៤៨គីឡូក្រាម រីឯរបាយការរដ្ឋាបាលព្រៃឈើពិនិត្យឃើញមាន៣១ដុំ ស្មើ៦២៥គីឡូក្រាម ដោយមានការបាត់បង់ឈើចំនួន៣៤ដុំ និងទម្ងន់៥២៣គីឡូក្រាម។
សេចក្ដីរាយការណ៍ពីសមត្ថកិច្ចស្រុកត្រពាំងប្រាសាទជាច្រើននាក់ទៀតបានរាយការណ៍ថា ការបង្ក្រាបរបស់មេព្រៃបានធ្វើអោយមានការបាត់បង់វត្ថុតាងឈើក្រញ៉ូងមួយចំនួនខាងលើពិតប្រាកដមែន។លោក សុង បញ្ញា មន្ត្រីជំនាញរដ្ឋាបាលព្រៃឈើស្រុកត្រពាំងប្រាសាទបានអោយដឹងតាមទូរស័ព្ទថា តួលេខចំនួនឈើមានពីរថយន្តក៏ថាបាន ពីព្រោះកំលាំងសមត្ថកិច្ចនៅជួបជុំគ្នាទាំងអស់ ដោយពិនិត្យឃើញ តែ៣១ដុំ មានទម្ងន់៦២៥គីឡូក្រាម។
លោក ញ៉ែម ណាយវ៉ាន់ នាយសង្កាត់រដ្ឋាបាលព្រៃឈើស្រុកត្រពាំងប្រាសាទ ទូរស័ព្ទចូលតែគ្មានអ្នកទទួល៕
