ខេត្តកំពង់ឆ្នាំង ៖ កុមារីស្រីអាយុ២ឆ្នាំម្នាក់ បានស្លាប់ភ្លាមៗក្នុងក្តីរន្ធត់ បន្ទាប់ពីត្រូវកង្ហារកែច្នៃបក់កម្ទេចពោត កាប់ពុះចំកណ្តាលថ្ងាសបណ្តាលអោយបែកដល់បែកលលាដ៍ ករណីនេះបានកើតឡើងនៅភូមិកោះឫស្សី ឃុំប្រឡាយមាស ស្រុកកំពង់លែង ខេត្តកំពង់ឆ្នាំងនៅវេលាម៉ោង ៩និង១០នាទីព្រឹកថ្ងៃទី២៧ ខែកក្កដា ឆ្នាំ២០១៥ ខណៈក្មេងស្រីរូបនេះបានដើរជិត ស្លាបកង្ហារដែកដែលកំពុងវិល បក់កម្ទេចពោត ។សមត្ថកិច្ចនគរបាលមូលដ្ឋានបានអោយដឹងថា៖ ក្មេងស្រីរងគ្រោះមានឈ្មោះ ស៊ីវ ថាវ អាយុ២ឆ្នាំមានឪពុកឈ្មោះ ព្រឿន ថា អាយុ៣០ឆ្នាំ ម្តាយឈ្មោះ គង់ ភី អាយុ២៩ឆ្នាំ គ្រួសារខាងលើមានទីលំនៅ ភូមិឃុំកន្លែងកើតហេតុខាងលើ ។
ប្រភពដដែលបានបន្តថាៈ មុនពេលកើតហេតុ ឪពុកម្តាយខាងលើបានយកកង្ហារ មានស្លាបដែកកែឆ្នៃ ត ភ្ជាប់ចេញពីម៉ាស៊ីនគោយន្តដែលមានស្លាបម្ខាងៗ ប្រវែងជិត មួយម៉ែត្រ មកដាក់បញ្ឆេះគោយន្ត អោយកង្ហារវិល ដើម្បីយកខ្យល់ទៅបក់ រោយកម្ទេចពោត។ដោយសារមិន បានប្រយ័ត្នកូនតូច អាយុ២ឆ្នាំដែលចេះដើរតេះតះ បានដើរទៅរកកង្ហារ ហើយត្រូវស្លាកកង្ហារវិលកាប់ចំថ្ងាស់បណ្តាលអោយបែកដល់លលាដ៏ក្បាល ស្លាប់នៅនឹងកន្លែងយ៉ាងអាណោចអាធម្ម។លោក ប៉ាល់ ជឿន អធិការនគរបាលស្រុកកំពង់លែងបានអោយថាៈ ចំពោះឪពុកម្តាយក្មេងស្រីរងគ្រោះ ដែលមានការធ្វេសប្រហែស បណ្តែតបណ្តោយអោយកូនស្លាប់បែប
នេះ គឺមិនទាន់ត្រូវទទួលទោសទណ្ឌ័បែបណានោះទេ ព្រោះវាជាកំហុសអចេតនា អ្នកណាក៏ស្រឡាញ់កូនដែរ ពេលនេះក្រុមគ្រួសារខាងលើនេះកំពុងធ្វើបុណ្យសពកុមារីរងគ្រោះ ក្រោមក្តីសោកស្តាយ និងមានវិប្បដិសារី យ៉ាងខ្លាំងចំពោះការធ្វេសប្រហែស តែមួយភ្លែតបណ្តាលអោយកូនជាទីស្រឡាញ់ បាត់បង់ជីវិត។លោកអធិការនគរបាលស្រុក សូមអំពាវដល់ កសិករតាមដងទន្លេ ដែលតែងតែ ប្រើមធ្យាបាយខាងលើនេះដើម្បីបក់កម្ទេចពោត កម្ទេចសណ្តែក និងកសិផលផ្សេងៗ សូមប្រុងប្រយ័ត្នអោយបានខ្ពស់ពេលប្រើឧបករណ៏កែឆ្នៃដូចនេះ ដើម្បីកុំអោយមានគ្រោះថ្នាក់ដូចខាងលើនេះទៀត៕ 
