បន្ទាយមានជ័យ៖ គ្រឿងញៀន ជាបញ្ហាដ៍ក្តៅគគុកនៅក្នុងប្រទេសកម្ពុជា និងជាអាវុធដ៏គ្រោះថ្នាក់បំផុត បំផ្លាញសង្គមជាតិ ដើម្បីកាត់បន្ថយការប្រើប្រាស់ជួញដូរគ្រឿងញៀនខុសច្បាប់អោយមានប្រសិទ្ធភាព ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បាន
យកសិស្សានុសិស្សនៅវិទ្យាល័យមង្គលបូរី ខេត្តបន្ទាយមានជ័យ ជាគោលដៅសំខាន់ ក្នុងការផ្សព្វផ្សាយច្បាប់ស្តីពីការត្រួពិនិត្យគ្រឿងញៀន នាព្រឹកថ្ងៃទី២៩ កក្កដា ២០១៥ ។
លោក ខុន សុខុម ប្រធានមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានលើកបង្ហាញពីច្បាប់ស្តីពី ការត្រួតពិនិត្យគ្រឿងញៀន បានផ្តោតសំខាន់ទៅលើទោសបញ្ញាត្តិយ៉ាងតឹងរឹងលើអ្នកប្រើប្រាស់ រក្សាទុក ជួញដូរសារធាតុញៀន ដើម្បីអោយអ្នកប្រព្រឹត្តផ្ទុយនឹងច្បាប់នេះ មានការរាងចាល ។
ឯកឧត្តម ស៊ុំ រុំ អនុរដ្ឋលេខាធិការ និងតំណាងដ៏ខ្ពង់ខ្ពស់របស់លោកជំទាំវ ម៉ែន សំអន ឧបនាយករដ្ឋមន្ត្រី រដ្ឋមន្ត្រី ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានមានប្រសាសន៍ថា ការដែលផ្សព្វផ្សាយច្បាប់ស្តីពីការត្រួតពិនិត្យគ្រឿងញៀនដល់សិស្សានុសិស្សនេះក៏ព្រោះតែ អ្នកញៀនគ្រឿងញៀនភាគច្រើនគឺជាយុវជន ហើយយុវជនក៏ជាទំពាំងស្នងឬស្សីសម្រាប់អភិវឌ្ឍន៍ប្រទេស ។
ម្យ៉ាងទៀតគ្រឿងញៀនបានក្លាយជាវិញ្ញាសារដ៏ចម្បង និងក្តៅគគុកនៅក្នុងប្រទេសកម្ពុជា និងជាអាវុធដ៏គ្រោះថ្នាក់បំផុត បំផ្លាញសង្គមជាតិ គ្រួសារ និងកោសិការអភិវឌ្ឍន៍ជាតិ ដូចជាយុវជនជាដើម ។ ដើម្បីឆ្លើយតប នឹងសភាពគ្រោះថ្នាក់ដ៏ធ្ងន់ធ្ងរដែលមានការព្រួយបារម្ភយ៉ាងខ្លាំងក្លាពីពលរដ្ឋ និងរដ្ឋាភិបាល ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ដែលជាសេនាធិការរបស់រដ្ឋាភិបាលបានសហការជាមយយមន្ទីរ និងអង្គភាពជំនាញធ្វើការផ្សព្វផ្សាយច្បាប់ ស្តីពីការត្រួតពិនិត្យគ្រឿងញៀន ដើម្បីបញ្ជៀបការយល់ដឹងបន្ថែមទៀតដល់សិស្សានុសិស្ស វៀរចារការប៉ះប៉ាល់ និងសេពគ្រឿងញៀន៕
