ខេត្តសៀមរាប៖ លោក អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានថ្លែងទៅកាន់អាជ្ញាធរចំនួន៧រួមខេត្តសៀមរាប បាត់ដំបង បន្ទាយមានជ័យ ពោធិសាត់ កំពង់ធំនិងខេត្តព្រះវិហារនៅព្រឹកថ្ងៃទី២៩ខែកកដ្កាឆ្នាំ២០១៥នៅខេត្តសៀមរាបនេះថា
បច្ចុប្បន្ននេះបញ្ហាទំនាស់ដីធ្លីរវាងដីរដ្ឋ និងដីរបស់ប្រជាពលរដ្ឋ ជាពិសេសគឺដីរដ្ឋដែលបានសម្បទានសេដ្ឋកិច្ចទៅឲ្យវិស័យឯកជនតែងតែកើនមានជាបន្តបន្ទាប់និងមានភាពស្មោកស្មាញយ៉ាងខ្លាំង ដូច្នេះដើម្បីបង្កភាពងាយស្រួលសម្រាប់ការគ្រប់គ្រងដីរបស់រដ្ឋរាជរដ្ឋាភិបាលបានចាប់ផ្តើមធ្វើកំណែទំម្រង់វាស់វែងដីរដ្ឋសាជាថ្មីដែលការវាស់វែងនេះជំហានដំបូងផ្តោតសំខាន់ទៅដីរដ្ឋដែលបានសម្បទានសេដ្ឋកិច្ចទៅឲ្យវិស័យឯកជន និងដីដែលរដ្ឋបានដកហូតមកវិញពីក្រុមហ៊ុនមួយចំនួនដែលទទួលបានការសម្បទានពីរដ្ឋហើយមិនបានធ្វើសកម្មភាពអ្វីសោះ។
លោករដ្ឋមន្ត្រីបានពន្យល់ថា សារៈសំខាន់នៃការចុះបញ្ជីដីរដ្ឋនេះទី១រាជរដ្ឋាភិបាលបានដឹងពីទិន្ន័យផ្ទៃដីនិងការគ្រប់គ្រងដីរដ្ឋរបស់ស្ថាប័នរដ្ឋនីមួយៗច្បាស់លាស់ទី២កាត់បន្ថយបាននូវទំនាស់ដីធ្លីរវាងរវាងប្រជាពលរដ្ឋ និងរដ្ឋ។
លោកបានបន្តថាតាមផែនការនៅក្នុងឆ្នាំ២០១៥នេះយើងត្រូវតែចុះបញ្ជីដីរដ្ឋឲ្យបាន៥សែនហិកតា និងបញ្ចប់១០០%នៅក្នុងឆ្នាំ២០២៣ ដូច្នេះមន្ត្រីជំនាញនៅក្នុងខេត្តទាំង៧នេះត្រូវតែបង្កើនល្បឿននៃការចុះវាស់វែងដីរដ្ឋនៅក្នុងសមត្ថកិច្ចរបស់ខ្លួនឲ្យបានលឿនទៅតាមផែនការ។
លោកឃឹម ប៊ុនសុង អភិបាលខេត្តសៀមរាបបានប្តេជ្ញាថានិងខិតខំធ្វើការងារនេះឲ្យបានលឿនព្រោះថាការចុះបញ្ជីដីរដ្ឋនេះអាចនឹងបញ្ចប់បាននូវជម្លោះដីធ្លីរវាងដីរដ្ឋ និងដីប្រជាពលរដ្ឋ។
សូមបញ្ជាក់ថានៅក្នុងខេត្តសៀមរាបមានក្រុមហ៊ុនចំនួន១៤បានទទួលដីសម្បទានសេដ្ឋកិច្ចពីរដ្ឋាភិបាលក្នុងនោះមានក្រុមហ៊ុនចំនួនពីរត្រូវបានដកហូតមកវិញ និងក្រុមហ៊ុន១ទៀតកំពុងតែស្នើសុំដកដោយសារតែក្រុមហ៊ុននេះមិនបានធ្វើសកម្មភាពអ្វីសោះបន្ទាប់ទទួលបានការសម្បទានពីរដ្ឋ៕
