កំពង់ឆ្នាំង ៖ សមាជិក សមាជិកាថ្មីចំនួន៨៩រូបមកពីសិស្សវិទ្យាល័យប្រពៃគីរី ស្រុកជលគីរី ខេត្តកំពង់ឆ្នាំង បានស្ម័គ្រចិត្តចូលជា សមាជិកគណបក្សប្រជាជនកម្ពុជា នៅទីស្នាក់ការគណបក្សប្រជាជនកម្ពុជាស្រុកជលគីរី ខេត្តកំពង់ឆ្នាំង ដែលពិធីប្រកាសបញ្ចូលសមាជិក
សមាជិកាថ្មីនេះបានធ្វើឡើង នៅថ្ងៃទី៣១ ខែកក្កដា ឆ្នាំ២០១៥នេះ ក្រោមអធិបតីភាពរបស់ឯកឧត្តម អ៊ឹង លាងហ៊ួរ សមាជិកអចិន្ត្រៃយ៍គណបក្សប្រជាជនកម្ពុជាខេត្ត និងជាអនុប្រធានក្រុមការងារថ្នាក់ថ្នាក់ខេត្ត ចុះជួយស្រុកជលគីរីដោយមានការអញ្ជើញចូលរួមពីឯកឧត្តម ប៉េ ជំនិត ក្រុមការងារថ្នាក់កណ្តាល តំណាងឯកឧត្តម ប៉ែន វុឌ្ឍី ក្រុមការងារថ្នាក់កណ្តាលនិងជាប្រធានក្រុមការងារចុះជួយស្រុកជលគីរី និងឯកឧត្តម ស៊ុន សុវណ្ណរិទ្ធ ក្រុមការងារថ្នាក់ខេត្តនិងជាអនុប្រធានក្រុមការងារចុះជួយស្រុកជលគីរី ព្រមទាំងសមាជិកសមាជិកាបក្សស្រុកឃុំចូលរួមយ៉ាងច្រើនកុះករផងដែរ។
បន្ទាប់ពីតំណាងអោយសមាជិកថ្មីទាំង៨៩រូប ឡើងអានពាក្យសុំចូលសមាជិកសមាជិកាថ្មីរបស់គណបក្សប្រជាជនរួចមក។លោក យិន សាវ៉េន ប្រធានគណៈកម្មាធិការគណបក្សប្រជាជន ស្រុកជលគីរីបានឡើងអានសេចក្តីសំរេចលេខ០០៣/០១៥ ចុះថៃ្ងទី២៨ ខែកក្កដា ឆ្នាំ២០១៥ របស់គណៈកម្មាធិការគណបក្សប្រជាជនកម្ពុជាស្រុកជលគីរី សំរេចបញ្ចូលសមាជិកសមាជិកាថ្មី មកពីវិទ្យាល័យប្រពៃគីរីស្រុកជលគីរី សរុបរួម៨៩រូបជាផ្លូវការចាប់ពីថ្ងៃប្រកាសនេះតទៅ។
តំណាងសមាជិកថ្មីបានឡើងធ្វើការប្តេជ្ញាចិត្តថា៖១.ខិតខំអភិវឌ្ឍន៍អប់រំសមត្ថភាពខ្លួនអោយក្លាយទៅជាកំលាំពិតរបស់គណបក្សប្រជាជនកម្ពុជាដើម្បីរួមគ្នាអភិវឌ្ឍន៍ប្រទេសជាតិ, ២.សាមគ្គីភាពផ្ទៃក្នុងបក្សអោយបានល្អនិងទំនាកទំនងល្អជាមួយមជ្ឍដ្ឋាននានាក្នុងសង្គមដើម្បីពង្រឹងកិត្យានុភាពរបស់គណបក្ស ,៣.គាំទ្របេក្ខភាពសម្តេចតេជោ ហ៊ុនសែន ជានាយករដ្ឋមន្ត្រីគ្រប់អាណត្តិ ដើម្បីដឹកនាំនាវាកម្ពុជាអោយមានសុខសន្តិភាព និងការអភិវឌ្ឍន៍សមិទ្ធផលថ្មីៗបន្ថែមទៀត។
ក្នុងឱកាសនោះឯកឧត្តម អ៊ឹង លាងហ៊ួរ បានមានប្រសាសន៍ថា៖ក្មួយៗទាំងអស់ពិតជាបានយល់ច្បាស់ពីការដឹកនាំរបស់គណបក្សប្រជាជនគឺធ្វើអ្វីៗដើម្បីប្រទេសជាតិ និងប្រជាជនដូចទើបក្មួយៗបានចូលរួមជាមួយគណបក្សប្រជាជនកម្ពុជានាពេលនេះ។
ក្មួយៗទាំងអស់ជានិស្សិតឬក៏ប្រជាពលរដ្ឋសុទ្ធតែមានសម្ថភាពពិតៗ ដើម្បីបម្រើផលប្រយោជន៍ ជូនសង្គមជាតិ ព្រោះក្មួយៗ ទាំងអស់ គឺជាទំពាំងស្នងឫស្សី និងជាសសរទ្រូង ដ៏រឹងមាំរបស់ ប្រទេសជាតិទៅអនាគត ដោយកម្លាំងយុវជន គឺជាស្នូលដ៏សំខាន់ នៅក្នុងមូលដ្ឋាន ដើម្បីអោយមូលដ្ឋាន របស់យើង រីកចម្រើន និងមានសុវត្ថិភាព ទៅបានទាល់តែមានក្មួយ ចូលរួមជាចលនា យុវជន ហើយក៏ជាកាត ព្វកិច្ចរបស់ក្មួយៗ ដែលត្រូវបំពេញ និងស្វែងយល់ផងដែរ។
ឯកឧត្តម អ៊ឹង លាងហ៊ួរ ក៏បានបញ្ជាក់ថា ៖រាជរដ្ឋាភិបាលដឹកនាំដោយគណបក្សប្រជាជនកម្ពុជា គឺក្មួយៗមានសិទ្ធិសេរីភាព ពេញលេញល្អណាស់ មានសិទ្ធិបញ្ចេញមតិ ផ្ទាល់ខ្លួន និងសិទ្ធិ ទាំងអស់ក្នុងការរស់នៅ ហើយបើគ្មានថ្ងៃ៧មករា ក៏គ្មានថ្ងៃ២៣តុលា នាទីក្រុងប៉ារីស ហើយបើមិនមានថ្ងៃទាំងអស់នេះ ក៏គ្មានអ្វីៗដូចពេលបច្ចុប្បន្ននេះដែរ។
គណបក្សប្រជាជនកម្ពុជា ក្រោមការដឹកនាំដ៏ឈ្លាសវៃប្រកប ដោយគតិបណ្ឌិតរបស់សម្តេច អគ្គមហាសេនាបតីតេ ជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មិនត្រឹមតែបានរំដោះប្រទេសជាតិ និងប្រជាជនទាំងមូល ពីរបបប្រល័យពូជសាសន៍ប៉ុល ពតដ៏សាហាវយង់ឃ្នង នៅថ្ងៃទី០៧ ខែមករា ឆ្នាំ១៩៧៩ ប៉ុណ្ណោះទេ គឺថែមទាំងបានដឹកនាំ និងកសាងប្រទេសជាតិតាំងពីបាតដៃទទេ រហូតមានសុខសន្តិភាព ស្ថិរភាព នយោបាយពេញលេញ និងមានការអភិវឌ្ឍរីកចម្រើនលើគ្រប់វិស័យ។
ឯកឧត្តម អ៊ឹង លាងហ៊ួរ ក៏បានផ្តាំផ្ញើដល់ក្រុមការងារទាំងអស់ និងសមាជិក សមាជិកាថ្មីចំនួន៨៩រូបត្រូវបន្តសហការ និងសាមគ្គីភាពផ្ទៃក្នុង ដោះស្រាយជូនដល់ប្រជាពលរដ្ឋដែលជួបប្រទះបញ្ហាផ្សេងៗ និងខិតខំឃោសនាផ្សព្វផ្សាយអំពីកម្មវិធីនយោបាយរបស់គណបក្សប្រជាជនកម្ពុជា ដើម្បីឈានទៅរកជ័យជំនះក្នុងការបោះឆ្នោត ឃុំ សង្កាត់ឆ្នាំ២០១៧ និងការបោះឆ្នោតថ្នាក់ជាតិឆ្នាំ២០១៨ ខាងមុខនេះ៕
