ខេត្តសៀមរាប៖ មន្ត្រីកាំកុងត្រូល ចុះឆែកចំណីអាហារផលិតចេញពីសារធាតុប្លាស្ទិច នៅក្នុងសាលាបឋមសិក្សាវត្តបូត៌ ក្នុងក្រុងសៀមរាប ដើម្បីការពារសុវត្ថិភាពដល់សុខភាពសិស្សនៅក្នុងសាលាឲ្យបានល្អ ព្រោះកន្លងមកនេះ មានករណីភ្ញាក់ផ្អើលថា ៖ បច្ចប្បន្ននៅក្នុងប្រទេស
កម្ពុជា មានការហូរចូលប្រភេទចំណីអាហារដែលផលិតចេញពីសារធាតុប្លាស្ទិច ដែល ត្រូវបានមជ្ឈដ្នានអ្នកលេងសង្គមFacebook មួយចំនួន វាយប្រហារថា ៖ ជាករណីវិច្ឆេតកម្មសុខភាព ដ៏អមនុស្សធម៌បំផុត ។
នៅក្នុងបេសកកម្មរបស់កាំកុងត្រូលនោះ បានធ្វើឡើងនៅក្នុងសាលាបឋមសិក្សាវត្តបូត៌នាព្រឹកថ្ងៃទី០១ ខែសីហា ឆ្នាំ២០១៥នេះស្ថិតនៅភូមិវត្តបូត៌ សង្កាត់សាលាកំរើក ក្រុងសៀមរាប។ត្រូវបាន ក្រុមការងារចុះត្រួតពិនិត្យប្រទះឃើញចំណីអាហារប្រភេទបង្គារគ្រឿងបំពងប្រេង ថាមិនមែនជាអាហារធម្មជាតិ ។
ថ្វីត្បិតតែការលើកឡើងខាងលើ ពុំទាន់មានការពិសោធន៍ណាមួយបញ្ជាក់ជាផ្លូវការនៅឡើយថា ជាការពិត ឬ គ្រាន់តែជាការចោទប្រកាន់យ៉ាងណាក៏ដោយ ប៉ុន្តែ ករណីនោះ វាបានក្លាយជាប្រធានបទយ៉ាងសំខាន់ ដែលអគ្គនាយកដ្ឋានកម្ពុជាត្រួតពិនិត្យទំនិញនីហរ័ណ -អាហរ័ណ និងបង្ក្រាបការក្លែងបន្លំ ដែលគេស្គាល់ថា(កាំកុងត្រូល)នៃក្រសួងពាណិជ្ជកម្ម ត្រូវបានយកចិត្តទុកដាក់ ! ហើយថ្មីៗនេះ សាខាកាំកុងត្រូលនៃបណ្តាខេត្ត-រាជធានី បានផ្តោតជាសំខាន់ បញ្ជាក់អំពីការព្រួយបារម្ភចំពោះសុខភាពកុមារ ដែលជាគោលដៅងាយរងគ្រោះ ដោយត្រូវបានចុះត្រួតពិនិត្យ ការលក់ដូរចំណីអាហារ នៅតាមសាលារៀន នានាទូទាំងប្រទេស ។
លោក លិញ សុវឌ្ឍនា មន្ត្រីសាខាកាំកុងត្រូលខេត្តសៀមរាប បានឲ្យដឹងនៅក្នុង ពេលដែលលោក បានដឹកនាំក្រុមការងារ ចុះត្រូតពិនិត្យរកមើលចំណីអាហារដែលពុំមានសុវត្ថិភាព និងមិនសមស្របសម្រាប់កុមារបរិភោគ នៅសាលាបឋមសិក្សាវត្តបូព៌ ក្រុងសៀមរាប ដោយប្រាប់ថា ការងារនេះត្រូវបានរួមសហការជាមួយមន្ទីរពាណិជ្ជកម្មខេត្ត និងមានការគាំទ្រដោយលោកនាយកសាលាផងដែរ ។លោកបានបន្តថា វាពិតណាស់ ការរកមើលចំណីអាហារ ដែលគេសង្ស័យថា ត្រូវបានផលិតចេញពីសារធាតុប្លាស្ទីច វាជាប្រធានបទក្តៅ ក៏ប៉ុន្តែប្រការផ្សេងៗទៀត ក៏ជាបញ្ហាសំខាន់ផងដែរ ឲ្យតែវាមានផលប៉ះពាល់ដល់សុខភាពកុមារ ដូចជាចំណីអាហារ ដែលពុំមានស្លាកសញ្ញាសំគាល់ ប្រភព ផលិត អាហារហួសកាលបរិច្ឆេតប្រើប្រាស់ អាហាររក្សាទុកមិនបានល្អ ជាដើម។លោក លិញ សុវឌ្ឍនា បានបន្តទៀតថាវាគ្រាន់តែជាការសង្ស័យប៉ុណ្ណោះគឺពុំមែនជាការសន្និដ្ឋាននោះទេ។លោកបានបញ្ជាក់ថា ផលិតផលចំណីអាហារដែលយើងសង្ស័យនេះ ត្រូវបានដកហូតចំនួន៣កញ្ចប់តូច ដើម្បីបញ្ជូនទៅមន្ទីរពិសោធន៍ នៅឯភ្នំពេញ។ប៉ុន្តែ ចំណីអាហារប្រភេទបង្គារគ្រឿងបំពងនោះ ត្រូវបានសាខាកាំកុងត្រូលខេត្តសៀមរាប ឲ្យផ្អាកការលក់ដូរ ជាបណ្តោះអាសន្នសិន ហើយលោកក៏បានផ្តល់នូវការណែនាំសម្រាប់សាលា និង អ្នកលក់ដូរចំណីឲ្យកុមារនៅក្នុងសាលារៀននោះថា ពពួកចំណីអាហារណាដែលវេចខ្ចប់ពុំមានស្លាកសញ្ញាត្រឹមត្រូវ នោះត្រូវតែបញ្ឈប់ ជាដាច់ខាត កុំឲ្យមានការយកមកលក់ដូរឲ្យកុមារ តទៅទៀត ៕ ដោយ ខេង ឧត្តម
