ខេត្តតាកែវ ៖ នៅព្រឹកថ្ងៃទី៤ ខែសីហា ឆ្នាំ២០១៥ វេលាម៉ោង៧និង៣០នាទី មានការភ្លាក់ផ្អើលមួយបានកើតឡើង បន្ទាប់ពីមានប្រជាពលរដ្ឋប្រទះឃើញសាកសពបុរសមិនស្គាល់អត្តសញ្ញាណម្នាក់ដេកស្លាប់នៅក្នុងប្រឡាយគ្មានទឹកមួយកន្លែងស្ថិតនៅខាងលិចភូមិអង្គ
ស្វាយចេក ឃុំចារ ស្រុកព្រៃកប្បាស ខេត្តតាកែវ។ បើតាមសម្តីពីសមត្ថកិច្ចដែលចុះធ្វើការត្រួតពិនិត្យដល់កន្លែងកើតហេតុ បាន បញ្ជាក់ថា នៅលើសាកសពជនរងគ្រោះគឺមានស្នាមគ្រាប់កាំភ្លើងបាញ់ទម្លុះក្បាលមួយគ្រាប់ ដែលករណីនេះ ខាងកម្លាំងសមត្ថកិច្ចសង្ស័យថា ជាករណីប្លន់យកទ្រព្យសម្បត្តិ ។សពជនរងគ្រោះគ្មានបន្សល់អ្វីជាតម្រុយសម្រាប់តាមរកសាចញាតិនោះទេ ព្រោះមានតែអាវភ្លៀងនៅគ្របពីលើ ហើយនៅក្បែរសាកសព សមត្ថកិច្ចរកឃើញ សំបកគ្រាប់ កាំភ្លើងអាកា៥៤មួយគ្រាប់ ។ ជាជំហ៊ានដំបូងជនរងគ្រោះត្រូវបានដាក់ការសង្ស័យថា ជាអ្នករត់ម៉ូតូឌុប ឬ ជាដង្ខៅដើររកទិញគោ ។ ទោះជាយ៉ាងណានៅព្រឹកថ្ងៃទី៤នេះសមត្ថកិច្ចបញ្ជាក់ថា នៅមិនទាន់ស្គាល់អត្តសញ្ញាណជនរងគ្រោះនេះនៅឡើយទេ ៕
